التسميات

السحر | الفرق بين المسحور والمريض النفسي

موضوع النهاردة اتطلب مني كذا مره بصراحه وكل مره كنت بحاول مخوضش فيه بسبب تضارب الاراء فيه والخلافات اللي عليه , لكن في بنوته جميله امبارح سألتني سؤال شجعني اعمل المقال ده وقولت ليه لا؟ 
" امتى اقول على شخص مسحور او مريض نفسي.. ايه الفرق بين الاتنين , وازاى وليه واحد مريض نفسي يتأثر بالقرآن لو إتقرأ عليه ؟ " 
صحيح سؤالها كويس , ازاى اعرف ان الانسان الى قدامى مش موهوم انه مسحور ومجرد مريض نفسي بيتدعي , واتاكد ازاى انى مش ظلماه وفعلاً مسحور ؟ طب الاول خلينا نتفق على حاجتين مهمين 
1 – الدجل والنصب هو السبب في ان الموضوع يبقى بالنسبة لناس كتير مجرد خرافة ومفيش حاجة اسمها سحر ومس وعين وفي ناس تانيه شايفة ان الكلام ده حقيقي بس مش بالصورة المبالغ فيها الى ساعات بنشوفها في افلام او برامج او حتى بتتحكيلنا .
2 – في ناس طبيعيه جداً لا مريضة نفسياً ولا غيره , ساعات كتير بتحاول تلفت النظر ليها من خلال تظاهرها بانها مسحوره او ممسوسه لأسباب مختلفة , زي قله الاهتمام من الاهل والقرايب او لهوسهم بالمواضيع دي واستسلامهم للفضول وحب التجربة او لأغراض تانية زي الشهرة , بمعنى اوضح
تصرفات البشر هي اللي شوهت الحقيقة وخلتها للبعض غير واضحة ولا تصدق, 
ايه اللي يثبت ان السحر موجود , 
وايه الدلائل العلمية والتاريخية والاثباتات على دة ؟ وايه موقف الدين منه ؟ 
ايه الفرق بينه وبين المرض النفسي , ازاى اعرف المسحور وافرق بينه وبين المريض .. 
كل ده هشرحه واحده واحده
أولاً " السحر في التاريخ " :
الإنسان من زمان جداً وعبر العصور كان يعرف السحر ومعترف بوجوده وفي كتابات مهمة بتتكلم عن السحر في قصائد هوميروس وكتابات قدماء المصريين الي ركزوا على استخدام ورق البردي في السحر , كمان كتابات بلاد فارس القديمة وخصوصاً كتابات رجال دين الزرادشتية عشان كده بيُعتقد ان كلمة سحر بالانجليزي " Magic " جت من افراد قبيلة ماجاي الميدية الي كانوا رجال الدين الرئيسيين في الديانة الزردشتية , وفي نقط تشابه كتير في الكتابات القديمة دى مثلاً :
- استعملوا كلمات اللي بتسمى " الكلمات السحرية " ودي كلمات بيعتقد إنها تقدر توجه الأرواح وتتحكم فيهم 
- استعملوا آلات موسيقية بدائية مصنوعة من الخشب وعملوا بيها اصوات متناغمة في الطقوس 
- استعملوا رموز وكتابات وشيفرات غريبة وغامضة عشان يحضروا بيها الارواح 
- استعملوا وسيط بين القوى الخفية والسحرة وكان الوسيط دة دايماً شخص بيعتقدوا انه يقدر يستقبل الرسائل من القوى الغير مرئية 
في العصور الوسطى كمان ألبرت الكبير او البرت ماجنس" " Albertus magnus جمع عدد كبير من التعويذات السحرية , وألبرت مكنش ساحر .. كان رجل دين مسيحي مهتم بعلم الخيمياء وكان غرضه الرئيسي البحث العلمي بس 
