التسميات

بحر الشيطان - الجزء الثاني

ايه السر في المثلث وياترى الفراعنة كانوا عارفينه ؟ 
في كلام كتير عن ان المثلث او الشكل الهرمي بيولد طاقة قوية جداً , وهرجع بيكم هنا لكلام دكتور مصطفى محمود وهو بيتكلم عن طاقة الهرم 
وقال نصاً " غرفة الملك اللى اكتشفوها في نهاية التلت الأول من الهرم , هذة الغرفة مكان التابوت , لو حطيت أي حاجة يعني حتة لحمه مثلاً فتكتشف انها متعفنش , تنشف لكن متعفنش , اللبن يتحول لزبادي لكن ميعفنش , الفواكه تدمُر لكن متعفنش .. لو زرعت حبوب معينه زي القمح او الفول , تلاحظ ان الحبوب دي بتنبت بسرعة اكبر من انك تحطها جوه الهرم , وفي عالم اسمه ديربال عمل تجربه وقال انا مش هعمل تجاربي على الهرم ده , انا هعمل تجاربي على الشكل الهرمي نفسه .. هعمل هرم كرتون بنفس المقاسات ونفس النسب وهحط جوه الهرم في نهايه التلت للهرم تجاربي , واتضح ان التجربه ادت نفس النتائج , وكمان ديربال اكتشف ان شيفرات الحلاقة المستعملة لو حطيتها في نفس المكان ترجعلها نفس الحده وترجع حاده تاني , ديربال قال ان الحكايه ليها شروط , لازم الهرم يكون موضوع بحيث ان الواجهة الشمال تبقى على نفس الشمال المغناطيسي زي ما الفراعنه عملوه او بنوه , والمسأله دي اثارت كلام كتير اوى .. ايه السر ؟ انا لما قريت الكلام ده مصدقتش , فاقولت هعمل التجربة بنفسي , وجبت كرتون وعملت شكل هرمي بنفس المقاسات وظبطت الواجهات بحسب البوصلة , وحطيت تفاحة .. والتفاحة فضلت 3 شهور بالتمام والكمال معفنتش , دمُرت شويه بس فضلت لونها احمر زي ماهيا , حتى اللبن , وتجربه الانبات , اذاً الملاحظات دى حقيقية وتفسيرها موضوع آخر ملهاش تفسير خالص لحد دلوقت , وبيقولوا ان الشكل الهرمي بيستبدع طاقة معينة , وبيسموها " Energy of form " يعني طاقة من المجسم او الشكل نفسه " طبعاً الكلام ده صادم للبعض ! وفي ناس هتستغرب .. بس فعلاً بتطبيق تجارب كتير على نظرية ديربال إتأكد كلامه , وبعد ماراجعت كلام الدكتور مصطفى محمود على قد ماقدر وبحثت عن العالم اللي اتكلم عنه في حاجات كتير مقدرتش اوصلها زي كتبه بس وصلت لمقالات لصحف عالمية زي " سي ان ان " بتتكلم عن نظرياته في ان الشكل الهرمي فعلاً بينتج طاقة .. 
