عمال الفنادق | الجزء الثاني

عشان تستمتعوا بالقصص , افتحوا الموسيقى دى جمبكم وحطوا الهيد فون ويستحسن فى اوضه هاديه او ضلمة :
http://bit.ly/1Imb0Q6

وقفنا المرة اللى فاتت عند القصة رقم 5 والكل اجمع على ان القصة الثالثه كانت مخيفة اكتر , هستنى تقولولى المرة دي انهى قصة علقت معااكم

6 – " اشتغلت في فندق صغير لما كان عمري 17 او 18 سنة وفي يوم كنت قاعد فى مكتب الاستقبال مش بشتغل ولقيت الراجل المسؤول عن نظافة الغرف بيشوف حاجة فى اوضة كان بينضفها ورحت وراه لقيته واقف فى نص الاوضه بيشاور السقف , ولما بصيت لقيت مجموعة من اثار الاقدام وواضح ان صاحبها مكنش لابس حاجة فى رجله والاثار موجودة بس فى نص السقف مفيش في اى مكان تانى ومفيش اى احتمال ان شخص يكون نط الارتفاع ده كله بالمقلوب حتى عشان يسيب اثر لرجليه على السقف وكمان لقينا رصاصة على السرير . "

7-" انا كنت بشتغل في فندق عمتي وعمي في قرية اسكتلندية من حوالى 12 سنة , وافظع حاجة حصلتلى اني كنت فى يوم نايم في اوضه العمال وسمعت صوت دوشه فى الممر كله وكانت الساعه حوالي 3 الفجر بعد ما معظم العمال ناموا فا خرجت ورحت عشان اشوف مين بالظبط بيعمل الدوشه واقوله يهدأ شوية ويبطل ازعاج عشان اعرف انام , بس الممر كان فاضي لكن منور وده بالنسبالي كان دليل على ان في حد بيعمل حاجة , مشيت في الممر لحد آخرة وشفت شخص اسود تماما زي الظل ملوش ملامح ومفيش اى حاجة تميزة نهائي ظل اسود بس طالع على السلم , تخيل تشوف كائن اسود ملوش ملامح ماشي قدامك .. انا لفيت وطلعت اجري على اوضتي وقفلت الباب وفضلت الدوشه شغاله شوي هوانا فاكر انى منمتش الليل هدي نهائي ولا غمضت عنيا ومخرجتش من الاوضة لحد الشمس ماطلعت وسألت الموظفين لو حد فيهم سمع اي دوشه بليل بس محدش خالص سمع اى حاجة غيري ."

8-" انا اشتغلت شيف في هيلتون كبير وفاكر اني كنت بتكلم مع واحد مدير فندق وحكالى القصة دي :
المدير كان خلص شغله ومروح بيته بليل شاف واحد نايم على العشب الخاص بجنينة الفندق وافترض انه شخص فقير ملوش مأوى فاقرر يرجع لمكتب الإستقبال ويطلب من الحراس يروحوا يطلعوه بره حدود الفندق ومشي بعدها , لما رجع الصبح للشغل لقى الشخص نفسه لسه نايم في جنينة الفندق اتعصب جدا وجري على مسؤول مكتب الاستقبال عشان يهزقه انه منفذش الاوامر بتاعته وخده وراحوا عشان يشوفوا الراجل اللي نايم على العشب ده ويطردوه ولما قربوا منه لقوه لابس بدله غالية جدا واتضح انه رجل اعمال غني نط من شباك اوضته في الدور الـ 12 وميت بقاله يوم ونص ومحدش شافه وهو بيقع , وفي الواقع دي قصة حزينة جدا . "

9-" كنت بشتغل في امن فندق فى جنوب كاليفورنيا وكل يوم كنا بنمر فى الفندق من اوله لآخرة ونشوف الاوض ونتأكد ان الاضواء مقفوله والابواب والشبابيك مقفولة كويسة وآمنة ورحت أوضة ولقيت كل الانوار مفتوحة وكالعادة كل الهاوس كيبينج بيسيبوا الانوار .. انا بدأت اقفل الانوار من اول الشبابيك لحد الحمام , والحمام كان فيه بابين على الاستايل الفرنسي اللي بيتفتح لبره ناحية الاوضة وخشبهم كان خفيف جدا وخفيف الوزن وكان ليهم مقبضين المهم اني فتحت الباب الشمال لآخرة عشان اقدر اوصل لمفتاح النور واقفله وفعلا وصلتله وقفلت النور وفجأه لقيت الجو سقعه جدا جدا سقعه مش طبيعية ومش معقول العمال سابوا المكيف عالى فى الاوضة بالطريقة دي وهما بينضفوا , واول مابعدت جسمي عن الباب اتقفل بشكل مخيف بسرعة , اترعبت وطلعت اجري على باب الاوضة وانا بفتح الباب مكنش راضي يتفتح نهائي والقفل اتقفل لوحده واتفتح تانى من نفسه وطلعت بره الاوضه واقف بره مرعوب عنيا بتدمع من الخضه ومش عارف ايه اللى حصل ده وقررت ارجع تانى ادخل واشوف بهدوء ايه اللى حصل .. دخلت وبصيت على الباب وكان مقفول فتحته وفضلت واقف شوية عشان اشوف هيتقفل لوحده تانى ولا لا ورغم ان الهواء كان قوي جدا والباب خفيف الا ان الباب متقفلش لوحده ولحد دلوقت مش لاقي اي تفسير وكل اصحابي لما حكيتلهم ملقوش اي تفسير فاقررت مدخلش الاوضة دي تانى ."