ومع بداية عصر النهضة والثورة الصناعية , التفسير العلمي طبعا لغى الخرافات والأساطير , بس الكيميائي البروسي " كارل رايخنباخ " سنه 1850 عمل تجربة على البرافين والفينول بمواد استعملها السحرة في طقوسهم زمان وكان بيسميهم القوة الغريبة او القوة الغامضة , واستخلص من التجربة ان في تدفق ايجابي وسلبي في المادتين وقدم نظريته بان في استعمالات تانيه مش معروفه للمواد دي غير المواد المتعارف عليها بس طبعاً نظريته معجبتش علماء عصره ومقبلوهاش , في القرن الـ 19 ومع موجة الإستعمار الأوروبي للشرق , العالم الغربي اتعرف بشكل اكبر على اساطير الشرق الغريبة وخصوصاً في الهند ومصر وبدأ حب الناس وولعهم بالسحر وطقوسه واتشكلت جماعات منظمة بتحاول تدرس السحر وسنه 1951 إتلغى قانون منع الشعوذة في بريطانيا , الى كان ساري المفعول من سنه 1401 , وإتأسست جماعة ويكا اللي افكارها عجب الهيبيين كمان السحر مختلف من ثقافة للتانية وكان معظم السحرة موجودين في جنوب الصحراء في افريقيا " مثال : قبائل البانتو " وكمان في أوروبا الحديثة من القرن الـ 14 لـ 19 كانوا شايفين ان السحرة بيعملوا مؤامرة شيطانية ضد المسيحية فطاردوهم وقتلوهم وخصوصاً في أوروبا الجرمانية
السحر كان في الحضارة البابلية والمصريين القدماء والهند وبلاد الإغريق ولحد النهاردة .!
ثانياً " رأي العلم في السحر " :
في قياسات علمية بتحدد اذا كانت " ظاهرة او طريقة او تحليل او اعتقاد معين " ينفع تصنيفة كعلم حقيقي او لا , ولو متجاوزتش شوية اختبارات فاهتتصنف بحاجة إسمها " العلوم الكاذبة " , .. ومثال صغير على القياسات اللي لازم تكون موجودة في العلم الحقيقي : 
- لازم يلاقوا نفس النتيجة او نتايج مقاربة لما يعملوا اختبار معين كذا مرة ولو ملقوش النتائج المقاربة في تكرار العملية خطوة معينة فالموضوع كله بيعتبر غير علمي ,, يعني ايه الكلام ده .. بشكل اوضح .. يعني لو جبنا كذا شخص مختلف في السن والنوع والحالة الاجتماعية والثقافية ونلقي عليهم تعويذة وملقيناش رد فعلهم واحد فالموضوع بيبوظ ويعتبر غير علمي 
المؤسسة الوطنية للعلوم حددت عشر مواضيع في المعتقدات وكان من بينهم معتقد السحرة وشايفينها معتقد زائف لغياب البراهين والدلائل الملموسة وشايفين ان الموضوع كله قائم على الصدفة او العوامل النفسية او الاجتماعية لكن علماء الباراسايكولوجي وهما علماء اكاديميين بيوافقوا جداً على وجود السحر والقوى الخفية ومؤمنين بوجود القوى الخارقة الغير مرئية ومن أشهرهم داريل بيم متخصص بعلم النفس الاجتماعي وحاصل على دكتوراه من جامعة ميشيغان وأكد بيم ان تجربة جانزفيلد دليل على ان الصدفة مش العامل الرئيسي لتفسير الظواهر دي
ثالثاً " رأي الأديان السماوية في السحر " :
الإسلام حرم السحر والشعوذة , والساحر بيعتبر كافر هو واللي صدقة ولجأ له , زي ماجه في سورة البقرة آية 102 "واتبعوا ما تتلوا الشياطين على ملك سليمان، وما كفر سليمان ولكن الشياطين كفروا يعلمون الناس السحر وما أنزل على الملكين ببابل هاروت وماروت، وما يعلمان من أحد حتى يقولا إنما نحن فتنة فلا تكفر، فيتعلمون منهما ما يفرقون به بين المرء وزوجه، وما هم بضارين به من أحد إلا بإذن الله، ويتعلمون ما يضرهم ولا ينفعهم، ولقد علموا لمن اشتراه ما له في الآخرة من خلاق، ولبئس ما شروا به أنفسهم لو كانوا يعلمون". 