مش بس كدة , وصلت كمان لحاجة مهمة ان في عالم فرنسي اسمه انطوان بوفيس , ألف كتاب في ثلاثينيات القرن العشرين اسمه " مفهوم الطاقة الخفية للهرم " وبين في الكتاب ده شوية ظواهر خارقة للطبيعة شافها لما زار الاهرامات في مصر ومنها " جثث الحيوانات الميته مش بتتعفن او تتحلل " جوه الهرم وده خلاه يقول ان في قوة خارقة للشكل الهرمي بردو بغض النظر عن شكله , وكمان نشر شويه تجارب مشابهة لتجارب ديربال عن قدرات خارقة للهرم في حفظ الاغذية وتحسين المزاج النفسي للبشر وكانت التجربة دي بداية علم جديد , علم الطاقة الحرة وطاقة الاشكال الهندسية , موفيس وعلماء كتير جم بعده عملوا تجارب كتيره جداً جداً ومن بينهم تجارب على اشخاص بيعانوا من امراض عجز الطب عن معالجتهم وفي منتصف السبعينات كان علم طاقة الاشكال الهندسية ده علم منفصل وليه قوانينه وتجاربه المثبته اللي قال مؤيدينها انها مبنية على ادلة علمية دامغة وموثوق فيها لأنها ادت نتائج واضحة ومفيهاش أي جدال .. وطبعا ظهر مشككين كالعادة قالوا ان التجارب دي مجرد خدعة تجارية عشان يسوقوا مئات الاف الاشكال المجسمة الهرمية اللي صممها العلماء والباحثين دول , ولو كان الهرم بيعمل الحاجات الى قالو عنها وليه قوة خارقة , " بالبلدي كدة مكنش حد غُلب " وكانوا استغنوا الفراعنة نفسهم عن مواد التحنيط اللي اثبت انهم استخدموها في حفظ جثث ملوكهم , اما العلماء المصريين اهتموا بنتائج طاقة الاهرام ومنهم اللي عارضها جداً واعتبرها نوع من الخرافات اللي مش مبنيه على دليل واشهرهم الدكتور عبد المحسن صالح 
بعيداً عن خلافات العلماء وتشكيكاتهم وخلافاتهم مع بعض لأن عموماً ده اللى بيحصل بين العلماء في أي حاجة ,, لازم يكون في مشككين ولازم يكون في مؤيدين 
الفراعنة معروفين بإن بحر اسرارهم كان واسع ,, ولو حكينا عنهم من هنا لبكرة مش هنخلص ,, لكن برجوعي لمقال Merihan Omar 
اللى كتبت فيه عن احتمالية وصول الفراعنة للفضاء بعد ما نشر موقع هانفغتون بوست خبر عن اكتشاف وكالة الفضاء الامريكية ناسا هرم على سطح كوكب المريخ , لما نشروا صورة عن مسبار " كورسيتي " مختص بعمليات بحثيه فى المريخ , صورلهم فيه صورة لهرم شبه الاهرامات الفرعونية بالظبط بمنتهى الوضوح وحاجات تانية أهم ..
تقدر تقرأ المقال كامل من هنا " http://bit.ly/2dY7XEe " 
اوضة الملك في الهرم الأكبر بيسموها " موطن الألغاز " عشان كده بول برونتون مؤلف وباحث في علم المصريات قرر يقضي ليلة كاملة في اوضة الملك عشان يعرف ايه اللي بيحصل بليل ويحاول يكشف جزء من غموض الهرم , دخل برونتون الهرم وقعد في الضلمة من غير نور او اكل وأول حاجة حس بيها .. طاقة سلبية خوفته واستولت عليه وبدأت تزرع الرعب جواه وحس انه مهُدد وحاجة بتدفعه يهرب ويمشي من المكان وميرجعلوش تاني ابداً , بس فضل في مكانه متحركش وساند ضهرة على التابوت وقرر يفضل شجاع ويتغلب على احساسه اللي كان بيقوله ان في اطياف بتتحرك حواليه مش عارف ايه هي , وبعد وقت قصير قال ان الطاقة السلبية دي اختفت فجأة وحس براحه غريبة , وقصة تانية لنابليون .. سنه 1799 قرر نابليون وهو في مصر , انه يستكشف الهرم الأكبر ويدور في حقيقة القصص اللي سمعها عنه , فدخل اوضه الملك وأمر كل اللى معاه يسيبوه لوحده ومحدش يدخل عليه وفعلاً كلهم خرجوا واستنوه بره , وهو قضى وقته في الاوضه وبعد شويه خرج منها بيترعش جداً ووشه شاحب ورافض يتكلم مع اى حد او يحكي , ودي كانت حاجة غريبة على ملك قلبه ميت زي نابليون .. وحتى بعد مرور وقت كبير كل ماتيجي سيره التجربة دي يرفض الكلام عنها ويتجنب اى كلام فيها وكان دايماً يقول انه مش عايز يفتكر وامر رجالته ومساعديه ميسألهوش تانى ابداً وبعد سنين ولما اتهزم ضد البريطانيين والروسيين واتقبض عليه قال انه شاف رؤيا غريبه ومخيفه جوه الهرم شاف هزيمته وسجنه ونفيه وعشان كده كان رافض يتكلم عن الى حصل معاه هناك وكان نابليون على فراش الموت وجنبه واحد من اصحابه بيسأله عن سره ويقصد الرؤيا ونابليون فعلاً كان على وشك انه يقوله بس تراجع في اخر لحظه وقاله ان مفيش حد هيصدقة وبكدة مات نابليون وهو شايل سره معاه 
*****
ثانياً : مثلث برمودا مخبي ايه , وايه الاسرار اللي اكتشفت حديثاً عنه ؟!
