التسميات

بحر الشيطان | مثلث التنين - الجزء الأول

المقال ده هسميه " عرش الشيطان "
كلنا عارفين موضوع مثلث برمودا , بس نشرحه بسرعة للناس اللي مسمعتش عنه قبل كده او متعمقتش في قرايته 
مثلث برمودا حسب ويكيبيديا بالإنجليزي اسمه " Bermuda triangle " وكمان بيسموه " مثلث الشيطان "
عباره عن منطقة على شكل مثلث متساوي الأضلاع مساحته حوالي مليون كيلومتر مربع وكل ضلع حوالي 1500 كيلومتر
موجود في المحيط الأطلسي بين برمودا وبورتوريكو وفورت لودرديل في فلوريدا ,
مشهور بسبب مقالات وأبحاث نشرها مؤلفين كتير فى منتصف القرن العشرين
بيتكلموا فيها عن مخاطر المنطقة دي وحالات اختفاء كتيره حصلت فيها 
بس إحصاءات خفر السواحل للولايات المتحدة مبتشيرش لحالات اختفاء لسفن وطيارات في المنطقة دي اكتر من أي منطقة تانيه ,
في وثائقيات كتير اتعملت واتعرض منها على ناشونال جيوغرافيك أبو ظبي
بتأكد زيف كلام كتير اتقال عن مثلث برمودا وفي تقارير كتير اتراجعت بسبب نشرها لأحداث بشكل خاطئ
وفي وكالات رسمية كتير اعترفت بأن عدد وطبيعة الاختفاءات في مثلث برمودا كانت زيها زي غيرها في باقي المحيط في حوادث كتير حصلت في منطقة مثلث برمودا
وأشهرهم 
- ثيودوسيا بور ألستون ابنه نائب رئيس الولايات المتحدة 
آرون بور واختفائها على سفينة باتريوت اللي اختفت بعد دخولها منطقة مثلث برمودا
- السفينة ماري سيلست لقوها مهجورة قرب ساحل البرتغال 
عند مضيق جبل طارق والطاقم بتاعها كان معروف بقدرته على الابحار وخبرتهم العالية
بس السفينة اختفت بعد كده لما ظهرت السفينه فى المنطقة دى لقوا فيها مؤون اكل ومية تكفيهم ست شهور
وشحنة السفينة محدش لمسها ولسه في مكانها يعني كل حاجة سليمة الا الركاب مش موجودين ومفيش أي اثر لجثث حتى
- إلين أوستين سفينة مهجورة وكان عليها طاقم حاولوا يبحروا بيها في 1881 ووفقاً للقصص اختفت السفينة بس ظهرت تاني من غير الطاقم واختفت تاني بطاقم جديد فاز بيها كجائزة ليهم واثبت التحقيق من سجلات لويدز لندن وجود سفينة اسمها ميتا اتبنت في 1854 وعادوا تسميتها من ميتا لـ إلين اوستين ومفيش قوائم لضحايا السفينة دي أو أي سفينه فى الوقت ده
- دييرنغ ,, كارول ديرنغ مركب شراعية اتبنت سنه 1919 وأبحرت في 20 مارس 1920 في مهمة نقل فحم من نورفولك لـ ريو دي جانيرو , وفي أواخر أغسطس قبطان السفينة حس انه تعبان فاضطر يرسو في ميناء لويس في ولاية ديلاوير وساعتها عينت شركة " دييرنغ " كابتن عنده 66 سنه اسمه وورميل , والسفينة أبحرت تاني لـ ريو ووصلت هناك من غير أي حوادث او مشاكل , السفينة مشيت من ريو في 2 ديسمبر 1920 , وكانت اخر مرة ظهرت فيها السفينة في 28 يناير 1921 , شافتها سفينة ضوئية عند كيب لوك اوك في كارولاينا الشمالية وكان قائد السفينة الضوئية كابتن جاكوبسون ذكر ان كان في راجل شعره أحمر قاله بلكنه أجنبيه ان السفينه فقدت مراسيها , وجاكوبسون دون الملحوظة ولما حاول يبعتها بإشاره راديو , الجهاز فشل في