التسميات

سر قبيلة الدوغون

المقال مشترك بيني وبين أختي
Aya Omar
يارب يعجبكم 
ممكن تكون قريت مقالات او شفت صور لحضارات قديمة بتحكي قصص تواصلهم مع سكان المجرات التانية والكواكب القريبة مننا وعن المخلوقات اللى زارت الارض من النجوم عشان تساعدهم وتعلمهم اساليب البقاء ,هتقول كل دي حضارات انتهت ومبقاش منها غير شوية اثار ودماغهم كانت فاضية شوية وفاضيين ..طب لو قولتلك ان في قبيلة لسه موجودة لحد دلوقت وفى زمننا دة عندهم علم ومعرفة فلكية ضخمة واثارت تساؤلات وحيرة اكبر علماء الفلك اللى سمعت عنهم فى حياتك ودراستك وبيؤكدوا انهم اتواصلوا عبر الزمن مع مخلوقات من عوالم تانية وكواكب ونجوم قريبة مننا .. نشوف سوا ايه قصتهم

قبيلة الدوغون , قبيلة افريقية كبيرة في " مالي " عدد افرادها تتجاوز الـ 300 الف شخص وبيستقروا على الهضاب الصخرية .. حياتهم حياة هادية وعادية ومسالمة جدا .. ممكن تفتكرهم ناس عادية إلا ان الكهنة هناك عندهم علم ضخم جدا زي ماقولت بالفلك اثار ضجة وحيرة كبيرة بين العلماء رغم ان حياتهم بدائية جدا وثقافتهم الدينية معتمدة بالكامل على علوم الفضاء وبالتحديد النظام النجمي " سيريوس " اللي مستحيل يترصد بالعين المجردة , عندهم معلومات كتيرة جدا عن مكانه وأسرار كتير عنه وبيعتبروه مفتاح علومهم السماوية من قرون طويلة ومن قبل ماتكتشفه التلسكوبات الحديثة والمثير للإندهاش انهم بينسبوا معرفتهم بكل المعلومات دي لقوم من الكائنات الفضائية .. 
حياة الدوغون مليانه اساطير قديمة بتتكلم عن نشأة الكون بواسطة الإله " أما " على حسب كلام الكهنة ..الاسطورة بتقول 
" ان الاله امّا هو اللي خلق كريات أرضية وخلاها تنطلق للفضاء وبعد كدة تحولت لنجوم وبعدها بعت وراهم كورتين من الفخار الابيض والمقصود بالكورتين " الشمس والقمر " ونهاها بكوره مصنوعه من عمود من طين " الارض " ومن نفس العمود الطيني خلق 8 كائنات صغيره عيونهم حمراء واجسامهم خضراء تناسلوا وأنجبوا 8 أسر وبعد تكاثرهم سكنوا منطقة الدوغون ..
الاسطورة ممكن تكون عاديه للوهلة الأولى ومش مهمة لكن اللي خلى الاسطورة غريبه انهم معتقدين ان المخلوقات الثمانية دول جم من نجم " سيريوس " وان النجم ده بيرافقه نجم تاني اسمه " سيريوس ب " وكان من المحير جدا انهم يكونوا عارفين النجم دة اللي اكتشف اصلا سنة 1836 واتسمى بالقزم الابيض سنة 1915 
أما سيريوس بي فلاحظ العالم فريدريش بيسيل سنة 1844 وهو بيفحص مشاهدات أجريت من سنين حركة غريبة للنجم سيريوس وقال احتمال يكون في رفيق للنجم سيريوس وبكدة يكون نجم ثنائي .. وحاول العلماء من بعده يثبتوا صحة نظريته ويرصدوه وكانت محاولاتهم دايما بتفشل لحد مافي يوم قدر " الفان جراهام كلارك " وهو ابن صانع البصريات " الآن كلارك " يوم 31 يناير 1862 وهو بيجرب عدسات جديدة لوالده انه يشوف " سيريوس ب " ونظرا لأن فى الوقت ده " سيريوس ب " كان بعيد فى مداره عن النجم " سيريوس " فقدر عدد كبير من الفلكيين فعلا يتأكدوا ويتحققوا من وجوده 
* معلومة هامة : بيطلق اهل البحر على " سيريوس " اسم " التير " واهل البادية في منطقة نجد فى شبه الجزيرة العربية بيسموه " المرزم ,وبالعامية يدعى "الشعرى اليمانية " وهو النجم الوحيد " بإستثناء الشمس " اللي اتذكر اسمه صريح فى القران الكريم (( وَأَنَّهُ هُوَ رَبُّ الشِّعْرَى )) 49 سورة النجم صدق الله العظيم وهبقى اعمل مقال بسيط اكلمكم عنه اكتر ..ونكمل كلامنا
سنة 1931 سافر عالمين فرنسيين مختصين بالانثروبولوجيا (( علم الإنسان : الدراسه العلمية للإنسان في الماضي والحاضر ))
