ساحرة تحول ضحاياها لقطع صابون !

 إعتبر نفسك دلوقت فى ايطاليا و داخل متحف .. اسمه " علم الجريمة " .. هتلاقي ناس كتير جداً واقفه حوالين بقايا جريمه بشعة وغامضة .. ساحرة وصل بيها الهوس انها تحول ضحاياها لصابون .. ازاى الكلام دة 

وايه قصة الست دي ؟

" ليوناردا جينجولي " اتولدت سنه 1894 في بلد صغيره اسمها " مونتيلا " في ايطاليا .. اتولدت نتيجه حالة اغتصاب اتعرضتلها امها وأهلها اجبروها تتجوز الشخص الي اغتصبها عشان " الفضيحة " 
عشان كده " ليوناردا " كانت بتفكر امها دايماً بالحادثة الى اتعرضتلها وسلبتها شبابها ..
وكانت بتعاملها دايماً بقسوة .. ليوناردا بقت وحيدة ومنبوذة من الكل ..
محدش كان بيحبها ومحدش كان بيعاملها كويس وكل ده انعكس على صحتها وبدأت يجيلها نوبات صرع من فترة للتانية .. وحاولت تنتحر مرتين.. 
وفي المرتين امها كانت بتبصلها بإحتقار وتقولها " انا اسفة لإنك مازلت على قيد الحياة " يعني عايزة تقولها بالبلدي كدة " كنتي موتي وغوري فى داهية " .. سنة 1917 اتجوزت ليوناردا بالرغم من ان امها كانت معارضه جوازها ومش موافقة عليه .. وفي حفلة جوازها دخلت امها متضايقة وقالتلها " أتمنى ان يموت جميع أطفالك " .. الكلمة دي سابت اثر كبير في نفسية ليوناردا ..
وكانت السبب الرئيسي في جرايمها .. بعد كذا سنة ليوناردا راحت تعيش في بيت جديد في بلدة صغيرة اسمها " كوريدجو " في شمال ايطاليا ..وأحوالها اتبدلت واتحسنت جداً ..
فتحت محل صغير والناس اللي مكانوش يعرفوا عنها أي حاجة ..
عرفتها على إنها ست طيبة بتعمل صابون في بيتها وبسكوت 
ليوناردا مات ليها 10 اطفال وأجهضت 3 مرات .. لحد ماصدقت ان لعنة أمها اتحققت ..
عشان كدة اتوجهت للسحرالاسود .. جمعت كتب سحر كتير .. واتعمقت فيه بشكل مرعب .. 
مكنش ليها غير 3 بنات وولد ..وكانت بتخاف عليهم جداً وخصوصاً إبنها " جيوسيبي " عشان كدة دخول ايطاليا في الحرب العالمية الثانية .. كان بالنسبالها اكبر كابوس بتعيشه ..
خصوصاً بعد مانتشرت اشاعات على إن " موسوليني " هيستدعي كل الشباب للخدمة العسكرية .. وده اللي خلى ليوناردا تطبق طقوسها الشيطانية فى اسرع وقت ..
جه الوقت عشان تقدم قربان للشياطين .. عشان ينقذوا ابنها " جيوسيبي " من الموت .. وكانت حريصة اوي فى انها تختار الضحايا بهدوء من بين الستات الي كانوا بيروحولها المحل ..
وكانت " فوستينا سيتي " اول ضحية ليها .. فوستينا كانت بتدور على زوج ليها .. وليوناردا استغلت الفرصة ووعدتها تجوزها لشاب حلو وغني .. مقابل انها تديلها كل ممتلكاتها من دهب ومجوهرات بس من غير ماتعرف حد عن الموضوع ده وتروحلها الفجر .. وفعلا راحتلها .. فخدرتها ليوناردا وقتلتها .. وقطعت جسمها وحطته في " قدر " بتستخدمه عشان تعمل الصابون .. حطته على النار مع 7 كيلو صودا ..
