مدائن صالح | مساكن الظالمين وصيحة العذاب
قصتنا تبدأ لما أرسل الله لشخص يدعى صالح من احدى القبائل العربية البائدة انه نبي .. وخليني اعرفك على القبيلة دي عشان تعرف الموضوع بدأ ازاي وانتهى ازاي
القبيلة متفرعه من اولاد سام ابن نبي الله نوح وكان اسمها المعروفين بيه وسط القبائل هو قبيلة ثمود واسمهم واخدينه من واحد من اجدادهم اسمه ثمود بن جاثر بن إرم بن سام بن نوح
كان معروف عنهم انهم قوم جاحدين ( يعني قساه واشداء )
وربنا رزقهم بنعم كتيره جدا ومهارات هما بس اللي اتميزوا بيها وسط القبائل وتفاخروا بيها زي انهم كانو شاطرين في البناء والتصميم وكانوا بينحتوا في الصخر يصنعوا بيوت ليهم وقصور عظيمه !
ولهم معارك قوية سجلت في التاريخ دليل على مدى عظمتهم زي نقوش بترجع لسرجون الآشوري اللي روت قصة حربهم ومعاركهم مع الآشوريين وانتهت حروبهم بهزيمتهم .. كمان ورد اسمهم في معبد اغريقي في شمال الحجاز واتذكروا في مؤلفات ارسطو وبطليموس
ولكن كعادة الانسان ، يشبع ويتنمرد .. تنمردوا على ربنا وعصوه واشركوا بيه وصنعوا اصنام وعبدوها !
وكان صالح واحد منهم ، ابن القبيلة المشهور بصدقه وعقله الكبير وتصرفاته الحكيمه وكان محبوب جدا جدا منهم ومعروف انه شخص كويس ولذلك كان اسمه " صالح من الصلاح "
ولما تيقن صالح بانه نبي من الله قرر يروح لكبار قبيلته والي كانو بيتجمعوا في مجلسهم دائماً يسهروا او ياخدوا قرارات سوا تخص قبيلتهم .
ودخل مجلسهم وقال لهم انه رافض عبادتهم وشركهم بالله
وقال ( يَا قَوْمِ اعْبُدُواْ اللّهَ مَا لَكُم مِّنْ إِلَـهٍ غَيْرُهُ)
" الهتكم ملهاش قيمه ، مش هتنفعكم ولا هتضركم، لكن اعبدو الله الواحد الاحد هو بس اللي هينفعكم ويضركم "
كانت صدمة من قبيلته يسمعو الكلام ده منه
وكان بين المجلس كبار القبيلة ، واللي اتفاجئوا من كلام صالح جدا وقالوله ( قَالُوا يَا صَالِحُ قَدْ كُنْتَ فِينَا مَرْجُوًّا قَبْلَ هَذَا أَتَنْهَانَا أَنْ نَعْبُدَ مَا يَعْبُدُ آَبَاؤُنَا وَإِنَّنَا لَفِي شَكٍّ مِمَّا تَدْعُونَا إِلَيْهِ مُرِيبٍ)
" انت ياصالح مش عايزنا نعبد آلهة اباؤنا؟ احنا محتارين ومصدومين جدا من اللي بتقوله .. ده انت معروف عنك انك صادق وحكيم ونقي ازاي تقول كلام زي ده"؟
وتحول نقاشهم لصالح عتاب شخصي
احنا كنا متعشمين فيك وفي اخلاقك لكن انت خذلتنا وخاب ظننا !
ليه بتقول كده!
وحاول صالح اقناعهم ولكن فضلوا يجادلو قصاده ، وقاله انه ساحر او مسحور ! وقالوله لو انت صادق اثبت صدقك ، احنا عايزين معجزه.. وكان صالح مستعد لطلبهم على أي حال فرد عليهم وقال :
( وَيَا قَوْمِ هَذِهِ نَاقَةُ اللَّهِ لَكُمْ آَيَةً فَذَرُوهَا تَأْكُلْ فِي أَرْضِ اللَّهِ وَلَا تَمَسُّوهَا بِسُوءٍ فَيَأْخُذَكُمْ عَذَابٌ قَرِيبٌ )
كانت معجزة صالح هي ناقة ! في زمن كانت الناقة اهم مخلوق بالنسبة لسكان الصحراء ، وسيلة نقل ولها فوائد غذائية وصحية وثروة كبيرة لهم
وفي ثواني اتولدت المعجزة قدام عيونهم ، ناقة ضخمه عملاقه ، هائله وعظيمه بتتولد قدام كبار قبيلة بحالها .. شقت صخر الجبل واتولدت ، بطريقة تجعلهم يتعجبوا خصوصاً انهم محترفين في الشق بصخور الجبال وصناعة البيوت فيها ، وعرفوا وادركوا انهم قصاد حدث عظيم وصادم
قال لهم صالح ان معجزته ناقة من الله ، لا حد يلمسها ولا يقرب منها .. سيبوها تاكل من الارض وتمشي براحتها ومحدش يأذيها وإلا حل عليكم غضب الله وليكم فيها خير عظيم !