انتشر من فتره خبر على النت بيقول ان في عالم اكتشف هرمين من الكريستال اكبر تلات مرات من اهرامات الجيزة , بس طلعت مواقع تانيه بتكدب الخبر وبتقول انها ملهاش أي صحة .. بس بعد البحث عن أي مصدر يكون موثوق منه يأكد او ينفي المعلومة لقيت مقالين , واحد منشور على " دايلى ميل " بيأكد صحة الخبر , والتاني منشور على " فاكت اور فيكد " بيقول ان الخبر اتنشر على مجلة قديمة سنة 1991 وكانت المجلة تجذب الانظار بالعناوين الغريبة كـ " تبني هيلاري كلينتون مخلوقاً فضائياً و نظام البيج فوت الغذائي " ومكنش في تفاصيل اكتر من كده .. وبمراجعة مقال الدايلى ميل قال فيه الكاتب " شيفال " ان الي اتنشر فى المجلة مختلف عن اللى اكتشفه العلم حديثاً وتفاصيل الخبر كالآتي , عالم المحيطات دكتور " ميير فيرلاجن " اكتشف هرمين ضخمين بيعتقد انهم من الزجاج او الكريستال على عمق 2000 متر تحت سطح البحر واستخدم اجهزة اسكتشافيه ,, اكتشف بيها العلماء ان الهرمين دول اكبر من هرم خوفو تلات مرات , ودكتور مير بيعتقد ان لو في دراسات متوسعة اتعملت على المنطقة دي والهرمين دول هيقدروا يعرفوا معلومات اكتر تفسرلهم الظواهر الغريبة المتعلقة بالمثلثين , وقالوا ان التكنولوجيا اللي استخدمت في صناعه الهرمين غير معروفة لحد دلوقت والعلماء بيعتقدو ان تجميع المعلومات للدراسات فى الموضوع ده مش هتكون سهلة , ده غير ان العلماء كلهم اتفقوا على ان الهرمين دول اتبنوا على سطح الارض وبعد التحول القطبي اللى علماء الجيولوجيا بيعتقدوا انه حصل للارض من زمان أدى لإنهيار القشرة الارضية وحصل زلازل مدمرة كتير وتسونامي ضخم ادى لغرق الهرمين تحت سطح البحر ,, وفي مجموعة علماء تانيين ربطت اختفاء جزيرة اطلانتس بالهرمين وبمنطقة مثلث برمودا نفسها ,, وكمان اشار الكاتب ان الاكتشاف ده من تسعينات القرن الماضي يعني العلماء لسه شغالين عليه وبرغم غياب الاثباتات القوية على الاكتشاف ده الا ان في اكتشاف تاني اثار ضجة اكبر وده كان مؤكد 100% ,, من فتره قريبة جداً العلماء قرروا يعملوا قمر صناعي يمر بمنطقة مثلث برمودا عشان ياخدوا صور جويه ليه , ده غير ان الخبراء عملوا دراسة للطبقات العليا للمية في مثلث برمودا ولقوا كميات كبيرة جداً من الفيروسات اللي معرفهاش العلم قبل كده , والفيروسات دي مبتشكلش خطر على الانسان وبتشكل خطر بس على انواع معينه من الجراثيم البحرية , بعدها نشرت قناة علمية تقرير عن ان في قنابل " هوائية " على شكل سداسي فوق منطقة مثلث برمودا .. اتشكلت بسبب ظاهرة الانفجار الجزئي ,, بحيث تمطر غيمة على منطقة معينة وتضرب المحيط فتشكل امواج ضخمة وخطيره وكمان التقرير بيشير لإن القنابل الهوائية دي بتتحرك بسرعة 170 ميل في الساعة وتقدر توقع طيارات وسفن , واستنتح الباحثين ده بعد مادرسوا غيوم مشابهة فوق بحر أوروبا الشمالي , بس خبراء الارصاد الجوية قالوا ان الغيوم السداسية الشكل دي مش موجود غيرها في أي مكان تانى غير مثلث برمودا وده اللي زاد من غموض المثلث اكتر .. السر واللغز متحلوش , وفى رأيي الشخصي انها مجرد اجتهادات من العلماء لحل لغز مش راضي يتحل ..