10 -" اشتغلت في فندق Holiday Inn من سنين كتير وفاكر شوية مواقف غريبة حصلتلى , واحدة من المواقف دي اننا كنا على طول بيجيلنا شكاوي من صريخ طفلة صغيرة فى منطقة حمام السباحة ولما نروح نشوف ايه الموضوع منلاقيش اي حاجة والادارة عرفتنا بعدين ان في بنت صغيرة غرفت في حمام السباحة زمان , وفي يوم كنت شغال في مكتب الاستقبال وجتلي مكالمة من اوضة بتشتكي من ان الاوضه اللى فوقها بيحصل فيها دوشه وخبط كتير ومكنش في حد اصلا في الاوضة !! ولما قررت اسال عن الاوضة دي عرفت ا نفى واحدة قتلت جوزها فى الاوضة وبعد المقتل الاوضة اتحولت لمخزن ورغم انها فاضية الا ان مكتب الاستقبال كان بيجيله مكالمات كتير جدا بسببها , انا متأكد ان اكيد في سبب وشرح انا مش عارفه لأني مش بصدق فى الأشباح لكن المواقف دي كانت غريبة جدا جدا بالنسبالي ."

11-" دي مش قصتي لكن انا مشاركه فيها بشكل ما , من كذا سنة زميلتي في الكلية وخلينا نسميها E اشتغلت مديرة ليلية فى فندق اتبنى جديد , وانا كنت بروحلها عشان اسليها بليل الساعه 1 او 2 وبجيبلها قهوة معايا ونتكلم شوية , وفي يوم رحتلها لقيتها قاعده فى الاستقبال بتهز راسها في حيرة وقالت انها كانت لسه بتحجز لضيفه نازله الفندق نسخة مطابقة لزميلتنا وشريكتنا فى الغرفة M كانت شبهها بالظبط نفس الطول ونفس الشعر وتسريحته ولون العين حتى اللكنة الجنوبية نفسها , E ورت الضيفة صور لزميلتنا M على تليفونها لكن الضيفه قالتلها انها مش هي كذا مره , وافترضنا انا وهي ان دي صدفة عادية لأن زميلتنا M كانت بتزور أهل E من فترة , رحنا نشرب قهوتنا ونتكلم وبعد الساعة 2 قررت اروح وحوالى الساعة2:30 بعد ماركنت عربيتي في الجراج بصيت على تليفوني ولقيت رسايل كتير من E لزميلتنا M في شات جماعي بينا وكان توقيت الرسايل الساعة 2:17 بتقول , خلاص ياجماعة بطلوا ,, اللى بتعملوه مش ظريف ,, انتو رخمين جدا .. ايه اللي بيحصل ده ؟! .. قلقت ومكنتش فاهمة هي تقصد ايه فا اتصلت عليها وفى اللحظة دي كل حاجة بقت غريبة .. E كانت بتتكلم وبتعيط بطريقة هيستيريه فى التليفون وقالتلى ان انا وM كنا واقفين فى اخر الممر اللى قدام مكتبها بنفس اللبس اللى قابلتها بيه يومها وبنبصلها بهدوء ونظراتنا مخيفة .. E افتكرت ان انا وزميلتنا M بنعمل فيها مقلب وفضلت تبعتلنا رسايل بس محدش رد عليها لحد ما تليفون الاستقبال رن وردت عليه وجت تبص تاني علينا ملقتناش واختفينا من قدامها , انا حاولت اخليها تهدأ واطمنها وتاني يوم انا وهي اتكلمنا عن الاحتمالات عشان نفسر اللى هي شافته والضيفة اللى شبه M رجعت لمكتب الاستقبال في اليوم اللى بعده عشان تطلب شوية خدمات والحاجة اللى تخوف فعلا ومرضيتش احكيها لـ E صاحبتي وتفاجئ اكتر من البنت اللى شبه زميلتنا اني لما رجعت السكن يومها لقيت الساعة فى المطبخ واقفة على الساعة 2:17 وجمبها متعلقة صورة سيلفي ليا انا وM اتصورناها ظهر اليوم ده على تليفوني انا ومنقلتهاش لـ M على الموبايل نهائي وتانى يوم اختفت , ولحد دلوقت مفيش اي تفسير نهائي ومفيش اي حاجة غريبة حصلت فى الفندق تانى لكن الموقف ده مخليني حاسه بعدم الاستقرار ."

