حرب بن أمية | فارس قريش الذي قتلته الجن
نحن نصدق كل ماتراه أعيننا فقط .. ونختار لعقلنا ماهو مناسب لتصديقه
لكن هذا لا يعني اننا نبصر الحقيقة
_____________
ازاي رجل من أشهر رجال قريش في الجاهلية يُقتل على يد الجن؟
العنوان ممكن يكون صادم , لكن الصادم فعلاً ان قصة النهاردة اقرب للحقيقة من الخيال
لو فاتك موضوعي الاخير عن وادي شعراء الجن أنصحك تقرأه الاول وترجع تاني تكمل قصة النهاردة :
https://bit.ly/379UdEG
تعال أعرفك على بطل قصتنا واحكيلك الحكاية من الاول
حرب بن أمية بن عبد شمس الأموي القرشي الكناني
وهو والد الصحابي أبو سفيان و جد الصحابي معاوية
كان نسبه كبير وأصيل ومكانته عظيمه وسط اهل مكة وواحد من السادة الأشراف في قومه .. حرب كان من حنفاء مكة ومن أكابرها وكان مشهور بنفوذه ونسبه وشخصيته القوية والحربية وانجازاته اللي بيشهد له بها أهل مكة كلهم
وعشان تتخيل أكتر مدى عظمته وعظمة مكانته الإجتماعية وسط أهل مكة
فايهمك تعرف أنه كان قائد قبيلة كنانة في حرب الفجار أيام الجاهلية
وقبيلة كنانة كانت من أكبر وأعظم القبائل في الجاهلية وبينتمي لها كمان نسب سيدنا محمد عليه الصلاة والسلام .. وكانت حرب الفجار من أعظم الحروب وأشهرها في الجاهلية
وكانت بين قبيلة كنانة اللي منهم ( قريش ) وبين قبائل تُدعى قيس عيلان وهي كمان من اكبر القبائل بعد كنانة ووقعت خسائر كبيرة جدا بين القبيلتين في الارواح ولكنها انتهت بالصلح في النهاية ودفع دية القتلى
حرب كمان اتعرف هو وأهله بأنهم السبب في دخول كتابة اللغة العربية لمكة وانتشارها لأنه كان تاجر ورحالة وشاعر وعنده خبره واهتمامات كتيرة جداً
ولكن شهرة حرب بن أمية مجتش من كونه قائد حرب الفجار الكبيرة , ولا دخول الكتابة العربية لمكة وانتشارها .. ولا حتى كونه واحد من السادة الأشراف في مكة
شهرة حرب جت من بيت شعر غريب جدا بيتكلم عنه
يقول البيت " وقبر حرب بمكان قفر .. وليس قرب قبر حرب قبر"
أكدت معاجم العرب وأدباء الشعر في الجاهلية ان قائل البيت من " الجن " واستدلوا على ده بأن كبار الشعراء مقدروش ينشدوا البيت ثلاثة مرات بدون لعثمة ولا أخطاء في النطق حتى
ودي كانت طريقة الجن في إنشاد الشعر في الجاهلية عشان يميزوا أنفسهم عن البشر
ولكن .. ايه قصة البيت بالظبط وايه معناه؟
في يوم سافر حرب بن أمية مع مجموعة من بني قريش ومعهم جمالهم وقطعوا مسافة طويلة جداً في قلب الصحراء .. ووصلوا لوادي وقرروا يستريحوا فيه قبل مايكملوا طريقهم
وراح حرب يجمع سعف النخيل اليابس عشان يشعل فيه النيران ويتجمعوا حولها هو واصدقاءه
لكن النيران كانت بتشتعل بسرعة وبقوة وأصبحت نار عظيمة .. لدرجة ان الافاعي خرجت من جحورها عشان تهرب من النار اللي أشعلها حرب , ولكن واحدة من الأفاعي اتجهت لحرب واصدقاءه
و حرب مترددش ابداً في قتلها .. وأكملوا يومهم بشكل طبيعي وأكلوا وشربوا وارتاحوا .. وحل المساء .. فقرروا يكملوا رحلتهم وطريقهم
ولكن فجأة اعترض طريق حرب واصدقاءه سيدة بتحمل في ايدها عصى كبيرة وكانت غضبانه جداً .. لكن حرب واصدقاءه مكانوش فاهمين سبب غضبها الشديد
والشيء الوحيد اللي لفت انتباههم وقتها هو ان السيدة كانت بتضرب الارض بعصاها .. وفي كل مرة تضرب الارض .. الابل اللي معاهم كانت بتنفر وتخاف وبتحاول تهرب بشكل غريب