*****
ثالثاً : مثلث برمودا ومثلث التنين , مش المثلثات الغريبة الوحيده , ازاى ؟
بملاحظتي لصورة اثناء بحثي موضح عليها مناطق موازيه لإمتداد الخط الي عليه مثلث برمودا ومثلث التنين لقيت ان في مناطق تانيه بنفس الترتيب 
عملت على طول سيرش على المناطق دي عشان احاول افهم واجمع قدر كبير من المعلومات عنهم ومكتفيش بس بالخريطة اللي لقيتها لكن اتفاجئت وانا براجع Google mape وبشوف الاماكن المذكورة دى .. كلها اماكن حواليها علامات استفهام والصدفة مستحيل تجمع بينهم كلهم .. 
وهبدأ كلام على كل منطقة بالترتيب خلونا الاول نبدأ بالاماكن على نفس امتداد خط مثلث برمودا واللي فيه اماكن تانيه عرفتها من الخريطة غير الاهرامات وحزام الصمت 
1 - hamakulia Hawaii بركان هاماكوليا في هاواي , رقمها على الخريطة ( 16 ) ودي جزيرة فيها بركان ضخم جداً و بركانها ده نشط طول العام وبيصب في المحيط 
2 – المنطقة رقم ( 18 ) مثلث برمودا
3 - Algerian Megaliths المنطقة رقم ( 20 ) , طاسيلي ناجر في الجزائر ودي مكان فى الصحراء الجزائرية اكتشفوا فيها صخور وكهوف مرسوم عليها رسومات غريبة جداً ومنها اشكال تشبه لحد كبير رواد الفضاء والطائرات الفضائية بالاضافة لرسومات غريبة تانية ملهاش أي تفسير .
4 – Mohenjo daro موهينجو دارو في باكستان المنطقة رقم ( 12 ) , بيسموها كمان Mound of the dead يعني تل الموتى , ده موقع اثري في مقاطعة السند في باكستان واتبنى سنة 2600 قبل الميلاد وكان من اكبر المستوطنات القديمة في حضارة وادي السند ومن اوائل مستوطنات الحضرية الرئيسية اللى كانت موجودة في نفس الوقت زي حضارات مصر القديمة وبلاد مابين النهرين وكريت .
4- المنطقة رقم ( 14 ) مثلث التنين وسبق واتكلمت عنه 
دي كانت المناطق الموجودة على نفس الخط الرابط بين مثلث التنين وبرمودا والاهرامات وحزام الصمت 
اما المناطق الموازية للخط المقابل
5 – المنطقة رقم ( 47 ) , جزيرة الفصح او جزيرة القيامة , جزيرة موجودة في المحيط الهادي الجنوبي وهي جزء من تشيلي بتبعد حوالي 3600 كيلومتر " 2237 " ميل عن غرب تشيلي القارية , وحسب معلومات ويكيبيديا عنها انها بتعتبر اكتر الجزر المعزولة المسكونة في العالم , والجزيرة مثلثية تقريباً في الشكل , والجزيرة مشهورة بالمواي , والمواي تماثيل صخرية موجودة على طول الأشرطة الساحلية , الجزيرة مليانه تماثيل غريبة متشابهة عبارة عن نماذج بشريه وحبه منهم ليه غطاء مستدير حوالين الراس وزنه لوحده 10 طن , وكل تمثال منها بيمثل الرأس والجذع واحيانا الدراعات من غير الرجلين والتماثيل دي اتعملت من الرماد البركاني بعد كبسه وضغطه وكل تمثال حوالى 50 طن , والعلماء لحد دلوقت ملقوش تفسير للغز التماثيل المتشابهه اللى موجوده بشكل منتشر في كل مكان بالجزيرة وخصوصاً سواحلها والجزيرة اكتشفت بالصدفة سنه 1722 م على ايد المستكشف الهولندي " ياكوب روجينفين "
6 – المنطقة رقم ( 49 ) the South Atlantic Anomaly شذوذ المحيط الأطلسي 
عشان الموضوع يكون واضح , بعد مابحثت ورا المنطقة دي بالذات كتير جداً .. لقيت ان
