تسكن مرحاض غرفتي | قصة حقيقية

انا عيشت في بيت من الجحيم لمدة 4 سنين .. من وانا سني 11 لـ 16 سنة تقريبا , كان في حاجه مش طبيعية بتحصل في البيت ده .. انا بحس بالتوتر كل ما افتكر .. ومش عارفه ليه بترعش وانا بحكي حتى دلوقت.. الي كان بيحصل في البيت مكنش عادي من اول الابواب اللي بتفتح وتتقفل فجأة على اخرها لوحدها وصوت خطوات الرجلين بليل ونباح الكلاب واحنا معندناش كلاب حتى , لحد اغراضنا الشخصية اللي كنا بنحطها في مكان وفجأة منلاقيهاش كل دي حاجات ممكن تبان مواقف عاديه وبتحصل لناس كتير , لكن هي تقريبا كانت البدايه لخروجهم ومحاولتهم فى اثبات انهم حوالينا فعلا.. برغم اننا كنا دايما بنرجع تفسير المواقف دي للصدفه او بنقول بيتهيألنا .. بس كنا غلطانين
انا للاسف كنت بفضل في البيت ده لوحدي فترات كبيرة بسبب ان والدي ووالدتي دايماً كانوا بيروحوا الشغل ويسيبوني .. من الحاجات الغريبة جدا والمرعبه اللى عمري ماهنساها ان كان في الحمام الخاص بغرفتي صورة كبيرة لبنت صغيره الصورة تقريبا من سنة 1905م .. شعرها مجعد اصفر ولابسه فستان وردي , كل مره بعدي فيها قدام باب الحمام بشوف فيها البنت واقفه بتبصلي بنظرة غريبة كإنها حقيقية! .. بدأت اقفل باب الحمام عشان اقدر اعدي من قدام الباب من غير ما اشوف الصورة , وفعلا بطلت اشوفها لكن كل ما افتح الباب كنت بلاقيها بنفس المنظر ولما قررت ابطل ادخل الحمام ده واسيب بابه مقفول دايما بطلت اشوفها تاني لكن كل مره كنت بعدي من قدام الباب كنت بحس بيها موجوده ومستنياني افتح , على قد ماكنت بخاف منها على قد ماكانت بتصعب عليا وبحس بالأسف عشانها .. يمكن لأنها محبوسه في المكان ده زيي لكن الفرق بيني وبينها انها محبوسه فيه للأبد ! 
وكل ماكانت السنين بتمر في البيت ده كان الوضع بيزداد سوء اكتر , كنت كل فتره افتح باب الحمام اشوفها بلاقيها بتزداد .. مش عارفه اوصفها ازاي .. بس كانت بشرتها ..!
بتسود !! لون بشرتها بيتحول اسود ! 
بدأت وقتها احس انها مش بنت صغيره !! انا كنت عارفه ان في حاجه مش كويسه في البيت ده لكن المخيف اني حسيت انهم بيحاولوا يثيروا تعاطفي معاهم ! بيخلوني اتعاطف معاهم لسبب مش مفهوم وانا فعلا كنت بتأثر ! 
وبدأت احس اني هتجنن !! محدش كان مصدقني واهلي كانو دايما بيهددوني بإنهم هيعرضوني لطبيب نفسي ! 
وفي يوم لما وصلت سن 14 سنه , كان عندي صديقة من خارج مدينتي قعدت معايا لمدة اسبوع في البيت وكنا لوحدنا
وانا مكنتش حكيت ليها اي حاجه عن البيت او اللي بيحصل فيه لأني فكرت في انها عمرها ماهتقعد معايا لو قولتلها اي حاجه وخوفتها ! واحنا قاعدين بنتكلم طلبت مني انها تروح الحمام ومعرفش ليه سيبتها تدخل الحمام نفسه .. يمكن كنت عايزة اعرف اذا كانت هتلاحظ الصورة وهتخوفها زي مابيحصل معايا ولا لا يمكن العيب فعلا فيا وانا اللى بتوهم 
رجعت اوضتي واستنيتها تخرج وانا قلقانه ومستنيه اعرف ايه اللي هيحصل !! 
شويه ورجعت الاوضه وعلى وشها نظرة خوف ورعب 
وقالتلى بصوت بيترعش 
- " في بنت صغيره في الحمام بتاعكم " 
رديت عليها .. 
- " انهي بنت ؟ آه , اللي شعرها مجعد ولابسه فستان وردي نسيت احكيلك بس دي صوره مش بنت حقيقيه.. " 
بلعت ريقها بصعوبه وقالتلي وصوتها بيترعش اكتر من الاول 
-" صوره ؟ انا سمعت صوت ورا ستارة البانيو واول ماكشفتها لقيتها واقفه فيه .. " 
فضلت انا وهي باصين لبعض مش عارفين ننطق ولا نصدق اللي بيحصل وانا وهي قفلنا على نفسنا الباب واحنا بنردد صلوات طول الليل ومستنيين والدي ووالدتي يرجعوا من بره .. وحكيتلها كل حاجه والبنت طلبت اهلها عشان تروح ومشيت الصبح حتى مرضيتش تستنى اكتر من كده !
ولحسن حظي ان والدي جاله شغل بمرتب اكبر في مدينه تانيه وكان لازم ننتقل ونعيش في بيت تاني .. لكن والدي ووالدتي قرروا يحتفظوا بالبيت لمدة كم سنه عشان سعره يكون اعلى وبعدين يبيعوه .. ومشينا من البيت فعلا ومرت السنين ولما تميت 18 سنه قرروا انهم يبيعوه وطلبت من صديقة ليا تسافر معايا ونرجع البيت عشان الم شوية متعلقات خاصه بيا سبتها فيه .. واول ماوصلنا حسيت ان صاحبتي مكانتش مرتاحه فى البيت وعملت نفسي مخدتش بالي 
بعدها طلب مني السواق اعرفه فين الحمام 
وصفتله طريق الحمام الخاص بغرفتي بغير قصد 
بعدها بشوية واحنا مشغولين بقفل الكراتين لقيناه جاي بيصرخ وهو مرعوب وبيتكلم عن بنت بشعر اصفر مجعد وفستان وردي بشرتها سوداء وبتنزف من رقبتها بتصرخ في وشه وقالي :" انتي اذيتيها مكنش لازم تسيبيها لوحدها وتمشي ! مكنش المفروض تعملي كده ! " 
وبدون تفكير رمينا كل اللي في ايدنا وهربنا من البيت ! وعمري مارجعت تاني ابدا . 
#يارا_عمر
#حواديت_آخر_الليل