قضية إليسا لام | اثارت جدل العالم

القصة إبتدت في فبراير 21 سنة 2013 , زوجين من السياح البريطانيين " مايكل وسابينا باو " كانوا في فندق " سيسل " في ولاية لوس أنجلوس الأمريكية .. بلغوا إدارة الفندق بشكوى من حنفيات المية في اوضتهم .. تدفق المية كان مضطرب مش مظبوط والمية كانت بتنزل داكنة اللون قريبة من السواد وملوثة .. وإدارة الفندق اتحركت فى الحال وفحصوا خزانات المية على سطح الفندق .. لكن اثناء الفحص .. لقوا جثة بنت كندية صينية الأصل إسمها " إليسا لام أو لام هو يي " عندها 21 سنة , طالبة في جامعة كولومبيا البريطانية في فانكوفر ..
غرقانة نصف عارية في واحد من خزانات المية .. وعلى الفور الفندق بلغ إدارة الشرطة في لوس انجلوس .. وبعد وصول الشرطه وفحص مكان الحادث والجثة أعلنوا مبدئياً عن وفاة إليسا ومرضيوش يصرحوا بأي حاجة تانية لحد مايشرحوا الجثة ويعلنوا سبب الوفاة ويقولوا لو في شبهة جنائية فى الموضوع .. 
واحد من النزلاء وصف المية قائلاً
" كان طعمها في غاية الغرابة .. طعم تعجز الكلمات عن وصفه " 
وقالت نزيله تانيه " الاستحمام كان تجربة مروعة , عند فتح الصنبور كانت المياة تأتي سوداء لحوالي ثانيتين ثم تعود بالتدريج للونها الطبيعي " النزلاء مشتكوش للادارة على الفور واستمروا في استعمالهم المية دي لمدة اسبوعين وافتكروا ان الموضوع طبيعي 
تعالوا نرجع بالوقت اسبوعين اتنين بس 
قبل اسبوعين تم التبليغ عن اختفاء " إليسا " واخر مره شوهدت فيها كانت في فندق "سيسل " في آخر أيام يناير 2013
والغريب ان شرطة لوس انجلوس دورت بشكل مكثف في الفندق بالكامل قبل مايكتشفوا الجثة بتلات اسابيع بما فيها سطح الفندق واستخدموا كلاب البحث لكن وقتها ملقوش اي اثر لإليسا .. 
المثير للدهشة كمان ان الخزان اللى لقوا فيه جثة إليسا مفيهوش اي فتحات سهلة الاستخدام او الفتح بسهولة .. لان الخزان مقفول بمسامير ضخمة بالاضافة كمان لإن مفيش سلم للخزان وطوله مترين ونص .. رجال الانقاذ كمان اضطروا يقطعوا فتحة مناسبة من الخزان عشان يستخرجوا الجثة بالإضافة لتصريح الفندق والشرطة بإن الوصول لسطح الفندق ذاته شيء شبه مستحيل لحد غير العاملين المختصين بس 
بعد مالقوا جثة اليسا وفي اطار البحث , ادارة شرطة لوس انجلوس اتحفظت على اشرطة كاميرات المراقبة وكاميرات الاسانسير .. اخر ظهور لإليسا في مقطع ( المرفق مع المقال الاصلي شوفه من هنا ) وعلى حد وصف المحققين كان غامض ومخيف 
بتظهر فيه إليسا وهي داخله الاسانسير وتبدأ تدوس على زراير الاسانسير بشكل عشوائي مره واحدة وتتراجع بخوف كأن في حد بيطاردها وتستنى الباب بخوف عشان يتقفل لكن باب الاسانسير ميتقفلش .. فتبدأ تخرج بحذر تشوف لو كان فى حد معطل الاسانسير من بره لكنها متلاقيش حد .. فيبان عليها الخوف والرعب وتلزق ضهرها في حيطة الاسانسير كانها بتستخبى من حد والغريب ان باب الاسانسير مش راضي بردوا يتقفل .. فتبدأ إليسا تخرج وتدخل تاني وفجأة تقف بره في توتر .. ويبدأ الجزء المرعب .. إليسا بتبص لشخص او حاجة مش ظاهرة في المقطع وباين عليها الذعر وتحرك جسمها وايدها في اشارات غريبة وغامضة كأنها بتكلم حد مش موجود وينتهي الفيديو بخروج إليسا واختفائها , والأغرب من ده .. ان بعد ماتمشي اليسا .. الاسانسير بيشتغل عادي ويبدأ ينفذ الاوامر اللى ادتهاله اليسا .. وده فجر أطنان من الدهشة للمحققين عن سر تصرفات اليسا الغريبة 
المحققين ارجعوا سبب تصرفات اليسا الغريب لإنها ممكن تكون تحت تاثير مخدرات او كحول وده دفعها تنتحر .. لكن في يوم صدر تقرير الاطباء من مشرحه " ركن المقاطعة " في لوس انجلوس بيفيد ان الوفاة حصلت نتيجة " غرق عارض " وملقوش في الجثة اي اثار ضرب او مقاومة او عنف او اعتداء جنسي , والاكثر غرابة في الموضوع انهم ملقوش اي بقايا مخدرات او كحول في نتيجة تحليل الدم الخاصه بالجثة ماعدا بقايا عقار عادي " محسن وظيفي ومعالج حموضة " واتذكر مع وصف التشريح ان الجثة لقوها متحللة شبه مجرده من ملابسها اللي ظهرت بيها في الفيديو .. مع مفتاح غرفة المراقبة في الفندق اللي أقسم عامل الغرفة انه متسرقش منه شخصياً !
ده غير ان لبسها ومتعلقاتها الشخصية كانت بتطفو على المية جمبها ,والمحققين افترضوا حاجتين , اول حاجة .. ان اليسا اتعرضت للقتل في مكان فى الفندق وجثتها اتشالت للسطوح والقيت فى الخزان ,, الحاجة التانية ان اليسا ماتت منتحرة ودي الفرضية اللي قبلها المحققين للآخر بما انم فيش اي اثار لعنف على جثتها ,, وتاريخ اليسا الطبي كمان خلاهم يتمسكوا بالفرضية لأنها بحسب السجلات كانت بتعاني من مرض نفسي اسمه اختلال ثنائي القطب ,, بيتميز بفترات من الكآبة الشديدة يجي بعدها نوبات من الابتهاج غير الطبيعي وممكن يؤذي المريض ويخليه يعمل حاجات بتتسم بالتهور والطيش, مكتب المحقق الشرعي في مقاطعه لوس انجلوس خد اربع شهور عشان ينشر تقرير تشريح الجثة , ورفع ضيوف فندق سيسل دعوى قضائية ضد الفندق على خلفية الحادثة وقدم اهل اليسا دعوى منفصله واترفضت الدعوى في عام 2015
الفيديو انتشر على النت بسرعة والمشاهدين ذكروا ان الفيديو اصابهم بالقلق .. والتفسيرات اختلفت وتنوعت واثار الحادث تساءلات كتيرة جدا والمهتمين بالموضوع على النت لاحظوا تشابه غير عادي بين موت اليسا وقصة فيلم الرعب " Dark water " اللي انتج قبل الحادثة بـ 8 سنين في 2005 مقتبس عن فيلم ياباني بنفس الاسم انتج قبله بـ تلات سنين سنة 2002 والقصتين بيتكلموا عن ام وبنتها الصغيرة راحوا لفندق واتعرضوا فيه لمواقف مخيفة عن وجود مية داكنة بتتسرب من سقف الاوضة وحاجة بتخوف بنتها ومشاهد مرعبة للبطلة وبنتها في الاسانسير والبطلة كانت عالقة فيه , مية ملوثة سودة بشهر آدمي بتنزل من الحنفيات في اوضتهم واللى اكتشفوه مع تطور الاحداث في الفيلم ان الرعب اللى عانوا منه نتيجة لعنة بنت غرقت في خزان المية الخاص بالفندق وان البنت الصغيرة بنت بطلة الفيلم كانت اسمها " سيسيليا " وده الاسم المؤنث لـ"سيسل " نفس اسم الفندق اللي حصل فيه الحادثة , ده غير ان تاريخ الفندق زاد الموضوع غموض ,الفندق استضاف شخصيات غريبة وغامضة جدا زي
القاتل المتسلسل " ريتشارد راميزر " اللي قتل 14 ضحية قبل مايتقبض عليه
والقاتل النمساوي " جاك انترويجر " كمان اقام في نفس الفندق
بالإضافة لـ اليزابيث شورت القتيلة في قضية مشهورة في الاربعينيات في لوس انجلوس اتسمت قضيتها بـ " الداليا السوداء " ارتبطت بالقتل والتعذيب والتشوية وبردو اقامت في فندق سيسل قبل حادثتها 
ده غير حالات الانتحار لأسباب مجهولة ..