كمان الديانة المسيحية واليهودية حرموا السحر , جه في " سفر الخروج 18-22 " لا تدع ساحرة تعيش " 
كمان بعض المؤرخين بيرجعوا جذور السحر في إطار ديني لفترة العصر الحجري الحديث والقديم .
طيب كده عرفنا رأي الأديان والتاريخ والعلم 
ازاى افرق بين المريض النفسي والمسحور ؟ 
الكلام ده نقلاً عن دكتورة " رقية محمد المحارب " ودي من أبرز الشخصيات الدعوية النسائية في المملكة العربية السعودية والخليج وحاصلة على ماجستير في الحديث وعلومة موضوع " دفع ايهام تعارض احاديث الأحكام " والدكتوراة في الحديث وعلومة موضوع الرسالة " شرح صحيح البخاري " إعرف عنها أكتر من ويكيبيديا 
السحر تأثير شخص على غيره بمساعدة الجن وليه انواع 
سحر هوائي : كل مايمر عليه الريح بيزيد السحر على المسحور ويقوى مفعوله ,, زي مثلاً ربط السحر على الشجرة 
سحر مائي : الساحر بيرمي السحر في البحر , وغواضين كتير طلعوا من البحر والانهار والابار حاجات بتدل على السحر وكلنا عارفين اللي اتعمل في الرسول صلى الله عليه وسلم من السحر وازاى اترمى السحر في البئر وكان بيتهيئ له انه عمل حاجات وهو معملهاش وكان بيشتكي من راسه لحد مارقاه جبريل عليه السلام 
السحر الناري : بيتحط جمب اى نار والعه , وده خطر جداً وتأثيرة شديد على المسحور , فبيحس بحرقة كبيرة
سحر ترابي : بيتحط في التراب او يتدفن فيه زي السحر اللي بيتدفن فى المقابر 
وساعات كتير بيحطوا السحر في اماكن الانسان ميقدرش يوصلها بسهوله 
كمان السحر ليه انواع تانية زي :
المأكول والمشروب : وده من اشد انواع السحر ودائم المفعول 
- اللي بيترش في البيوت 
- اللي بيختلط في الطين 
- ومنه المعقود : وده اتذكر فيه القرآن الكريم " النفاثات في العقد " بتبقى عقد وبينفخوا فيها بطرقهم 
- ومنه اللى بيتاخد على شكل أثر , شعر او ظوافر أو حته من لبس , او اكرمكم الله " دم الحيض والمني " ويخلط الأثر في بعضه ويتعقد ويتكتب عليها بالطلاسم ويخبوها في اماكن صعب الوصول ليها 
- المنثور : بيترش على الباب وده اتشهر جداً بقصص الخادمات اللى بيرشوه قدام عتبه باب الناس اللي شغالين عندهم لو اذوهم 
- المنشور : وغالباً بيكون فيه نجاسات وبيترش على اعتاب البيوت 
- المكتوب في ورقة او جلد او على لبس : وفي الغالب بنلاقي فيها اسماء وحروف او مربعات ومنها بيكون فيها والعياذ بالله اسماء ربنا وحواليها طلاسم وكمان سورة ياسين , وكتير جدا جداً بيستخدموها في الكتابات وحواليها طلاسمهم , واختيارهم للسورة دي بالذات لأنها اكتر سورة بتأذيهم
اطراف السحر عددهم خمسه , 
1 – المسحور : وده الضحية للأسف
2- ساحر الجن : وده جن سريع التنقل من مكان لمكان وعنده قدرة كبيرة على التخفي ومنه المسلم ومنه الكافرالمسؤل عن اذيه الضحيه 
3 – التابع الراصد : وده اللي بيثبت الجني اللي فات عشان ميتراجعش عن مهمته في اذيه الشخص 