معجزة الناقة منتهتش عند ولادتها من صخور الجبل .. ولكن كانت كل افعالها معجزات !
في يوم لاحظ اهل القبيلة ان الناقة راحت لبير واحد وابتعد عن طريقها جميع الحيوانات وشربت كل الماء الموجوده فيها ومسابتش للقبيلة قطرة ماء واحده وفرغت كل الابار التانيه.. فاغضب اهل القبيلة وقالوا لصالح فقال لهم يستنوا لليوم التالي
ولما نامو وصحيو لقو الناقة صدرها ممتلىء باللبن فحلبوها ، وشبعت عطش القبيله كلها حرفياً ! آلاف الرجال والنساء والاطفال
كان الموضوع واضح انها مش ناقة عادية وانها ناقة من الله ، وعاشت الناقة بين القبيلة ، وآمن منهم ناس كتير بالله وبصدق صالح وانه نبي من عند الله ، وصدقوه .. وغيرهم فضلوا على كفرهم وعندهم وتكذيبهم لصالح وزاد كرههم ليه ..
وده لأنهم طلبوا المعجزة عشان يعجزو صالح ويضعفوه ويثبتو كذبه قدام الناس مش عشان يأمنوا به وبكلامه ، لكن ربنا خذلهم بمعجزاته واثبت صدق صالح
وزاد كرههم لصالح فراحوا للمؤمنين به وقالولهم بسخرية
( أَتَعْلَمُونَ أَنَّ صَالِحًا مُّرْسَلٌ مِّن رَّبِّهِ ؟!)
فاجابهم المؤمنين ( إِنَّا بِمَا أُرْسِلَ بِهِ مُؤْمِنُونَ ) ر الرد ضايق الكفار واستكبروا وردوا بغضب واحتقار واستعلاء عليهم :
( قَالَ الَّذِينَ اسْتَكْبَرُواْ إِنَّا بِالَّذِيَ آمَنتُمْ بِهِ كَافِرُونَ. )
واتجمع الكافرين وكبارهم كلهم على كرههم لصالح وغضبهم منه ، وتحول غضبهم اثناء نقاشهم في مجلسهم على ناقة صالح وقرروا يتخلصوا منها ويعملوا مؤامرة عشان يذبحوها ويتخلصوا منها لان عدد المؤمنين بصالح زادوا بسببها وقالوا ان بعد مايذبحوها يقتلوا بعدها صالح ويخلصوا منه !
فقال من بينهم واحد : ولكن صالح حذرنا من اننا نمس بالناقة او نؤذيها ولو عملنا كده هيحل علينا عذاب عظيم !
ورد بسرعة عليه واحد من كبار المجلس قبل ما كلامه ياثر على باقي الحاضرين : اعرف من يجرأ على ذبح الناقة !
وكان اختيارهم على واحد من أشر الاشخاص في قبيلتهم وحددوا المعاد والمكان وطريقة التنفيذ .. ويوم التنفيذ جه وكانت في الليلة دي الناقة نايمة في مكان هادي وبعيد عن البشر
وقيل انه الشخص اللي اقدم على ذبحها شرب الخمر ووصفه القران الكريم بـ ( إذ انبعث اشقاها فكذبوه فعقروها وفي قوله فتعاطى فعقر)
وبالفعل قتلوا الناقة !
ولما عرف سيدنا صالح تاني يوم باللي حصل اتصدم وغضب جدا ، راح لمجلس الكفار بوقار شديد ووقف امامهم بقوة فصمتوا كلهم
ونظرات الشماته والسخرية في عيونهم ،وقال لهم :
" ألم أحذركم من ان تمسوا الناقة ؟ "
ضحكوا وقهقهوا ورد عليه كبيرهم بسخريه شديده :
قتلناها فأتنا بالعذاب واستعجله.. ألم تقل أنك من المرسلين؟
رد عليه نبي الله صالح بوقاره وثباته بدون ان يهتز من سخريتهم :
" تَمَتَّعُواْ فِي دَارِكُمْ ثَلاَثَةَ أَيَّامٍ ذَلِكَ وَعْدٌ غَيْرُ مَكْذُوبٍ "
وسابهم ومشي وجمع معه المؤمنين ورحلوا بسرعه عن القبيلة
ومرت ٣ ايام على الكفار بيضحكوا ويسخروا ويقولوا اين العذاب؟!