وعاشوا مع الشعب الدوغوني عشان يدرسوا ثقافتهم ويفهموهم اكتر و كانوا بيسموهم فى الوقت ده بـ " السودان الفرنسي " عاشوا معاهم 20 سنة ومكنش مرحب بيهم فى البداية لكن بعد سنين قدروا يكسبوا احترام سكان المنطقة وقبولهم وسنة 1946 وافق حكماء القبيلة هناك يدرسوهم علومهم الكونية , ومسك الكهنة عصايه ورسموا على التراب شكل السماء زي مابتصور ثقافتهم , واتصدم العالمين الفرنسيين لما بدأ الكهنة يرسموا جرم كبير بيدور حواليه نجم أصغر والمعروف علميا ان النجم ده بيدور حوالين النجم سيريوس مره كل خمسين سنة والعجيب ان الدوغون بيحتفلوا كل خمسين سنة بمهرجان اسمه " سيجي وترجمتها تعني : تجديد العالم " وبيمثلوا النجم دة بأصغر حاجة بيمتلكوها وهي الحبوب الصغيره اللي بتمثل غذائهم الرئيسي , في لغتهم " سيريوس ب " اسمه " بوتولو " ومعناه انه صغير الحجم لكن تقيل الوزن 
ولما استفسر العلماء عن مصدر المعلومات اللي يعرفها الكهنة قالولهم انها وصلتلهم عن طريق كائنات فضائية برمائية شبه حوريات البحر اسمها " النومو " نزلت في أرض الدوغون من وقت طويل وقالوا ان الكائنات دي هما المرشدين فى الكون وآباء البشرية , الدوغون بيرسموا تقريبا في كل مكان اشكال بتوصف وصول الكائنات دي للارض وبتحدد مكان هبوط سفينتهم , وبتشير انها نزلت فى شمال شرق الدوغون على مكان قريب من الهضبة الصخرية اللى بيعيشو عليها السكان , وبعد فترة اكتشف العالم مارسيل ان القبيله دي بتمتلك علوم فلكية متعدده تانية وعارفينها من قرون , مثلاً .. يعرفوا ان المشترى عنده اربع اقمار رئيسية , وان زحل حواليه حلقات وان الارض بتدور حوالين الشمس وان النجوم اجسام بتتحرك باستمرار , عارفين كمان ان القمر هو كوكب ميت وعارفين الحركة اللولبية لدرب التبانة , وبيزعموا ان النجم سيريوس ليه نجم تاني غير النجم سيريوس ب , ولحد دلوقت العلماء مكتشفوش النجم دة لكن لو اكتشفوه فاده هيأكد صحة اساطير الدوغون بخصوص تواصلهم مع كائنات فضائية وهيفضل السؤال اللي بيطرح نفسه .. منين استمد الدوغون معرفتهم وايه مصدرهم
الحقيقي حتى لو هما بيكدبوا ؟ 
العلماء والناس اللي اثارهم الموضوع حطوا احتمالات فى محاولة منهم لتفسير معرفه قبيلة الدوغون بكم المعلومات الهائله دي 
قالوا ان نزول الكائنات الفضائية وتبادل المعلومات معاهم مش قصة مقنعة رغم وصفهم العجيب للسفينة الفضائية و انها عملت ضجة كبيرة هزت الحجارة من الارض واتسببت فى ارتفاع التراب فى السماء بشكل هائل , كل القصص دي اتنقلت للاسف بطريقة شفويه من جيل للتاني وبالتالي احتمال ضياع المعلومات او تغييرها سهل جدا وكبير , وبرغم كدة فى ناس ايدت فكرة الكائنات الفضائية زي العالم روبرت تمبل اللي الف كتاب بخصوص الموضوع ده بإستنتاجات جريئة .. وناس تانية رفضوا يصدقوا التفسير ده وادوا احتمال بسيط اكتر وهو ان شعب الدوغون تم تدريسهم من مدرسة فرنسية علمانية سنة 1907 عشان كدة علومهم مستمدة من الحضارة الفرنسية , ورغم ان الحجة دي منطقية جدا إلا انها للاسف ممكن تكون مش صحيحة لأن اساطير الدوغون موجودة من قبل استعمار الفرنسيين ليهم وزائد ان مستحيل يكون في اي مدرس ادى للدوغون دروس فى علوم الفلك خصوصا فى المواضيع الدقيقة زي النجم " سيريوس ب " 
وفي فرضيه تانية بتقول ان الناس في العصور القديمة كانو بيميلو اكتر لحب علوم الفلك وديانات الشرق الاوسط المليانه مواضيع زي دي , وقبيلة الدوغون مكانتش معزولة عن العالم ..كانت عندها طريق تجاري بتوصل بيه كل مكان حتى لمصر عشان كدة من المحتمل انها استمدت معرفتها من الأديان القديمة سواء في مصر او بلاد مابين النهرين لحد اليونان ,, ومن المعروف كمان ان نجم سيريوس هو اكثر نجم لامع فى سمائنا والفراعنه اتكلموا عنه وربطوه بفيضانات النيل الأولى ومن ناحية تانية اساطير اليونان بتشير لمخلوقات برمائية نصها انسان ونصها التانى سمكة 
لكن بيفضل اهم سؤال يعطل الفرضي هدي .. نجم سيريوس ب اللي مستحيل يتشاف بالعين المجردة ازاى عرفه سكان الدوغون ؟ 
هنختم كلامنا بآيه من القران الكريم " وَمَا أُوتِيتُمْ مِنْ الْعِلْمِ إِلاَّ قَلِيلاً " صدق الله العظيم ومستنيين رأيكم بشدة فى الموضوع


التسميات:

تعليقات

إرسال تعليق

المشاركات الشائعة