4 – شيطان السحر : في نوعين من الشياطين , شيطان بيوسوس وده مش بيؤذي الانسان بشكل مباشر بيوسوس له بس , والتاني شيطان السحر وده اللي بيؤذي الانسان 
5 – طالب السحر : وده الشخص الي طلب السحر نفسه سواء لنفسه او لغيره بنفع او ضرر 
ازاي تعرف بقى الساحر ؟ 
الساحر بيعمل شوية حاجات لازم تنتبه لها 
بيسأل الضحية عن اسمه واسم امه , وبياخد اثر من الشخص اللي عايز يسحرله 
بيطلب حيوانات بصفات معينه , زي ديك أعور مثلاً " وعلى سبيل التريقة بطريق حزين "  
بيكتب طلاسم مش مفهومه او بينطق طلاسم بيبان ليك كلام غريب 
بيقرأ القرآن وهو نايم على جنابه , بيدي الشخص حجاب مرسوم عليه مربعات , بيطلب منه ميلمسش المية لمدة معينة 
ممكن يمنعه من الصلاة كمان , ويديه ورق ويطلب منه يحرقها او يتبخر بيها 
ايه احساس المسحور وايه تاثير السحر على الانسان ؟ : 
المسحور بيحس انه شايف او سامع حاجات بتطارده طول يومه او بتخوفه ودايماً بيشوف حاجات بتتحرك , وده في بدايه الموضوع بس .. لأن الجني مبيدخلش للإنسان الا في الخوف بس , فلما بيتمكن من خوف الانسان بيقدر يسيطر , عشان كدة لازم لما الانسان يخاف .. يقول " بسم الله " والموضوع بيكون سيء جداً لما السحر بيكون تأثيرة جوه الجسم , وخصوصاً شيطان السحر .. لأنه شيطان مُكلف وبيعمل اللي أمر به 
ايه المده اللي بيؤثر بيها السحر على المسحور ؟ 
في ناس محصنيين , بيجيلهم الجن او الشيطان وميقدرش يدخلهم او يؤذيهم فابيرجع للي سلطه , والمدة الزمنية اللى بيفضل فيها الجني جوه جسم الانسان بتتحدد بحاجات معينة : 
- الموضوع بيتوقف على خبره الساحر نفسه 
- والفترة اللي بيتفق عليها طالب السحر والساحر 
- ويضمنوا ان مادة السحر نفسها زي اللي ذكرتها من شوية مباظتش او متلفتش , عشان كده اتعرف ان الحجاب او السحر بيكون مغلف او ملفوف في قماش أو أو .. 
ايه اعراض السحر بقى ؟؟!
الدكتور اشارت ان الاعراض اللي بتظهر على المسحور متشابهة تقريباً مع المرض النفسي بس بشكل أكبر وملحوظ 
وقالت ان الفرق بين الاتنين ان المرض النفسي انفعالات لكن لو الانفعالات دي اتبالغ فيها فهي على طول بشكل مباشر سحر او مس شيطاني 
طب نوضح اكتر , الدكتورة قالت ايه : 
بيحصل تغيير مفاجئ في طباع الشخص من الحب للكراهية ومن الصحة للمرض ومن العبادة للمعصية ومن الفرح للحزن والضيق ومن الهدوء للغضب 
المسحور في الغالب بيتعصب بسرعة وبينفعل بطريقة خارجه عن الطبيعي او المعتاد 
وبيبان عليه اعراض الغضب والضيق والحالة السيئة لما حد يقرأ قرآن او هو شخصياً يقرأ قرآن " يعني مش معنى انه مسحور انه ميمسكش المصحف " 
بيحس ان في حاجه بتخليه يقول كلام ويعمل حاجات ميقصدهاش ويرجع يندم عليها , آلام في الأرحام أو أسفل الضهر , بيحس بتقل عند كتافة لو في قرآن شغل جمبه او هو بيقرأ 
بيحس بتنميل كامل في جسمه وهو بيقرأ قرآن او وهو بيسمعها , بيحس بانه عايز اكرمكم الله " يرجع " بس مش عارف , وألم شديد في الأماكن اللى السحر قاصد يضره فيها , بيحس انه عايز يخش الحمام " يتبول " أو لأى سبب حتى لو تافه لما يسمع رقية شرعية , وده طبعاً من فعل الشيطان لأنه بيستقوى من الحمام 