وعملت من جسم " فوستينا " صابون بشري .. الضحية التانية كانت ارملة اسمها " فرانشيسكا " ليوناردها أوهمتها انها هتجيبلها وظيفة تشتغل مدرسة فى " بياتشينزا " في شمال ايطاليا , وأقنعتها متقولش لحد عن الوظيفة عشان محدش يحسدها وتبعد عنها العين الشريرة ..
وطلبت منها تروحلها الفجر .. وده كان اخر مشوار عملته " فرانشيسكا " وكان مصيرها نفس مصير " فوستينا " .. أما الضحية التالتة .. كانت مغنية مشهورة اسمها " فيرجينيا " ..
بس بعد ماكبرت فى السن .. شهرتها قلت .. بس ليوناردا قالتلها انها هتساعدها وتشغلها سكرتيرة في مسرح كبير .. بس للأسف مختلفش مصيرها عن باقي الضحايا .. بعد ما الضحية " فيرجينيا " اختفت .. اخت جوزها اتقدمت ببلاغ عن الاختفاء .. وقالت في البلاغ ان اخر مرة شافتها .. كانت داخلة بيت ليوناردا .. حاولت ليوناردا تراوغ وتكدب علي الشرطه .. بس الشرطه مصدقتهاش وعرفوا انها بتكدب بسرعة ..
وهددوها انهم هيقبضوا على ابنها " جيوسيبي " لو معترفتش وقالت الحقيقة
انهارت ليوناردا واعترفت على طول ازاى كانت بتقتل ضحاياه وازاى كانت بتضيف الدم لـ اللبن والشيكولاتة الي بتعمل بيهم بسكوت وكيك .. بس اللي الشرطه مقدرتش تصدقة .. ازاى ست كبيرة عجوزة فى السن ده والحجم الصغير ده .. تقطع جثة بشرية في 12 دقيقة بس .. وولادها الي معاها فى نفس البيت ميحسوش بيها 
قضية ليوناردا شغلت الرأي العام فى ايطاليا كلها وأخبرها غلبت اخبار الحرب .. دافعت عن نفسها قدام المحكمة وقالت انها عملت كده بسبب امها الي كانت دايما تظهرلها في كوابيسها وتهددها بإنها هتقتل باقي ولادها لو مقدمتلهاش دم جديد ..المحكمة مقتنعتش بإجابة ليوناردا وحججها .. وشك المدعي العام فى انها تعمل جرايمها لوحدها .. وإتهم ابنها الكبير " جيوسيبي " بانه ساعدها .. بس المحكمة ملقتش أي دليل يدينه .. فطلعته براءة .. ورفضت ليوناردا توضح ازاى بتتخلص من الجثة بسرعة .. اما ليوناردا فاخدت حكم بالسجن 33 سنة .. 3 منهم قضتهم في مصحة عقلية .. و30 في السجن .. ماتت ليوناردا سنة 1970 واتدفنت في مقابر " الفقراء والمشردين " في " بوزولي " محدش طالب بجثتها .. ومحدش حضر دفنها ..
ويبقى هنا السؤال .. جرايم ليوناردا واللي وصلتله .. غلطها .. ولا غلط الأم ؟ 
وسؤال اهم .. ازاى ليوناردا كانت بتخلص جريمتها في 12 دقيقة لوحدها .. هل فعلاً إبنها ساعدها ؟ ولو مش ابنها .. ازاى بتخلص لوحدها .. وليه رفضت تحكي ؟

مصادر :

https://en.wikipedia.org/wiki/Leonarda_Cianciulli

http://scaredyet.net/leonarda-cianciulli-soap-making-seria…/

http://www.bbc.com/news/magazine-27257822

http://weirditaly.com/…/leonarda-cianciulli-the-soapmaker-…/

http://gizmodo.com/the-superstitious-murderer-who-turned-he…

#يارا_عمر
#غريبة
#أكسجين_حروف