التسميات

جيفري دامر | سفاح الرجال

• تحذير لأصحاب القلوب الضعيفة ومن هم دون سن 18, المقال يحتوى على بعض الأحداث الشاذة والمثيرة للإشمئزاز لذا وجب التنوية , إقرأ على مسؤليتك الشخصية فقط *
هبدأ مقالي بإقتباس عن الأصمعي قال فيه :
"من لم يحتمل ذل التعلم ساعة , بقى في ذل الجهل أبداً "
ياريت قبل ماتشوف الفيديوهات والصور , تقرأ المقال الأول للآخر ..
قد تكون القصة اللى هحكيها عاديه ,, إلا أن في شيء مهم لازم اسلط الضوء شويه عليه .. يمكن بينكم واحد او اتنين هيهمه الأمر
"نبذة سريعة مختصرة عن حياته "
جيفري دامر , مواليد 21 مايو سنة 1960 من واليس الغربية , ويسكونسن , الولايات المتحدة الأمريكية .. في اسره مكونة من اربع اشخاص هو الإبن البكر وليه اخ اصغر منه , جيفري كان طفل عادي جداً زي اي حد في سنة وكان طفل خجول جداً , لكن اساتذته حسوا انه بيعاني من اهمال , وفعلاً .. جيفري كان مهمل من قبل ابوه وامه بسبب توتر في علاقتهم ببعض .. امه حاولت الانتحار بجرعة زائدة من حبوب الميبروبامات " Meprobamate "
وانفصل ابوه عن امه وبعدها بفتره ابوه اتجوز واحده تانيه .. كانت هواية جيفري المفضلة وهو طفل انه ياخد جثث الحيوانات الميته على الطرق ويشرحها عشان يشوف ايه جواها وايه شكلها من جوه 
في سن المراهقة بدأ اهتمام جيفري بالأفكار الإلحادية وكان مؤمن تماماً بنظرية التطور .. كان مؤمن ان مفيش حساب ومفيش رب
وبدأ يمقت المجتمع وافكاره واعتقادات الجميع رغم ايمان ابوه وجدته بالمسيحية ..وبالفعل ألحد ودي كانت بوابة جيفري لدخول عالم الجريمة .. تصرفات جيفري بدأت يلاحظ عليها انها غير طبيعية سرق مانيكان من محل ملابس ومارس شهوته عليها .. عاش مع جدته 6 سنين قبل ماتطرده من بيتها بسبب القبض عليه متعري فى الشارع
* التفاصيل * 
*بحب افكر تاني اصحاب القلوب الضعيفه واللى تحت سن 18 ميقروش *
****
بدأ دامر مسيرته الإجرامية لما كان بيروح للأماكن اللي بيتواجد فيها الشواذ او كان بيروح لنوادي وملاهي ليلية يدور عن ضحيته اللي دايماً كانت " شاب ذكر " كان بيختارهم بعناية , الشباب اللي بتهرب من بيتهم او محدش بيسأل عنهم ومحدش بيلاحظ وجودهم من عدمه 
فكان بيغريهم بمبلغ او يوعدهم انه هيشتريلهم كحول ومخدرات لو راحوا معاه لشقته , وبمجرد ما الضحية بتستجيب لعرض جيفري بتلاقي حتفها.. بيخنقهم لحد مايموتوا ويفصل جلودهم عن اللحم والعظم ويمارس معاهم " النيكروفيليا – جماع الأموات " , وكان بيفضل انه يحتفظ بأجزاء من ضحاياه زي هياكلهم العظمية وده طبعا بعد مابياكل لحمهم ويحتفظ بالباقي في التلاجه
دامر ارتكب اول جريمة ليه سنة 1978 , كان عمره 18 سنة , قتل شاب في سنه اسمه ستيفن مارك هيكس " steven mark hicks " كانوا بيشربوا كحول سوا .. وكان ستيفن عايز يروح لحفله موسيقى الروك , لكن دامر أصر ان ستيفن يروح معاه بيته , فوافق ستيفن .. ولما الشاب طلب انه يمشي من الشقه جيفري مرضيش , وضربه على راسه ضربتين ففقد الوعي , قعده جيفري على كرسي وخنقه لحد ما مات وجرده من ملابسه ومارس فعلته البشعه معاه وفي اليوم اللي بعده قطع الجثه عشان يقدر ينقلها ويدفنها في " الفناء الخلفي " لبيته .. لكن بعد اسابيع طلع الجثة مره تانيه وحطها في حمض عشان اللحم يدوب , وبمجرد ما انتهى
خد العضم وسحقه بـ " مطرقة " ضخمه لحد ماتحول العضم لمسحوق .. خده ورماه في غابة قريبة من بيته
سنة 1979 أصر أبوه يدخله الجيش الأمريكي واتعين هناك كأخصائي طبي في فورت سام هيوستن " Fort sam Houston " وبعد تعيينه بمدة اعترف واحد من الجنود انه اتعرض للإغتصاب من دام رده غير انه اتعرض للتعذيب كذا مره على ايديه ,, وبسبب افراط دامر في شرب الكحول اتدهور اداءه في الشغل , وسنة 1981 اعتبر أداءة للخدمة العسكرية غير مناسب وخرج من الجيش رسمياً وبعدها سافر لميامي لأنه مكنش عايز يقابل ابوه واشتغل هناك في محل سندوتشات وأجر غرف في فندق قريب , وبعدها اتصل بأبوه عشان يقوله انه راجع لأوهايو ..