بعتها ولاحظ وجود طاقم السفينه في منطقة الأمامية من السفينه , المنطقة دي غير مسموح بالتواجد فيها , وبعد كده إختفت السفينه .. بعدها لقوها مهجورة في 31 يناير 1921 في دياموند شولز جمب كيب هاتيراس في كارولاينا الشمالية اللي مشهورة جداً بحطام السفن الموجوده فيها , والإشاعات انتشرت على سفينة دييرنغ وانها كانت ضحية القرصنة , وحاجة مهمة كمان .. لقوا في السفينة اكل مطبوخ ومتحضر ليوم تاني
- يو إس إس سيكلوبس , خلال الحرب العالمية الأولى حصلت حادثة تعتبر أكتر الحوادث ضياعاً للأرواح في تاريخ الولايات المتحدة البحري .. لما فقدت يو إس إس سيكلوبس 'USS Cyclops'، كانت بقيادة قائد ملازم جورج ورلي ومكنش ليها أي اثر وكان على متنها طاقم من 309 شخص بعد مامشيت من جزيرة بربادوس في 4 مارس 1918 على الرغم من عدم وجود أي دليل قوي في أي نظرية بس كان في نظريات كتير بتدور على تفسير لاختفاء السفينة , في ناس اعتقدت ان السبب عاصفة قوية , وناس تانية قالوا غرقت وناس قالت الأعداء هما السبب
ده غير طبعا حوادث تانية كتير ألصقت لمثلث برمودا زي الرحلة 19 وجي أيه إتش إن بي " نجمة النمر " وجي أيه جي أر إي " نجمة أرييل " ودوغلاس دي سي وكي سي 135 .. ده غير سفينة تايتنك .., في مؤلفين كتير قرروا يفسروا التفسيرات غير الطبيعية , زي مثلاً .. ربطوا جزيرة اطلانتس بمثلث برمودا , بعد مالقوا صخور مشكلة على شكل طريق تحت البحر اسمه شارع بيميني في جزيرة بيميني عند جزر البهامالتي , ومؤلفين تانيين ربطوا مثلث برمودا بالأطباق الطائرة وإستخدم الفكرة دي " سيفن سبيلبرغ " في فيلم " الخيال العلمي لقاءات قريبة من النوع الثالث " بيحكي قصة ضياع الطائرة 19 واختطافهم من مخلوقات فضائية 
تشارلز بيرليتز ألف كتب كتير عن الظواهر فوق الطبيعية , وسجل نظريات كتير بتربط الخسائر في المثلث بقوات لا تفسير لها , اما التفسيرات الطبيعية اللى لجأ لها مؤلفين وعلماء وباحثين , أخطاء البوصلة .. قالوا ان ممكن خطأ البوصلة يكون من مسببات الحوادث في المثلث , وناس تانيه افترضوا نظرية ان في طاقة مش عادية من القوة مغناطيسية في المنطقة دي ..بس كلهم بردوا حسوا بحاجة غامضة في تغير البوصلة ناس تانيه قالت ممكن السبب يرجع للموج المدمر او العواصف الاستوائية او هيدرات الميثان او او او .. لكن التفسير والدليل القاطع لسبب اختفاء السفن والحوادث دي مش موجود لحد النهاردة مش عايزة ادخل فى تفاصيل اكتر عن مثلث برمودا, ومقدرش اثبت فى مقالي معلومه او انفيها ,, انا بس بنقل المعلومات والابحاث بشكل مبسط ومختصر 
طيب انا هتكلم عن أخ مثلث برمودا 
" برموزا او مثلث التنين او بحر الشيطان او مثلث برمودا الهادي " 
هختار مثلث التنين ونبدأ شرح
هو إمتداد مائي كبير في اليابان موجود في المحيط الهادي حوالين جزيرة مياكي اليابانية وعلى بعد 100 كيلومتر جنوب طوكيو , ودي منطقة موجوده بين هونغ كونغ والفلبين وتايوان واليابان , وبيقولوا ان آلاف السفن اختفت فيه .