وكمان اضافت الدكتورة رقية ان من العلامات المميزة الى بتظهر على المسحور وقت قراءة القرآن , عينه ترف , ايديه تترعش بشكل واضح .. وعينيه كلها تبان " دائرية " وقت القراءة عليه قرآن او رقية .. بيلاحظ في عين المسحور كمان بريق بزيادة وغالبا تلاقيه مش عارف يركز على عين الراقي وهو بيرقي , فيبص للأرض او للسقف , بتخرج ريحة وحشة من بوقه او جلده رأسه او من الأرحام , وعموما الريحة دي بيشمها المريض وغيره ومهما استحمى او حاول ينضف نفسه من الريحه مبتروحش او بتيجي في اليوم اللى بعده لما جسمه يعرق , وده بيحصل فى حالات معينه زي حالات السحر المأكول والمشروب ومش في كل الحالات , وغالباً بتكون رده فعل المسحور انه بيرجع مادة تقيله زي الزبدة او شبهها وفيها دم , او يسعل سعال قوي 
المسحور كمان غالباً بيلاقي تقل غريب في اطراف معينه في جسمه او وخز زي وخز الإبر , ودي حاجه كويسة لأن ده معناه ان السحر بدأ يخرج
وكملت الدكتورة رقية في محاضرتها كلامها وقالت " ان في احيان كتير لما السحر بيستخرج بيسيب علامات في بطن رجل المسحور او اطراف الصوابع او يظهر عليه طفح جلدي او كدمات عشان كدة لازم الراقي يلاحظ الحاجات دي " وكمان نبهت ان المسحور ساعات مبيقدرش يقعد وقت الرقية 
وقالت ان المسحور والمحسود في اعراض بيشتركوا فيها : 
الضيق والضجر وهما بيسمعوا قرآن 
بيعيطوا بشكل هيستيري بدون سبب والمريض نفسه بيستغرب نفسه , يستسلموا للنوم , بيحصل انتفاخات في وشه او بطنه , بتحصل تشنجات في الاطراف والعينين , مبيبقاش في استجابة للقراءة والعلاج بسرعة , ساعات وقت الرقية المسحور يبص للراقي بسخرية ويضحك من غير قصد .
رأي المستشار النفسي الدكتور / محمد عبد العليم في اجابته على مريض بالوسواس القهري وسؤال المريض كان " ما الفرق بين المرض النفسي والمس الشيطاني والسحر؟ وهل دواء Athimyl جيد للوسواس القهري؟ وما هو خير دواء للوسواس القهري؟ وما طريقة استعماله؟
المرض النفسي هو حالة يصاب بها الانسان وقد تظهر في شكل قلق أو توتر او اكتئاب او مخاوف او وساوس , وهو يختلف عن المرض العقلي الذي يفتقد فيه الانسان بصيرته وتضطرب افكاره وتصرفاته والمرض النفسي ناتج عن عوامل وراثية او تغيرات في الشخصية او نسبة لضغوط حياتية , اما المس الشيطاني فلا يعلم كيفيته الا الله تعالى وعليك بالرجوع لآية الربا وسوف يفيدك أحد المشايخ الأفاضل بتفصيل عن المس الشيطاني والسحر والذي أود أن أؤكده لك أنه لا علاقه له بالمرض النفسي وأرجو ان لا يخلط بين الاثنين فالمرض النفسي هو مرض طبي ومايهمنا في المس الشيطاني هو ان يتحصن الانسان منه بما ورد في السنة المطهرة وهذا يكفي لا يمكن التفريق بين الأمراض النفسية والسحر لأن أعراضهما تتشابه كثيرا لكن نحن كأطباء نفسيين نستطيع معرفة المتدعي من المريض الحقيقي بالسحر .
