تشوباكابرا | مخلوق غريب ام مصاص دماء؟

تشوبا-كابرا , لا دي مش تعويذة ..
تعال احكيلك اسطورة هتلعب في دماغك حبه كده حتى لو انت مش من المؤمنين بالظواهر الغامضة ومايخصها ..

ظهرت اسطورتنا في منتصف القرن العشرين في جزيرة تابعة لجزر الكاريبي , بدأت بمجرد ما اكتشف بعض السكان المحليين وجود جثة حيوان مقتول عن طريق حيوان تاني( حسب التوقعات) في الغابة .. امر عادي ومنطقي وبيتكرر في كل الغابات .. لكن الغريب والغير منطقي بقا
ان شكل جثة الحيوان اللي لقوه كان مقتول بطريقة غريبة جدا وغير مألوفة ومفيش في جسمه نقطة دم واحده؟

وتمر الايام وفي منتصف التسعينات كده وتحديداً بلدة كانافانس , ظهرت الاسطورة للعلن واللي بتقول ان في مخلوق غريب غير معروف اوصافه , بيصطاد الفريسه بليل لكن مبيلتهمش اي جزء من جسمها , وبيمتص دمائها بس عن طريق ثقبين بيثقبهم بانيابه في رقبتها وبعد مابينتهي من مص دمها يسيب الفريسه ويمشي بهدوء من غير اي دليل ملموس على وجوده اصلا .. وانه مبيهتمش بنوع الحيوان اللي بياكله على قد اهتمامه بالدماء .. يعني نوع وكمية الدم في الفريسه هي اللي بتحدد ان كانت الفريسه مناسبه ليه ولا لا؟! ( مواصفاته مألوفه .. صح ؟ )

طب خليني اكملك ومن غير ماتستعجل ..
بعد مرور شهور بسيطه الاسطورة انتشرت في الامريكتين ( من المكسيك والبرازيل لحد الولايات المتحده ) , وكان يقال ان بيتم العثور يوميا على اكتر من 8 حيوانات مقتولين ومفيش في عروقهم دم , والموضوع تطور لدرجه ان الناس بدأت تقول ان المخلوق ده معاه قطيع كامل .. ومع ذلك مقدرش حد يرصد الحيوان ده او حتى يشوفه , ماعدى شخص واحد اقسم انه قدر يشوف مخلوق التشوباكابرا جمب مزرعته لكن الليل كان حالك ومقدرش يشوفه بوضوح وكل اللي شافه انه يشبه حيوان الدب ولونه بين الازرق والاسود , والغريب في وصف الشاهد اللي ناس كتير كدبته
قال ان في اسنان واشواك بارزه على فقرات ظهر الحيوان وعنده 3 ذراعات وفي الثلاثة مخالب...

الاسطورة كانت بدأت تتلاشى والناس تتجاهلها بسبب اوصاف الشاهد اللي قالها والناس بدأت تشكك في صحة الكلام كله خصوصا ان محدش قدر يشوف المخلوق فعلاَ.. لكن في ليله وضحاها الوضع اتقلب وبدأ المخلوق يهاجم البشر بدل الحيوانات , وتم العثور على جثث بعض البشر مقتولين وتم مص دمهم بنفس الطريقة , والموضوع متوقفش عند جريمة واحده او اتنين .. ده وصل لأكتر من 180 جثة في سنه واحده .. والقضية اصبحت كبيرة وهامه جدا ومبقاش الموضوع مجرد حيوان غريب بيمص دم الحيوانات , وبدأ الشهود يكترو وناس كتير تقول انها شافته .. اجتمع المختصين والباحثين والعلماء والاطباء عشان يعرفوا حقيقة الموضوع , وبعد سماع شهود العيان اجتمعوا على انه سلاله شاذة من سلالات الكلب , وانه نتيجة عملية تهجين غير طبيعية خلته يمتلك جينات النمور والزواحف والكلاب , لكن اللي مقدروش يجاوبوا عليه .. ليه المخلوق بيعتمد على الدماء فقط ؟ وهل هي لإشباع جوعه وغذاء او مجرد غريزة بيشبعها بالطريقة المجنونة دي؟

في حاجات كتير اتعرفت عن مخلوق التشوباكابرا وهي في الحقيقة غريبة جدا , زي مثلاُ انه كان بيعرف وجود دوريات الامن وافراد الشرطة وبيستنى لحد ماينتهوا ويبدأ الهجوم على ضحاياه !

كمان قالوا انه كان ليه صوت يشبه الصفير , وكان بيستخدمه في تخويف الضحية .. وكان معروف بانه بيوصل لهدفه مهما كان الوضع صعب ومتأزم , يعني لو كانت الضحيه جوه اوضه مقفوله .. فا كان المخلوق ذكي لدرجة انه يفتح الباب عشان يوصل للهدف اللي هو عاوزه .. ده غير انه كان بيقدر يقفز لمسافات طويلة جدا بالتالي كانت الضحية بتواجه ازمه في الهروب منه !

قضية التشوباكابرا فعلاً اثرت في الناس والعلماء وتعتبر من الاساطير الحديثه اللي مقدرش حد يوقفها عند كونها اسطوره خياليه .. بسبب وجود الدليل الملموس على حقيقتها فعلاً .. ظهرت نظريات كتير بتحاول تفسر ايه هو المخلوق ده؟ ولحد النهارده البحوث قائمه .. اخر بحث اصدر عن التشوباكابرا كان في 2010 وكان تقرير من باري اوكونور عالم احياء في جامعة ميشيغان , ولخص فيها جميع تقارير التشوباكابرا في الولايات المتحدة وكانت بتجمع كلها على انه ذئب بري (قيوط) مصاب بطفيليات ( القارمة الجربية ) وده بيفسر قلة الفراء والجلد السميك والريحة العفنه حسب شهادة الشهود , واوكونور شايف ان هجمات الحيوان على الماعز والماشيه بشكل خاص بسبب ضعفها وعدم قدرتها على الصيد فبتضطر تهاجمها لانها اسهل من الارانب او الغزلان .

وبردو بيقول ان برغم ان الشهود قالوا ان لا يمكن يكون المخلوق كلب او ذئب لانها مأكلتش الضحية فالاستنتاج ده غير صحيح لان احيانا الكلاب والذئاب بتقتل الفريسة ومتاكلهاش , بسبب قلة خبرة او لأن في صعوبة في قتل الفريسة وبيسيبوا الفريسة على قيد الحياة بعد الهجوم وبعدها تموت بسبب نزيف داخلي او صدمه في الدورة الدموية , ووجود ثقبين في الرقبة بيشابه انياب الكلبيات .. ومن الطبيعي توقعها لانها الطريقة الوحيدة اللي بيقبض بيها الحيوانات اكلة اللحوم على فريستها ..

برغم دسامة التقرير بالمعلومات المهمة الا ان متابعين القضية قالوا ان كلام اوكونور غير منطقي وتصيدوا ليه الاخطاء وقالوا انه الفريسة بتكون مسحوب من جسمها الدم تماما ومش بتنزف داخليا مثلاً .. وان مفيش اي اثار على اي فريسه لخربشات وغيره .. على الاقل لازم الفريسه تقاوم والحيوان يرغمها على الاستسلام فيجرحها بشكل من الاشكال لحد مايغرز انيابه ..

ولازال الموضوع لغز وملوش تفسير .. كيف لأسطورة ان تحافظ على بقائها دون دليل حتى يومنا هذا؟