ماري لافو - ملكة السحر الاسود

 قصتنا عن واحدة من اشهر واكبر الساحرات في عصرها
 و اتشهرت بلقب " ملكة الفودو والسحر الاسود" ..
 ماري لافو أو ماري كاثرين لافو .. كانت مشهورة جدا في مدينة نيو اورليانز هي وبنتها ماري لافو الثانية .. كانوا معروفين بممارساتهم السحرية القوية 

الأعمال , التواصل الروحاني , النشاطات الغامضة .. وكان ليهم تاثير كبير جدا على شخصيات مهمه في المجتمع وقتها .. كان ليهم شريحه كبيره من رجال الاعمال اللى بيطلبوا منهم خدمات وبيدفعولهم مقابل ضخم جدا 
عشان يعلموهم بعض الطقوس او التعاليم السحرية السوداء 

ومش بس رجال الاعمال .. تاثيرهم وصل لناس كتير جدا
 وده خلاهم يكتسبوا اتباع من جنسيات وديانات ومعتقدات مختلفه ..

سنة 1874 اكتر من 12 الف شخص
 من ذوي البشره البيضاء والسوداء كانوا واقفين 
حوالين بحيرة بونتشارتراين وكل واحد مستني
 ياخد طاقة روحيه او مساعدة الارواح من طقوس ماري لافو الثانية 

اللى اتوصفت بـ " شعائر اسطورية في ليلة القديس يوحنا " 

السجلات التاريخية بتقول ان ماري لافو الام اتولدت في الحي الفرنسي في نيو اورليانز يوم الخميس 10 سبتمبر سنة 1801 وكانت بنت سيده اسمها مارغريت هنري , كانت سيدة من اصحاب البشره السوداء كانت نصف امريكية ونصف افريقيه فرنسيه والاب كان اسمه تشارلز لافو من اصل افريقي وفرنسي وكان بيشتغل تاجر , وفي 4 اغسطس سنة 1819 اتجوزت راجل اسمه " جاك او سانتياغو " كان مهاجر فرنسي لاجئ وخلفت منه بنتين ..وبعد وفاته اشتغلت مصففه شعر زي ماسبق وقولت فى المقال الى فات.. على الرغم من وفاة ماري لافو اللي كانت طبيعية جدا 

وانها ماتت بهدوء في بيتها الا ان حياتها مكانتش هادية ابدا 

المؤرخين قالوا عن ماري انها كانت صاحبة شخصية غامضة جداً

كانت لطيفة مع الناس جدا وبتتعامل بطيبة مع الكل الا انها كانت جواها شر كبير .. كانت تبان هادية مع انها قوية وتقدر تعمل حاجات متجيش في بالك ..في لحظة تبقى بتضحكلك ولو اذيتها توريك جانبها الشيطاني .. كانت معروفه بحبها للثعابين واللي كان مميز في علاقتها بالثعابين ان الثعبان كان بيخضع لأوامرها في الحال وانها كانت دايما بتقول ان الثعابين دي عبارة عن ارواح سوداء من العالم السفلي قدرت تسخرهم لخدمتها وان لازم تخاف منها مش من الثعابين من بين الثعابين دي كان في ثعبان ضخم 

كانت بتسميها " زومبي " على إسم إله افريقي واللى كانت بتقول انه بيحمل نصف قوتها وانه جزء خفي من قوة القساوسه الرومانيين والارواح الافريقية

في ناس قالت ان لافو كان ليها تاثير قوي في تحسين وضع العبيد ذوي البشره السوداء في نيو اورليانز .. 

طلع عليها اشاعات بسبب اكثر من حادثة حصلت لبعض رجال الاعمال اللى كانت بتتعامل معاهم واتقال عنها انها بتساعد العبيد وبتنتقم من اصحاب النفوذ ..

فمثلاً .. في اشخاص كان بعد مابتتعامل معاهم بيجيلهم امراض غامضة

ومن القصص المشهورة .. 