12-" امي حكتلي ان قبل ما اتولد قررت هي ووالدي ينتقلوا لمنطقة ساحلية ويفتحوا فندق صغير على البحر وكان اول حاجة لازم يعملوها اول ما راحوا انهم ينظفوا الاوض كلها عشان كدة قسمو الاوض على بعض كل واحد اوضه عشان يخلصو بسرعة , وكانت فى الاوضة رقم 8 بتكنس وفجأة السجاد كله اتموج وانا لما سمعت منها القصة كنت لسه طفل ومكنتش حاسس ان الموقف مخيف او انها حاجة تستاهل حد يخاف منها كنت فاكر ان السجاد اتموج على بعضه عشان عنده حساسيه من التراب بما انها كانت بتكنس مثلا " خيال طفل يعني تفتكروا هفكر في ايه؟ " ومفكرتش في القصة خالص تانى بس من شهر كدة افتكرت الموقف ورحت اهزر مع ماما وقعدت اتريق عليها عشان خافت من حاجه عبيطة زي دي , ولما قولتلها حسيت على وشها ملامح توتر وتشوش وقالتلى اني واضح مفهمتش كلامها وانا صغير واختلط عليا الموضوع وان اللى حصل فعلا ان السجاد كله كان بيتقطع وبيتحرك فى شكل موجة وان هي نفسها والعفش كانوا بيترفعوا فى الهوا وينزلوا لمدة 10 ثوانى وفضلت تصرخ بشكل هيستيري بكلام هي مش عايزة تقوله " جريمة دموية " وطلع والدي اللى كان فى الدور الارضي وكان كل حاجة انتهت ولما حكتله حاول يقنعها بعكس اللى حصل ويهديها لكن باعوا الفندق قبل مايتفتح ويشتغلوا فيه والحاجة اللى مخوفاني اكتر من القصة ان امى مش بتؤمن بالظواهر الخارقة للطبيعة او الاشباح او كل دة حتى ملها شاي مواقف تانيه تخوف الا الموقف ده هو الوحيد وحتى مبترضاش تتكلم عنه نهائي . "

13-" مراتي كانت بتشتغل في فندق على ساحل ولاية اوريغون , بتراجع حسابات ليليه وحصلها مواقف كتير جدا مع الضيوف ملهاش اي تفسير , في الغالب الاوضة رقم 303 كانت اقل اوضة بتتأجر , كل ماتعدي من قدامها بليل تسمع صوت المنبه بيرن وكأنه هينفجر , لكن الهاوس كيبينج قالوا ان المنبه فى الاوضه دي مفصول , ده غير ان مكتب الاستقبال عنده سجل ضخم من شكاوي النزلاء ومعظم الشكاوي اللى اتسجلت للناس اللي نزلوا فى الاوضة دي, صوت خبط على الحيطة , الشعور بإنهم متراقبين , بيشوفوا ناس ماشيه فيها , التليفون والمنبه الخاصين بالاوضة بيتطفوا فيها لوحدهم , التلفزيون بيتفتح ويتقفل لوحده ونور الحمام كمان , بيسمعوا صوت همس او انفاس وحاجات تانية كتير جدا! 
ومن المواقف الى اتعرضتلها كمان ان في ضيوف تصرفاتهم غريبة بيحاولوا يدخلوها اوضهم ويطلبوا منها تحضر حفلات فى اوضهم ويتصلوا بيها كل شوية بليل وانا مش متخيل قد ايه شغلها متعب وحاجة تضغط الاعصاب . "

14-" كنت بكتب ايميل لعميل عندنا بليل وشفت حاجة بطرف عيني بس تجاهلتها وكملت اللى بعمله وكنت مركز جدا فى اللى بعمله وبس لمدة ساعات طويلة جدا لحد ماطلع ضوء الفجر وبعدها برفع عيني لقيت شخص حقير بيبصلي من ازاز الشباك اللى قدام مكتبي على طول ولما لفيت وشي لقيته بيبعد بهدوء وماشي براحه جدا فى اللحظه دي طلعت اجري على الباب اللي جمب الشباك على طول عشان اطلعله واشوف ايه الحكاية لكن ملقتش مخلوق فى الشارع ,, ولا اثر ليه نهائي , وفضلت مرعوب ومش مستوعب انى كنت متراقب طول الليل ."

#يارا_عمر
#حواديت_آخر_الليل