هيلين جيرني ماتت منتحرة بعد مانطت من شباك اوضتها في الدور السابع سنة 1954

جوليا مور ماتت منتحرة بعد مانطت من شباك اوضتها في الدور التامن سنة 1962

بولين اوتون نطت من شباك اوضتها في الدور التاسع ووقعت فوق راس راجل كان ماشي في الشارع ومات معاها 
***
من الحاجات اللى ألصقت لقضية اليسا هو انتشار وباء السل في حي سكيد رو القريب فندق سيسل والوباء د هادى لموت العشرات واصابة الألوف ودخل المدينة كلها في حالة طوارئ , قالوا ان الجرثومة المسببة للوباء ده اسمه " لام اليسا " وان ده نفس اسم اليسا لام بس بالمقلوب لكن بالبحث " لام اليسا هي test kit يعني اداة اختبار للفيروسات وبتباع على امازون , وده مش اسم الجرثومة .. اسم الجرثومة المسببة للوباء " mycobacterium tuberculosis " 
القضية تبان كجريمة نفذت بإحكام وذكاء شديد , لكن مع الحقائق وتقرير التشريح والتحقيقات , الباب فضل مفتوح للتساؤلات مش بس من السلطات لكن من المهتمين بالغموض في العالم , زي .. ايه سر تصرفات اليسا في لحظاتها الاخيرة بما انها مكانتش تحت تاثير المخدرات ؟ ياترى ده جنون مؤقت او لوثة عقلية ؟ ولو كان ده التفسير .. ازاى وصلت جثة اليسا للخزان المقفول بإحكام , وازاى وصلت للسطح اصلاً برغم اجراءات الفندق المشدده بخصوص الدخول للسطح ؟ , الاسئلة دي اتسابت من غير اجابات للباحثين وعشاق الوصول للحقيقة حوالين العالم 
" قررت شركة سوني بيكتشر انتاج فيلم هوليوودي عن القضية بإسم The bringinng " وبدأت فيه فعلاً بيستخدم القضية كخلفية درامية . 
لكم حرية التعليق

فيلم تخيلي للقضية :
https://www.youtube.com/watch?v=nNjJ0TqUH0Y

مصادر : 
http://bit.ly/2hTt2lO
http://bit.ly/2h8SYZH
http://huff.to/2h8NIFy
http://bit.ly/1dZ7jTv

#يارا_عمر
#إليسا_لام