واحد من رجال الاعمال اللى كانت بتتعامل معاهم واسمه " جايكوب كالوني " كان بيطلب منها خدمات عشان تنجزله شوية مصالح في شغله

واثناء ماكانت بتعمل طقوس في بيته شافته بيعامل واحد من الخدم بطريقة سيئة اكتر من مره لانه من كتر التعب مكنش قادر ينجز واجباته بشكل سليم وبيقوله " تصرف كـ رجل " .. وطلبت منه ماري مرتين يبطل تصرفاته لانه بيزعجهاوالراجل بردو فقد اعصابه على الخادم وقامت ماري من مكانها لمت ادواتها وطلعت من البيت من غير ولا حرف ومشيت 

وجايكوب بدأ يعاني من ليلتها من كوابيس غريبه جدا 

قال انه شاف في اول كابوس يومها ثعبان بيسلخ جلده بانيابه 

وبيرشق في جسمه مسامير ومن الخوف صحي ولقى اثار جروح في دراعه وبدا يعاني من الكوابيس اللى بتزيد كل يوم رعب 

وبقى يخاف ينام لحد ماوصل لإنه بيغم عليه من التعب والاجهاد

وبعت اصحابه وخدم يتوسلوا لماري تشوفله حل 

الا انها ابتسمت في وشهم ابتسامه ساخره وقالتلهم " اخبروه ان يتصرف كـ رجل .. او يجرب معنى ان يسيطر على حياته كابوس "

وفي قصة تانيه بتقول ان واحده من السيدات الاثرياء 

سمعت عن لافو وطلبت من صديقاتها يخلوها تروحلها البيت

بعد ماوصلت لافو مع صديقات السيدة دي .. واكتشفت السيدة انها نص افريقية كلمتها باستهزاء

وقللت من قدراتها وقالتلها " أريني أفظع مايمكنك فعله سأختبر قوتك "

ولافو كلمتها بهدوء وطلبت منها متستفزهاش وتشوف طلباتها عشان تخلصها وتمشي فجاوبها الست بوقاحه وقالتلها " ماذا كنت اتوقع من سوداء غبية مثلك , اذهبي من هنا " 

وقبل ماتخرج لافو من البيت الست بدأت تصرخ بشكل هيستيري وتعيط 

وتطلب من صحباتها المساعده وتوصفلهم ثعبان ضخم بيقرب منها 

ووقعت على الارض فجأة وجالها تشنجات وحالة من ضيق التنفس واغم عليها وفضلت الست بتعاني من الصرع فترة طويلة 

ومن الحاجات اللى اتهم المؤرخين ماري بيها 

قصة انتقام الخدم من مدام لالوري .. وارجعوا سبب اللي حصل كله بماري لافو .. وانها كانت السبب الرئيسي في انها تقلب الطربيزه على مدام لالوري وتثير الغضب بطرق سحرية في نفوس الخدم عشان ينقلبوا على المدام بعد مادخلت بيتها وعرفت اسرارها وشافت معاملتها للخدم 

ودي حاجه خلت لافو فى نظر الناس بطله مش شخصيه شريره 

لدرجه ان في ناس كانت ولازالت بتعتبرها شخصية مؤثره ومتبعين تعاليمها واساليب حياتها اللى كانت بتسجلها في كتب ليها 

وبيعظموها جدا .. قبر لافو لحد النهارده الناس اللي متاثره بيها بتزوره وبيقدمولها طقوس روحانيه قدامه اما الباحثين بيوصفوا لافو بإنها 

" شخصية شريره لا يمكنك ادانتها لأنها لم تؤذي سوى الظالمين " 

#يارا_عمر #مدام_لالوري #ماري_لافو #حواديت_آخر_الليل

مصادر : - 

http://bit.ly/2oSkD3z

http://bit.ly/2jIy3hR

http://bit.ly/2D0bL0U