المنطقة دى نشرت عنها قناة دي نيوز الامريكية احتمال في فيديو بعنوان " هل هناك مثلث برمودا في الفضاء ؟ " ومقدم برامج دي نيوز جوليان هوغويت قال ان مثلث برمودا بيشابه تماماً منطقة فى الفضاء بتتحطم فيها حواسيب وأجهزة المحطات الفضائية وكمان الاقمار الاصطناعية بتقف او تتعطل والتليسكوبات البصرية , عشان كده سموها مثلث برمودا الفضائي , ووضح كمان سبب تسميه المنطقة بشذوذ المحيط الأطلسي ان طرف مثلث برمودا على بعد 3000 كيلومتر من المنطقة جنوباً وكمان أكد على ان مثلث برمودا الفضائي اكتشف في سنة 1958 وربط وجوده بوجود أحزمة " فان إلن " الإشعاعية اللي اكتشفت في نفس السنة واشار ان الاحزمة دي بتيجي على شكل حلقات من الجسيمات المشحونة من الرياح الشمسية او الأشعة الكونية اللي حبسها الغلاف المغناطيسي , والحلقة الخارجية اللى بعيد عن الارض هي الإلكترونيات اللي فيها طاقة عالية , اما الحلقة الحلقة الداخلية القريبة من الارض فهي إلكترونات وبروتونات فيها بردو طاقة عالية وممكن البروتونات تشيل الإلكترونيات من الذرات وده ضار للبشر لو اتعرضولها بمستويات معينة , وفوق البرازيل " المنطقة المحددة على الخريطة " في حلقة داخلية للحزام ده اقرب بكتير , وقريب بحوالي 200 كيلومتر تقريباً , وكمان قال هوغويت ان سكان الارض مش هيحسوا بالاختلاف او التأثير لكن المحطات الفضائية والاقمار الاصطناعية بتعدي من خلال الحزام ده اكتر من مره وبيعرضها للجسيمات المشحونة , وبرغم من ان محطة الفضاء الدولية عندها حماية اضافية لاجهزتها وهي بتمر بحزام فان الين الا ان الاجهزة والاقمار بردو بتبوظ وتتعطل فى نفس المكان , عشان كده بيعطلوا بنفسهم الاقمار وهي بتمر فى المكان , حتى تلسكوب الفضاء " هابل " مبيقدرش يرصد اللي بيحصل في المنطقة دى ولا يصورها حتى
7 – the Zimbabwe megaliths زيمبابوي العظمى المنطقة رقم " 41 " مدينة مهجورة كانت في يوم من الايام عاصمة مملكة زيمبابوي , واللي قامت من سنة 1100 لحد 1450 في العصر الحديدي , وبدأ بناء المدينة لأول مرة في القرن 11 واستمر البناء لحد القرن الـ 14 والأوروبيين لقوا المدينة بالصدفة في أواخر القرن 19
8 – المنطقة رقم ( 43 ) Wharton basin – wallaby fracture zone حوض وارتون – منطقة الكسر اللولبي , مفيش أي معلومات كتير عن المنطقة للأسف , غير ان المنطقة دي منطقة بحرية شمال شرق المحيط الهندي واتسمت باسم ويليام وارتون , بعد ماكتب عنها كتاب بيشرح فيه ان المنطقة دي حصل فى قاعها كسر لولبي ادى لإن المنطقة دى تكون عميقة جداً اكتر من اى منطقة حواليها ومش معروف الوقت اللى حصل فيه الكسر ده وايه السبب فيه , ومفيش أي تفسيرات من العلماء او كلام شائع عن المنطقة لإنها مش محل اهتمام ومأثارتش اهتمام العلماء نظراً لأنهم شايفين دي حاجة راجعة لضعف القشرة الارضية المتكونة تحت سطح المية في المنطقة دى وخصوصاً انها من المناطق الزلزالية القوية .. برغم من انهم محاولوش اكتشافها ومدوهاش الاهتمام الكافي وشايفين ان خوف البحارين من المرور بالمنطقة دي ملوش أي سبب