طب نتكلم من ناحية جغرافية , بيمتد ضلعة الأكبر من جزيرة يوكوهاما اليابانية شمالاً على جزيرة جوام الفلبينية جنوباً وبيمر بجزيرة أيوجيما , بيمتد ضلعة الصغير من جزيرة جوام جنوباً على مجموعة من الجزر الصغيرة معروفة بإسم جزر مارينا شمالاً , والضلع الثالث بيمتد من جزر مارينا جنوياً لحد جزيرة يوكوهاما شمالاً , حم ومساحة المنطقة بيختلف من تقرير للتاني , بس آخر تقرير أعتمد كان سنة 1950 , أشار ان المنطقة الخطيرة تبدأ من على بعد 70 ميل يعني حوالي 110 كم من الساحل الشرقي الياباني
-* طب ايه سبب التسمية ؟ ..
تسميته بيرجع لأكتر من 3 آلاف سنة .. يعني عمره وشهرته ممكن يكونوا بدأوا قبل ماحد يبحر في المحيط الأطلنطي اصلا , كمان في الاساطير موجود واتذكر في الكتب الصينية واليابانية وفي التبت 
وفي باحثين قالوا ان عمر الاسطورة دي بترجع لمملكة سانج SUNG ويوان YUAN الصينية القديمة 
وفي اسطورة قديمة بيرجع تاريخها لـ 900 سنة قبل الميلاد ذكرت ان في تنين عايش في المنطقة دي فى البحر جوة قصر تحت جزيرة 
صغيرة في مقاطعة كيانجسو KIANGSU بيخرج من وقت للتاني عشان يهاجم السفن ده غير ان في اساطير وروايات تانيه ذكرت انهم بيسمعوا اصوات وبيشوفوا نور من المنطقة دي وكانت واضحة جداً في الايام اللي مكنش فيها رياح
-* مثلث التنين اخطر من مثلث برمودا وخطورته تفوقه 100 مرة
الاحصاءات الرسمية في وقتنا الحاضر بتؤكد خطورة المنطقة من خلال تسجيل عدد حالات الاختفاء الي بتحصل فيها واللي فاق عددها حالات الاختفاء في منطقة مثلث برمودا " رأيي الشخصي , اللي أنكره الباحثين في مثلث برمودا واللي اقترحه الباحثين في تفسير الحوادث هناك , بيطبق بحذافيرة بمنتهى الدقة وبشكل أكبر في منطقة مثلث التنين " 
الرياح في المنطقة دي من أعنف الرياح في العالم وشواطئة بتتميز بنشاط زلزالي حاد , ومثلث التنين تحديداً موود في منطقة بيسموها " حلقة النار " وبتمتد من السواحل الغربية للأمريكيتين عبر ألاسكا لـ الساحل الشرقي لآسيا وجنوباً لـ أندونيسيا والمعروفة بنشاطها الزلزالي الحاد الي بيجي من باطن أعماقها وبينعكس ده على البحر اللي بتبان مخيفة للبحارين 
رغم خطورة مثلث التنين إلا أنه مخدش شهرة مثلث برمودا فى العالم , وده بيرجع ببساطة لأن موقع مثلث برمودا قريب من الولايات المتحدة الامريكية اللى بيتابع اخبارها كل دول العالم بعكس اليابان ودول الشرق الأقصى 
الإعلام مكنش مهتم بالمنطقة دي يمكن بسبب بعد اليابان وقله استخدام اللغة اليابانية على الصعيد العالمي بردو
في صحف كتبت عن المثلث ده زي صحيفة أساهي اليابانية لكن للأسف الكتابات دي ملقتش الاهتمام في العالم الغربي حتى بمساعدة وكالة رويترز الي نشرت شوية تقارير حوالين اختفاء سفن وطيارات في المنطقة دي ..