وفي فجر الليله الرابعة وفي سكون الليل .. انشقت السماء بصرخة جبارة واحدة هلكت بها كل شيء حي في المدينة ، صرخة واحدة قضت على الكفار وهما نايمين امنين في بيوتهم وصعقوا بيها وهلكوا قبل مايعرفوا ايه الي حصل !
( صورة حقيقية من مدائن صالح )
هلكوا ومتبقاش منهم غير اثارهم وبيوتهم وقصورهم خالده ليومنا في المملكة العربية السعودية ومعروفه بإسم مدائن صالح ، عبره للناس ودليل يشهد على قصتهم
وفي رواية عن عبدالله ابن عمر ، بيقول ان الناس نزلوا مع رسول الله محمد صلى الله عليه والسلام على الحجر ارض ثمود ، فشربوا من آبارهم وعجنوا بيه عجين عشان يأكلوا فالرسول امرهم انهم يرموا العجين اللي عجنوه والمياه اللي اخدوها من الآبار وميشربوش غير من البئر اللي شربت منه ناقة صالح
وقال لهم رسول الله :: ( لا تدخلوا مساكن الذين ظلموا أنفسهم إلاَّ أن تكونوا باكين حذراً أن يصيبكم مثل ما أصابهم ثم زجر فأسرع حتى خَلَّفها.)
يعني قالهم متدخلوش مساكن الي ظلموا نفسهم زي ثمود الا لو انتوا بتعيطوا وخاشعين من غضب الله وخايفين يصيبكم اللي صابهم ، ومكنش مرتاح وسرع خطواته لحد ماخرج من ارضهم ونهى تماماً انهم يبيتوا فيها .
مدائن صالح من الاماكن السياحية المهمة دلوقت في السعودية كانلي حظ في اني ازورها اثناء ماكنت عايشه في السعودية لسه
الحقيقة ان المكان مقبض جدا جدا ، مقبض من قبل ماتروحه او حتى تشوفه قدامك من بعيد ، افتكر كويس اني كنت حاسه بخنقه شديده من المكان لما دخلته رغم حبي الشديد للمعالم الاثرية
المكان كان ملغم بالطاقة السلبية ، اللي بتطاردك من اول ماتدخل لحد ماتطلع وتروح بيتك ، بتفضل حاسس بشيء من الخنقه
العماره رائعة ونحتهم في الجبال بدقه لا يصدق تماماً حاجه تقف قدامها متعجب وبتقول سبحان الله ، وبالتحديد في التفاصيل الداخلية لمساكنهم .
كنت دايما بلاحظ ان اغلب المساكن فيها الفتحات دي في جدارها الداخلي ومكنتش فاهمه ليه ، كنت بقول يمكن بيحطوا عليها اوانيهم لكن الوضع لما بتشوفه بعينك بيكون غريب وبيخليك تسرح
كنت طول الوقت اثناء زيارتي للمكان بحاول اتخيل ايه حصل في المكان ده ،عاشوا ازاي شكلهم كان ايه ، كانو بيستخدمو كل الحاجات دي في ايه
زيارتي لمدائن صالح ساب اثر سلبي على حياتي استشعرته جداً لمده كبيره بعد الزيارة و مش انا لوحدي واكدلي احساسي السكان المحليين في مدينة العلا اللي نصحونا كتير منروحش ونتفرج من بره لان شيء من الطاقة السلبيه هتطاردنا ، يمكن ده كان السبب في ان الرسول يسرع خطواته ليتخطى ارضهم ؟ الله اعلم حقيقي معنديش اي تفسير .
وبكده احنا خلصنا ، وانصحك لو مهتم بالقصة تفتح جوجل وتبحث عن مدائن صالح وتتأمل مساكنهم وتقرأ الآيات الي نزلت في القران عنهم ، اؤكدلك ان هيوصلك احساس غريب من مجرد الصور والايات ، مختلف عن اي حضارة او اي مكان تاني ممكن تشوفه
تعليقات
إرسال تعليق