أول مرة ضربت الأرض .. هربت الابل وحاول الرجال السيطرة عليها
ولكن في المرة التانية .. هربت كل الابل وفقدوا سيطرتهم الكاملة عليها
واثناء انشغالهم مع الابل ومحاولتهم لإعادتها .. اختفت السيدة تماماً من قلب الصحراء كأنها سراب
لكن حرب مقدرش يسيب الموضوع يعدي بالسهولة دي .. وقرر هو واصحابه يبحثوا عن السيدة ويلاقوها عشان يفهموا ايه اللي حصل ,, وليه اصلا حصل ؟
واثناء رحلتهم في البحث لقوا خيمة واقف قصادها شيخ كبير في السن وجسمه هزيل جدا وشكله غريب , فعرف حرب واصدقاءه فوراً انه من الجن .. ولكنهم اتجهوا ليه على أي حال
وسلموا عليه وحكوله كل حاجه حصلت معاهم وطلبوا منه تفسير
فقال لهم الشيخ ان السيدة دي من الجن وانها غضبانه جداً لأنهم قتلوا أفعى .. والافعى دي كانت من الجن ولكنه متشكل في هيئة افعى .. والسيدة دي عايزه تنتقم من حرب بن أمية
ولكنه طمنهم وقال لحرب أنه لو شاف السيدة مرة تانية .. يقول بإسمك اللهم في وشها .. وهتنصرف فوراً من قدامه
حرب واصدقاءه كانوا مستغربين جداً من اللي حصل معاهم ومن كلام الشيخ .. لكنهم كملوا رحلتهم مرة تانية .. واثناء رحلتهم ظهرت السيدة مرة تانية غضبانه وبتضرب بعصاها الأرض
فقال حرب .. بإسمك اللهم .. فهربت السيدة واختفت .. واكملوا رحلتهم ولكن ظهرت للمرة التالتة .. فرجع حرب مرة تانية يقول بإسمك اللهم وهربت تاني .. وده كان شيء مطمئن جداً لحرب واصدقاءه ولكن الموضوع لسه منتهاش
الجن تربصوا بحرب بن أمية أثناء رحلته مع أصدقاءه .. وكانوا مصرين على الإنتقام
وبالفعل استنوا فرصة لقتله و هاجموه بنفس الأفعى اللي قتلها ..فمات حرب .. ودفنه اصدقاءه مكان ما اتقتل في قلب الصحراء .. لذلك كان قبر حرب بدون جار ولا صديق ولا أهل يترحموا عليه أو يزوروه
ويقول اصدقاء حرب وأهل قريش اللي مكانوش حاضرين حتى الحادث .. ان وقت مقتل حرب .. سمعوا نداء من الجن وكأنهم بيحتفلوا وفرحين بموته وكان النداء بيقول :" وقبر حرب بمكان قفر .. وليس قرب قبر حرب قبر"
ومعنى البيت ان حرب مات في مكان مقفر ( غير مأهول ولا زرع فيه ولا ماء ولا حياة )
وأنه مفيش جمب قبره أي قبر تاني ( أي انه مات لوحده وهيفضل لوحده )
دي الرواية المشهورة عن وفاة حرب بن أمية بين أهل قريش واللي بيؤكدها اصدقاءه اللي حضروا معاه كل تفاصيل الحادثة .. أما الروايات المذكورة في كتب المؤرخين بتقول ان حرب مات أثناء رحلته بين الطائف واليمامة في رحلة تجارية وسبب وفاته هو لدغة أفعى .. وبعض الروايات محددتش سبب وفاته واكتفوا بقول انه مات بعدما مرض فجأة في رحلته .. وحدد أصدقاءه موقع قبره في الصحراء.
قصة حرب بن أمية , قصة فعلاً غريبة وورد ذكرها بكل تفاصيلها في كتاب التعريف والإعلام للسهيلي بعد ماعرفه في الكتاب بأنه أول رجل يتلفظ بلفظ : بإسمك اللهم
تقدر تقرأ عن قصتة اكتر من إسلام ويب وتشوف المصادر والكتب اللي بتكلم عن قصته
https://bit.ly/3kyTTCu
معرفتنا المحدودة جداً بالعالم اللي بنعيش فيه بتخلينا اوقات صعب نصدق ونستوعب ان ده ممكن يكون حقيقي .. وبتخلينا نظن ان الكون بأكمله خلق للبشر وبنصدق كل اللي بنشوفه فقط .. لذلك نحن نرى.. ولكن لا نبصر.
تعليقات
إرسال تعليق