وكان في تصريحات من وزراء وحراس في الحكومة اليابانية زي تصريح رئيس قوات حرس الحدود اليابانية " إن منطقة فرموزا اللي جمب اليابان وسواحل الفلبين بتتميز بإختلال قوى الجاذبية فيها زيها زي منطقة برمودا , وعشان كده حذروا السفن والقوارب اللي بتمر في المنطقة دي بإنهم ياخدوا كل الاحتياطات وينتبهوا كويس
-* في حوادث كتير فضل اثارها موجود لحد النهاردة
وعلامات الاستفهام حواليها كتيرة جداً , دي حبة حوادث بتؤكد غرابة وخطورة المنطقة :
- السفينة البحرية اليابانية " جويتا " غرقت , وبعد بحث طويل وشاق عنها لقوها على مسافة حوالي 500 ميل عن مكان غرقها !
- في سنة 1913 , غرقت السفينة الإنجليزية " الجونار " وانقذوا طاقمها بسفينة عابرة , وبعد مرور حوالي سنتين لقوها في قاع جزيرة بعيد عن مكان غرقها بحوالي 2000 ميل !
- في سنة 1939 , بعد ما اقلعت طائرة حربية بتلات ساعات من مطار " سان دييجو " في الولايات المتحدة .. ووقت ماكانت طايرة فوق منطقة مثلث التنين , قائد الطيارة بعت رسالة للقاعدة الجوية قال فيها .. ان الرحلة بتتعرض لظروف قاسية في الطيران , وإتقطع الإتصال فجأه بين الطيارة والقاعدة .. وبعدها بشوية الطيارة رجعت للمطار , جري حواليها رجال الإغاثة وفتحوا باب الطيارة , بس الصدمة كانت هنا .. لقوا ان طاقم الطيارة اللي عددهم 12 كلهم ماتوا ماعدى سواق الطيارة الى قاوم الاصابات الي اتعرضلها جسمه .. بس بعدها بدقايق مات هو كمان .. وكانت إصابة طاقم الطيارة اللي اتسببت في موتهم عبارة عن حفر في الصدر وتلوث شديد في الجلد .. وكان جوة الطيارة ريحة كبريت عفنة جداً مش معروف مصدرها !
- سنة 1952 , اختفت ناقلة البترول الضخمة " كايو مارو رقم 5 " في مثلث التنين في ظروف ملاحية كويسة , والغريب ان الناقلة كانت بتنقل عليها فوق 150 طن من البترول , ورغم كدة مظهرش على سطح المية أي اثر للبترول , والاغرب من ده كمان ان أجهزة اللاسلكي في الناقلة كانت شغاله بشكل كويس وكانت على اتصال مباشر بالقاعدة قبل ماتختفي بوقت قصير جداً .. وبعد عمليات البحث لقوا خمس براميل بترول فاضية بس , من غير أي اثر للناقلة او الطاقم !
- في 19 مارس 1957 , اختفت طيارة رئيس الفلبين وقتها , الرئيس " رامون ماجاي " وكان على متنها 24 راكب , وملقولهاش أي اثر !
- في 5 يناير 1970 , حصل حاجه غريبة للسفينة الليبيرية " صوفيا باباس " في جنوب شرق ميناء طوكيو , السفينة فجأة اتقسمت نصين , وبعد ما المهندسين فحصوا السفينة ومستدلوش من الفحص على سبب الانقسام !!
- في 16 يوليو 1971 , اختفت الطيارة " كاوازاكي " فوق مثلث التنين , وكانت الطيارة دي حديثة الطراز ومضادة للغواصات ومزودة بجهاز رادار على أعلى مستوى وأجهزة إنذار حديثة , وبرغم حداثتها وتطورها التكنولوجي , الطيارة مبعتتش أي رسالة استغاثة قبل ماتختفي فجأة !