في سنة 1982 وقبل مايخسر وظيفته الشرطه قبضت عليه بتهمة التعرض الغير لائق للنساء والأطفال , وأدين بغرامة مالية قيمتها 50 دولار ده غير تسديد تكاليف المحكمة .. وفي سنة 1986 اتقبض عليه تاني بتهمة " الإستمناء امام طفلين " اعمارهم لا تتجاوز 12 سنة , لكنه برر تهمته بحجه انه كان بـ " يتبول " مش اكتر وبما أن مفيش شهود عيان فالتهمة اتغيرت لسلوك غير منضبط واتسجن تحت المراقبة لمدة سنة ..
وسنة 1987 راح جيفري عشان يأجر غرفة فى فندق The Ambassador Hotel مع شاب في لوس انجلوس , كاليفورنيا .. وفي اعترافات جيفري قال انه بس كان ناوي " يمارس الشذوذ " مع الشاب وياخد مخدرات لكن تاني يوم الصبح لقى الشاب فاقد الوعي والدم سايل من بوقه وفي كدمات واضحة على جسمه وأضاف أنه مش فاكر على الإطلاق ايه اللى حصل وده اضطره يتخلص من الجثة , فإشترى شنطة كبيرة وحط الجثة جواها ونقلها بيته .. وقال انه قطع الراس والذراعين والرجلين بعدها شال العضم والجذع من الجسم قبل مايقطع اللحم لأجزاء صغيرة وحطها فى اكياس بلاستك .. وبعد كدة لف العظم في ورق وضربها بالمطرقة لحد ماتحولت لشظايا صغيرة , والعملية كلها خدت حوالي ساعتين .. اما الراس فإحتفظ بيها .. وبعد اسبوعين خد الراس وحطها في " قدر – حله " فيها ميه بتغلي واضافلها منظف صناعي " An alkali-based industrial detergent عشان يتخلص من اللحم ويحتفظ بالجمجمة , لكن الجمجمة اتكسرت وهو بيحاول تبييضها وعشان كده رماها واتخلص منها .. بعد مارتكب الجريمة دي زاد نشاط دامر في نوادِ المثليين وبقى يستخدم حبوب منومة لضحاياه .. لكن الجريمة اللي اثارت جدل كبير , هي محاولته لقتل شاب 14 سنة اسمه جيمس دوكستاتور " James Doxtator " خده معاه بيته وعرض عليه مبلغ 50 دولار عشان يتصور " صورة عاريه " معاه , وبعد ماقبل الشاب وراح بيت دامر , تعدى عليه جيفري واغتصبه وحاول يقتله لكن الولد قدر يهرب منه ويجري من البيت بسرعه ودامر جري وراه وحاول يمسكه .. شهود العيان كانو بنتين شافو الولد " عاري " وبينزف ودامر واقف معاه .. فاتصلوا بالشرطه وحضرت الشرطه فوراً , لكن برودة اعصاب دامر وعدم اتقان الشاب للغة الإنجليزية لعبوا دور هام فى ان الشرطه يسيبوا دامر يمشي .. قالهم انه عشيقه وانه بيمر بحاله نفسيه صعبه وقدر دامر يرجعه البيت وخدره وخنقه في قبو بيته .. بعد كدة قطع راسه واحتفظ براسه كتذكار .. جرائم دامر كانت كتير جدا واتعرف بانه كان بيثقب راس الضحايا وبيسكب جواها حمض عشان يدوب اللحم بسرعة ,, لكن اخر جرائم دامر كانت