****
كتب تحدثت عن السحر :
كتاب القانون لآليستر كراولي
قام آليستر كراولي بكتابة هذا المؤلف في القاهرة عام 1904 ويحوي على 3 فصول وحسب كراولي فإن كل فصل تم كتابته في ساعة واحدة. زعم كراولي أن الشخص أو الشيء أو المخلوق الذي أملى عليه الكتاب كان "نفسه الخفية" وكان اسمه أيواس. يسمى التعاليم الموجودة في الكتاب باسم ثيليما ويمكن إيجازها بهذه المبادئ
إدراك النفس الحقيقية والإرادة الفريدة لشخص ما كفيل "بالاتحاد مع الكل"
يمكن الوصول لهذا الإدراك بواسطة بعض الطقوس.
من هذه الطقوس: اليوغا، استحضار الأرواح، طقس العشاء الأخير للمسيح، قراءة كتاب الكبالاه الذي يعتبر روح التوراة، قراءة الطالع، التنجيم
فهم رموز شجرة الحياة التي هي عبارة عن أعداد أو أرقام متصلة ببعضها عن طريق 22 ارتباط خطي، الأعداد تمثل الكواكب وخطوط الارتباط هي رموز الأبجدية العبرية والتي تقسم بدورها إلى سبعة كواكب و12 برجا.
إتباع هذه المبادئ سوف يؤدي حسب معتقدات أتباع ثيليما إلى حالة التيقظ الشبيهة بالنيرفانا في البوذية واكتشاف النفس الخفية. "النفس الخفية" بإمكانها مغادرة الجسد والانتقال عبر الأثير وعبور "بحيرة الفراغ" وهي أساس السحر والهدف الرئيسي من الممارسات المذكورة أعلاه حيث أن بإمكان هذه النفس الخفية أو مايسمى أيضًا من قبل كراولي "الجسد الضوئي" إنجاز أعمال تخرق قوانين الفيزياء مثل إزالة قوى غير مرغوبة وتحضير أرواح
من الجدير بالذكر أن كراولي البريطاني المولد كان يلقب من قبل الصحافة "الرجل الشرير" وتم طرده من إيطاليا عندما حاول أن يشكل تنظيمه الخاص ومات مفلسا نتيجة التهاب الرئتين وإدمانه على الأفيون
كتاب شمس المعارف الكبرى
- أشهر كتاب معروف لدى أغلب الذين يمارسون السحر هو كتاب شمس المعارف الكبرى لأحمد بن علي البوني والذي منه نسختان الأولى وهي الأصلية وتعود إلى 200 سنة خلت، والثانية معدلة حيث تم حذف بعض الصفحات منها وإضافة صفحات أخرى. وهذا الكتاب ممنوع في كل الدول العربية ماعدامصر. ويحتوى على مصطلحات ومفاهيم تتعلق بالسحر والشعوذة ومن ضمنها مصطلحات لتحضير الجن، ومصطلحات تتعلق بالنجوم والأبراج والكواكب والقمر وحركة القمر..الخ وتوجد في الكتاب بعض التطبيقات ورسومات تتعلق بتنفيذ أوامر الشعوذة والسحر.
*****
بصراحة الموضوع مليان كلام كتير , بس حاولت على قد ماقدر اجمع الكلام من جهات موثوق فيها جداً 
عشان ميحصلش لبس فى الموضوع واحط معلومة غلط او كلمة غلط .. كالعادة هقولكم مقدرش انكر معلومة او انفيها انا مجرد بنقل الاراء بشكل بسيط ومختصر .. والرأي لكم والحقيقة عند الله 
سؤالي ليكم : شفت شخص مسحور قبل كده ؟ جربت تحضر جلسات علاج ؟ ايه رأيك في الموضوع بشكل عام ؟
*** 
أنا مقدرتش اجمع كل الإجابات للأسئلة الشائعة فى المقال لأنهم كتير جدا جدا , فاياريت أى حد عنده استفسار عن حاجة معينة يعرفنى فى الكومنتات وان شاء الله هجيبله الاجابة بالمصدر
مصادر :


التسميات:

تعليقات

إرسال تعليق

المشاركات الشائعة