- في 14 مارس 1986 اختفت السفينة " ماسجوسار " وقبل ماتختفي حصل حاجة غريبة ,, شافوها البحارين وسط مية مثلث التنين وهي متحاصرة من موجات مثلثة الشكل وبعد كده النار ولعت فيها فجأة من غير أي سبب واضح , مع العلم انها مكانتش شايلة أي مواد قابلة للاشتعال !
- * مشاهدات غريبة ومحيرة حدثت فى المنطقة ولم يد لها العلم أي تفسير وزادت من مخاوف البحارة :
- في سنة 1987 كانت السفينة الفلبينية " لا كارلوتا " في رحلة عبر مثلث التنين , وفجأة السفينة ولعت نار من غير أي سبب وهي مش شايله أي مواد قابلة للاشتعال ولما كان البحارة مشغولين فى انهم يطفوا النار في طرف السفينة اتفاجئوا بان النار ولعت الناحية التانية من طرف السفينة التاني , والبحارة معرفوش يطقوا النار وواجهوا صعوبة في السيطرة عليها , لكن فجأة شافوا النار بتتلاشى بالتدريج لحد ماتطفت تماماً , والسفينة لسه موجودة في مانيلا في الفلبين بعد ماشوهتها النار وبعد فشل العلماء والباحثين في كشف السبب ورا انها ولعت لوحدها , ولأن الشركة مقدرتش تبيعها او تستخدمها تاني !
- البحارة والصيادين اللي بيبحروا دايما حوالين مثلث التنين شاع بينهم قصة عن سفن اشباح بتظهر في المنطقة من وقت للتاني وتختفى فجأة ووقت ظهورها واختفاءها بيصادفة اختفاء سفينة او قارب في نفس المنطقة الى كانت فيها , ويكون اختفاء السفن دي اما للأبد او ظهورها في مكان بعيد جداً عن المكان اللي اختفت فيه وطاقمها مش موجود !
خلوني اتقل عليكم حبة كمان , وأقولكم قصة صغيرة 
سنة 1977 استلمت الصحف البريطانية اكتر من 800 رسالة اصحابها بيشتكوا من طنين " او ازيز " بيتسمع في كل مكان , كل الرسائل كانت جاية من شمال شرق انجلترا , والظاهرة دي استمرت لمدة سنتين بعد كدة انتهت فجأة , بس رجعت تاني تظهر في مدينة تاوس في ولاية نيومكسيكو !!؟
ظهر الطنين في بداية الثمانينات ومحدش سمعه فى الاول غير مجموعة صغيرة من السكان , بس سنه بعد سنه زاد عدد الناس اللي شهدوا انهم سمعوه وبيعتقد ان الاطفال بيسموع بشكل أكتر حدة , الصوت كان موجود في كل مكان وتواصلة المستمر خلى السكان يتعودوا عليه , بس كان مزعج لأى زائر جديد , اللي قلق الاطباء ان نسبة الأرق والاضطرابات النفسية في تاوس بتفوق المعدل الوطني بمراحل وفي سنة 1993 قدم سكان المدينة عريضة للكونغرس بيطالبوا فيها بالتحقيق في الموضوع ويضمنوا سلامة السكان من مصدر الصوت , بس التحقيق الأولي قلل من أهمية الموضوع , وطبعا ظهرت فرضيات كتير لتفسير الصوت بس مفيش حاجة مؤكدة , في ناس بتدعي ان مصدر الطنين موجات فوق صوتية بيبثها الجيش للاتصال بالغواصات , وفي ناس تقول انها تجربة سرية للتأثير على السكان من بعد , وفي ناس بتفترض انها نتيجه عوامل طبيعية غامضة !!