فى سنة 1991 دامر عرض على تلات شبان يروحوا معاه البيت مقابل 100 دولار , لكن راجل واحد من بين التلاتة وافق وكان اسمه تريسي إدواردز " Tracy Edwards عنده 32 سنة , أخده جيفري لأوضة النوم وجاب معاه سكينة وقرر ياخد معاه صور " عارية " عشان يرضي جيفري , لكن حس بتصرفات مش طبيعية من جيفري خصوصاً ان جيفري قاله انه ناوي يقتلع قلبه وياكله فمنع الشاب جيفري من انه يعتدي عليه او يلمسه .. وخرج جيفري يتفرج على التلفزيون .. والشاب قعد جمبه وطلب منه يدخل الحمام .. وفى الوقت اللى قام فيه جيفري يوريه مكان الحمام .. هرب بسرعة الشاب من البيت ووقف عربية شرطة بالصدفة كانت ماشية جواها شرطيين من شرطة ميلووكي , واتهم دامر بمحاولة قتلة , وراح مع الشرطيين عشان يقبضوا عليه في شقته وبعد ماقتحموا الشقة وفتشوها .. لقوا تحت السرير سلم بيؤدي للقبو اللى بيقطع فيه جيفري ضحاياه ولقوا صور بشعة لبعض الضحايا وفوجئوا كمان برؤوس الضحايا في التلاجة واطراف ليهم واعضاء تناسلية , حاول دامر يقاوم الشرطيين لكنه استسلم بسرعة وردد " لما فعلته يجب أن اكون ميتاً " وكانت دي نهاية جيفري دامر ..اعتقل بتهمة التحرش الجنسي بالأطفال وارتكاب جرائم جنسية وكمان اتهم بقتل 17 شخص بين عام 1978 و 1991 لحد ماتضح انه كان بيعاني من اضطرابات نفسية واضطراب الشخصية الحدية فإتحكم عليه بالسجن مدى الحياة في سنة 1991 اتنقل لسجن في كولومبيا واتحط في زنزانة انفرادية خوفاً على سلامته ولأنه بيحب يتلامس مع السجناء , وبعد سنة من السجن الانفرادي اتنقل لوحدة تانية واشتغل هناك في تنظيف الحمامات لمدة ساعتين في اليوم وبعد وقت قصير طلب دامر من المحقق يديله نسخة من الكتاب المقدس " الإنجيل " ورجع تدريجياً للديانة المسيحية وسنة 1994 اتعرض للإعتداء من شريكة في الزنزانة , اللي ضربة في زوره بشفره حلاقة ودة ادى لجروح بليغة اصابت جيفري لكنه اتعافى .. ويوم 28 نوفمبر سنة 1994 لقوا دامر نايم على الارض ومضروب على راسه كذا ضربه وكان لسه عايش ,, لكن بعد نقله للمستشفى بساعة اعلنت وفاته 
***
من تصريحات زميل جيفري فى الجيش " جو كابشو " اللي تعرض للاعتداء والاغتصاب على ايد جيفري .. بعد 24 سنة من الحادثة لازال بيعاني من الإكتئاب وبقاله 13 سنة بيتعالج في مصحة نفسية , قال :
" لقد عشت مع دامر في ظروف بالغة القسوة لمدة 18 شهراً عندما كنا نخدم سوياً في نفس الوحدة العسكرية بالجيش الامريكي بألمانيا وقد اجبرت على العيش معه في غرفه واحدة وماهي الا فتره يومين او ثلاث ايام من وصولي الى المعسكر حتى بدأ مسلسل الرعب عندما بدأت الهجمات تنهال علي من كل حدب وصوب لقد تعرضت للإعتداء من دامر 75 مرة على اقل تقدير خلال تلك الفترة " 
وعلق على الجزء الخاص بعثور الشرطه على اجزاء واطراف بشرية فى قبو جيفري وقال " أعتقد أن دامر كان يقتل الناس في ألمانيا أيضاً بسبب نهمه وتعطشه للدماء. فقد كان يخرج من المنزل لعدة ساعات ثم يعود ويداه وملابسه ملطخة بالدماء. وخلال تلك الفترة تعرض سبعة أشخاص للقتل بالقرب من القاعدة العسكرية ومن ضمنهم شابة مجندة تم التمثيل بجثتها. وكان دامر يحتفظ بثلاجة في غرفتنا وكانت هذه الثلاجة مغلقة على الدوام. والآن أدركت ما عثرت عليه الشرطة في الشقة ".