9 – المنطقة رقم ( 45 ) جزر فيجي او فيجية Fiji islands ودي دولة جزرية في ملانيزيا في جنوب المحيط الهادئ واتشكلت اغلب الجزر من خلال النشاط البركاني من حوالي 150 مليون سنة , وفي لسه نشاطات جوفية حرارية ملحوظة في جزيرتين اسمهم فانوا ليفو والتانيه تافيون , وفي القرنين 17 و 18 اكتشف الهولنديين والبريطانيين فيجي وبقت مستعمرة بريطانية الفيجيون كانوا محاربين اقوياء جداً ومن آكلي لحوم البشر الشرسين وبنوا احسن سفن فى منطقة المحيط الهادئ وكانو مصدر رعب للمناطق المجاورة ليهم , وفي واحد اسمه راتو تانو اتكتب عنه في اثارهم انه اكل 872 انسان وعملوا مناسبات كتير جدا كانو بيقتلو فيها البشر وكان عندهم كلمة بيستعملوها فى المجاملات كلمة " كلني " والسكان الحاليين للجزر الفيجية بيسمو الايام دي بإسم " زمن الشيطان " او نا غاونا ني تيفورو
****
وبعد ماجبت بنفسي خريطة وحددت الأماكن ورسمت الخطوط بينهم على حسب بحثي وتحديدي للأماكن بمساعدة جوجل ماب 
عشان اقارن بين تحديدي انا وبين الخريطة لقيت انهم فعلاً كلهم على خط واحد من غير انحناءات او ميل منطقة عن التانية 
في حاجه تانيه , لو جينا نربط التواريخ ببعض هنلاقي ان اغلب الحضارات اللي ذكرتها في المناطق دي كلها كانت فى وقت واحد زي ماقولت عن موهينجو دارو 
تعالوا نجرب سوا نربط التواريخ ..
جزيرة القيامة " 4500 قبل الميلاد "
مصر القديمة "3150 قبل الميلاد " 
موهينجو دارو " 2600 قبل الميلاد " 
زيمبابوي العظمى " من 1100 إلى 1450 في العصر الحديدي 
وعموماً كانت بداية العصر الحديدي في القرن الثاني عشر قبل الميلاد
يعني بين 1500 و 1000قبل الميلاد " 
جزر فيجي " 3500-1000 قبل الميلاد " 
طاسيلي ناجر عمر النقوش " 30 الف سنة "
والأشجار في المنطقة عمرها " 2000 سنه " 
يعني تقريباً كل التواريخ قريبة جداً من بعضها والفروق بينهم مش كبيرة 
****
الموضوع متفرع لحاجات كتير اوى .. والبحث فيه كان فعلاً شاق ومتعب ومجهد جداً ,, انا حاولت استشهد في المقال ده بالحقائق المثبته والأدلة اللى مفيش حاجة واحدة بتنفي عدم وجودها لأنى حاولت اشكك في الحقائق عشان اوصل للحقيقة لقيت ان كل المؤشرات بتوصل لنفس النقط اللي اتكلمت فيها .. ايوة في حاجات تانيه متكلمتش عنها .. بس الهدف من المقال ده بالذات , انى اشارككم اولاً بالادلة العلمية والحقائق المعروفة المثبوته ثانياً اتكلم عن الموضوع من وجهة نظر علمية تاريخية, 
مستنية ارائكم في الكومنتات ,
المقال والصور على الفيس بوك
المصادر :
https://en.wikipedia.org/wiki/Pyramid_power
https://en.wikipedia.org/wiki/Bovis_scale
فيديو مصطفى محمود :
https://www.youtube.com/watch?v=rFmp0foaimI
http://www.mysteriouspeople.com/Egyptian_Mystery.htm
http://www.bibliotecapleyades.net/piram…/esp_piramide_19.htm
https://www.pyradyne.com/pages/pyramid-technology
فيديو يتناول تفسيرات حول المثلثين الكريستاليين تحت مثلث برمودا 
https://www.youtube.com/watch?v=gYajkHqqqak
جيمس كاميرون يستعد مع ناشونال جيوغرافيك لرحلة بواسطة غواصة فى اعماق البحر لاستكشاف المنطقة 
https://www.youtube.com/watch?v=iGWuxFhZDGc
عرض خبر استكشاف الهرمين على قناة اجنبية :
https://www.youtube.com/watch?v=x9yyooFDXJI
http://beforeitsnews.com/…/bermuda-triangle-two-giant-under…
http://www.dailymail.co.uk/…/Mystery-Bermuda-Triangle-solve…
https://en.wikipedia.org/wiki/Vile_vortex


التسميات:

تعليقات

إرسال تعليق

المشاركات الشائعة