وعلى عكس اللي بيحصل في تاوس موجود في المكسيك جزء من صحراء مابيمي على بعد 225 ميل جنوب الحدود مع أمريكا , بيطلق عليها العلماء اسم " حزام الصمت " ففي المنطقة دي مفيش أي صوت خالص بالمعنى الحرفي , متقدرش تسمع صوت اللي بيناديك على بعد مترين , كمان مبتسمعش صوت الهوا او صهيل الخيل ومفيش أي جهاز لاسلكي بيشتغل , وهي قريبة من منطقة عسكرية , الطيارات بتخترق جدار الصوت بس محدش بيسمع أي دوشة , الظاهرة دي اكتشفت بشكل مؤكد سنة 1969 من مهندسيين بترول لاحظوا ان اجهزة الارسال اللي معاهم مبتشتغلش في المنطقة دي ومن خلال اجهزة الارسال دي حددوا " حزام الصمت " بين مدن سان خوسيه وموهانو وخط طول 27 
وقبل كدة لاحظ الناس اللي بتربي حيوانات ماشية مظاهر غريبة بتميز المنطقة دي بالذات , فمثلاً هناك بيظهر شهب بشكل كبير جدا , ومفيش أي حشرات هناك ولا كهربا ومفيش أي ارسال للتلفزيون , وبيقسموا على انهم بيشوفوا اجسام مضيئة بتخرج من الارض وصوت شبه الصفير بيسمعوه فجأة فى آخر الليل رغم الصمت فى المنطقة , ده غير النفوق الجماعي للحيوانات من غير سبب واضح مع العلم ان الحيوانات مبتتعرضش للافتراس من حيوانات مفترسة والاغرب من كدة ان الحيوانات الآكلة للجيف زي النسور والسباع وغيرهم مبتقربش جمب الجثث , كمان فى اضطرابات بتواجه الحيوانات زي ماحصل في بعثة علمية راجت للمنطقة , وكان في كلب مرافق مع اعضاء البعثة وبدا الكلب يعمل تصرفات غريبة زي انه يلف حوالين ديله وينبح وكان باين عليه علامات الذعر من غير سبب واضح وتاني يوم محدش لقى الكلب , كمان الطيور المهاجرة بتنحرف عن مسارها لما بتعدي من فوق المنطقة دي .. رغم دقة الطيور المعروفة فى تحديد الاتجاهات , والسلحفاه كمان بتتقلب على ضهرها فى المناطق دي , ده غير عدم امكانيتهم استخدام البوصلة , كمان السكان المحليين بيقولوا شهادات كتير مختلفة منها قريب دا من الخيال ومستحيل تتصدق , زي انهم بيشوفوا اشباح واطباق طائرة وبيشوفوا اجرام سماوية واضواء مجولة وسحاب من الدخان بالوان مختلف , كمان سكان الصحراء دي لاحظوا علامات ميعرفوش مين عملها مع العلم ان السياح من النادر يدخلوا المنطقة دي وكمان عصابات المخدرات والمهربين مبياخدوش طريق فى الصحراء دي مع انها منطقة مثالية ليهم ,, عشان حرس الحدود ميقدروش يتصلوا بالقيادة ولا تقدر الطيارات تتصل بالفرق الارضية وبالرغم من كدة متسجلتش أي حالة تهريب واحدة فى المنطقة دي , محدش عنده الجرأة , والمنطقة عموما مليانة كرات حديدية صغيرة بقايا شهب متساقطة , وبعض العلماء في الجيولوجيا بيعتقدوا ان المظاهر الغريبة هناك سببها رسوبيات مغناطيسية ضخمة موجودة تحت الأرض , والتفسير دة ممكن يناسب ظاهرة اختفاء البث التلفزيوني والراديو بس لأنها حصلت فى كذا منطقة تانية لكن متفسرش اختفاء الصوت على بعد قريب ..
تعالوا نبص على الخريطة ونتأملها شوية " شوف الخريطة فى الصور " 
هتلاقي ,, ان مثلث برمودا , ومثلث التنين على خط واحد ..
وعلى امتداد الخط اللي بينهم هنلاقي منطقة 
" حزام الصمت " والأهرامات " !!!!!اتفرجوا على الصور
من هنا
فيلم وثائقي عن حزام الصمت 
https://www.youtube.com/watch?v=lWbpW8FIM-o


التسميات:

تعليقات

إرسال تعليق

المشاركات الشائعة