**
قبل موت جيفري بسنة , ظهر فيلم بيروي قصة حياتة سنة 1993 وكان اسمه 
جيفري دامر : الحياة السرية 
Jeffrey Dahmer : the secret life 
و بعد وفاته صدر فيلم تانى سنة 2002 اسمه Dahmer 
وسنة 2006 صدر فيلم 
نهوض جيفري دامر 
Raising Jeffrey dahmer
وسنة 2015 صدر مسلسل 
قصة رعب أمريكية : الفندق 
American Horror Story : Hotel 
اللي كان جيفري واحد من شخصياته
الفيلم الوثائقي اللي راجعت فيه القصة اتكلم عن جزء ضخم جدا من معتقدات جيفري الإلحادية اللى كانت هي السبب فى جرائمه من اول " الشذوذ " لحد " القتل " لحد " أكل لحوم الضحايا " 
في الفيديو المرفق ترجمته ليكم لأني للأسف مقدرتش اجيبلكم المقطع مترجم " لقد قضى جيفري اوقاته في الكنيسة وهو طفل ومع جدته وهو شاب بالغ ولكنه فقد دينه بسبب ارتكابه الجرائم , دامر ارجع اللوم على أفكاره الإلحادية ونظرية التطور في ارتكابه جرائم القتل 
والد جيفري : لقد قال اذا كان كل ذلك حدث بشكل طبيعي فما الحاجة إلى إله , ألا أستطيع ان اضع القوانين الخاصة بي ؟ فمن يملكني ؟ انا املك نفسي ! "
وفي الفيديو التاني اتكلم فيه جيفري شخصياً عن كذبة نظرية التطور ووضح فيه ان كلها خرافات بعد ما ساعده ابوه بكتب علمية توضح خطأ النظرية " ملحوظة : الفيديو فى اوله نبذة سريعة عن قصة جيفري وهي خطأ تماماً , ماعدا الجزء الخاص بمقابلته مع ستون فيليبس و الترجمه على الفيديو كمان صحيحة 100% "
جيفري دامر .. قصته اتحفرت فى التاريخ وخُلد فيه كسفاح بلا قلب وبلا رحمة , نظرية واحدة غير مؤكدة لم يثبت صحتها واضطرابات في شخصيته وطفولته وصلته لأنه يكون سفاح بالبشاعة دى وهنا جه دور الاقتباس , "من لم يحتمل ذل التعلم ساعة , بقى في ذل الجهل أبداً ".. 
Those whom God rebuked for their lack of faith were not men who denied God with the top of their minds, but men who, while apparently incapable of doubting him with the top of their minds, lived as though he did not exist. - John Baillie
اولئك الذين وبخ الله عدم إيمانهم ليس لانهم انكروا وجود الله بعقولهم ، ولكن لانهم بالرغم من انهم عجزوا عن التشكيك في وجوده ، عاشوا كما لو انه لا وجود له. - جون بيلي
Atheists express their rage against God although in their view He does not exist. -C.S. Lewis
الملحدين يعبرون عن غضبهم ضد الله على الرغم من انه من وجهة نظرهم هو غير موجود. - س. لويس
• انا بعتذرلكم جداً انى المرة دي مش هحط صور للضحايا غير وهما بشكلهم الطبيعي تقدر تشوفهم من هنا
** 
تقدر تشوف الفيلم الوثائقي كامل من هنا " غير مترجم " 
http://bit.ly/2iZ3t3Z
مقابلة جون دامر مع ستون فيليبس كاملة " غير مترجم " 
http://bit.ly/2i1XA1O



التسميات:

تعليقات

إرسال تعليق

المشاركات الشائعة