التسميات

تغيرات المناخ والظواهر الغامضة | ماذا يحدث للأرض ؟

سنة 2014 قال وزير خارجية فرنسا " لوران فابيوز " : " أنتم ونحن نعرف ذلك .. أننا على حافة هاوية مناخية , في الواقع لدينا 500 يوم لتجنب فوضى مناخية .. " وفي لقاء تاني بينه وبين جون كيري في نفس اليوم قال " لدينا مشكلة مهمة جدا بخصوص الفوضى المناخية , كما قلنا لدينا 500 يوم لتجنب تلك الفوضى وأعلم ان اوباما وكيري يعملان على هذا الموضوع " وفي لقاء تانى لأوباما قال : 
" هناك العديد من المشاكل التي نواجهها , الإرهاب , عدم الإستقرار , عدم المساواة , الأمراض , ولكن هناك مشكلة واحدة ستحدد ملامح هذا القرن بشكل كبير أكثر من غيرها , وهي التهديد المتزايد للتغيير المناخي 
في العلوم المتعمقة التي تقول بأن هذا التهديد البعيد قد انتقل للحاضر وبشدة 
ونرى من احداث الطقس الشديد المتكرر التي نعيشها بالضبط ماتعني تلك التغييرات "
في الصور المرفقة مع الموضوع توضيح للتغير المناخي 
****
القصة بدأت من سنة 2004 بشكل غريب كل حاجة اتقلبت رأساً على عقب ! .. بدأ الذوبان الأول في التاريخ الحديث للغطاء الجليدي في القطب الشمالي , وبدأت المنطقة المتجمدة تطلع بشكل دائم " غاز الميثان السام الناتج عن موت الحيوانات البحرية المجهرية والحيوانات الصغيرة الي بتعتمد على السلسله الغذائية دي , وحصل بطئ في حركة تيار الماء البارد في قاع البحر من الشمال للجنوب اللى بتحمل التغيرات الجوية فى الكوكب , وحصل عدم استقرار لموازين الارض الاساسية نفسها , وزاد النشاط البركاني والزلزالي 
وكميات الغازات الدفيئة في الغلاف الجوي وكريات البلازما فى الجو ,وطبعا الاسباب معروفة , ومن ضمن الحاجات الغريبة اللى بدأت تحصل " نفوق جماعي للحيوانات " مجهول السبب .. طلعت تفسيرات كتيرة جداً من 2004 لحد سنة 2011 اللى اتسجل فيها اكبر عدد من حالات النفوق الجماعي للحيوانات , والتفسيرات اللى اتداولت كانت بتتكلم عن تغير المناخ وسببها فى موت الحيوانات المفاجئ ده ناس تقول المجال المغناطيسي للأرض هو السبب وناس تقول الاحتباس الحراري وناس تقول التغير المناخي نفسه بشكل عام هو اللى ادى للنفوق الجماعي , قبل مانعرف ايه اللى حصل فى اواخر شهور 2016 لحد شهر فبراير 2017 اللى مش بس حالات النفوق لكن ظواهر تانية اكثر غرابة 
حبيت اعرض عليكم جرد لحالات النفوق اللى اتسجلت سنة 2011 وغيرها وبعض التفسيرات ليها 
**
في يناير 2011 البحر جرف اعداد كبيرة جداً بالمئات من سمك " النهاش " الميت لشواطئ شبه جزيرة كورمانديل في نيوزيلندا , ووصف الصيادين اللي كانوا فى المكان ان البحر " اتفرش " بالسمك الميت ده , واللى خلى الحادثة دي غريبة .. ان السمك كان من غير عيون ! وقالت الجهات الرسمية ان السمك مات من الجوع , لكن شهود عيان قالوا ا ن الكلام ده مش صحيح لأن في غموض فى الحادثة لسه متحلش !
**
وفي يناير سنة 2005 , على شواطئ كاليفورنيا المية جرفت اعداد تقدر بالآلاف من الحبار , وبيعرف النوع ده بإنه بيعيش فى أعماق بتزيد عن 700 متر 
ودي حاجة خلت العلماء مش قادرين يحددوا اسباب الموت الجماعي , والنظرية اللي فرضوها للحادثة هو ان الحبار اتسمم , لكن ان كانت المية اتلوثت بمواد سامة فا المفروض ان مش الحبار بس اللي يتأثر بالسم ! لكن انواع تانيه كمان ..ولو كان حبار واحد او اتنين اتناولوا حاجة سامة فامش معقول ان يموت العدد الضخم ده كله , وحصل كمان حاله مشابهه في سان ديجو سنة 2002 بسبب السموم والى ادى بشكل غير مؤكد للإنتحار الجماعي
وفي سنة 2009 اتوجهت الحيتان في تسمانيا للشط ومات اكتر من 400 منها بدون اي تفسير , ووصلت 200 منها لجزيرة كينج آيلند مع عدد من الدلافين وحاول المنقذين انهم ينقذوهم لكن بمجرد ماوصلوا اتوفى 140 حوت وانقذوا باقي الحيتان وسبع دلافين , وقبل الحادثة بشهور اتوجه بردو 150 حوت طائر للساحل الغربي من تسمانيا وبدأت تتوالى الحوادث المشابهة واتوفى حيتان كتيرة جدا بعد ماوصلت لشواطئ نيوزيلندا فى سنة 2014 و 2015 
وكمان الجمبري في مدينة كورونيل بأعداد ضخمة , وفي 2012 في بحيرة إيري في أونتاريو , عشرات الآلاف من الاسماك النافقة وطيور النورس وكان من ضمن النظريات الى حاولت تفسير الموضوع هو تعرض الاسماك للانعاكس الحراري ودي ظاهرة طبيعية بيرتفع فيها الماء البارد قليل الأكسجين للسطح فبيؤدي لإختناق السمك لكن الباحثين والعلماء ملقوش اى دليل على صحة النظرية دي 
طيب بعيد عن البحر بقى شوية لإن ممكن حد يقولي ان الاسباب بترجع للتلوث في مياة البحر نفسها هقوله مظبوط كلامك لكن 
في حادثة اتسجلت سنة 2005 رعاة الأغنام الأتراك سابو شغلهم بعد ما نط 1500 رأس من الأغنام اللى بيربوها من منحدر عالي جداً وبدأ الموضوع بعد مانطت واحدة من الأغنام وتبعها عدد كبيرة جدا من الأغنام الباقية ومات منهم 400 بعد ماوقعوا من ارتفاع 150 متر واتبقى 1100 ساعدت اجساد الاغنام الباقية اللى وقعت قبلهم فى المنحدر على انها تحميهم من الموت ولحد دلوقت مفيش اي تفسير للتصرف الغريب دة ؟! طب الموضوع موقفش لحد كدة ممكن تقول عادي ! الاغنام اتصرفت بجنون مش اكتر واحدة نطت فا الباقي قلدها .. تصرف عادي ! بس الموضوع فعلاً مش عادي .. في احد المناطق السويسرية حصل نفس الموضوع مع الأبقار , على مدار 3 ايام ماتت 28 بقرة وثور بعد مارموا نفسهم من مكان عالي جداً والعلماء قالوا ان مستحيل الإنتحار الجماعي ده يكون مجرد تصرف جنوني من الحيوانات دي وان مفيش حاجه حصلت قبل كدة بالشكل دة 
واختم الحوادث دي بحادثة اغرب 
في تشيلي آلاف من طيور الفلامنجو , و1200 من البطاريق و60 من البجع ماتوا في غضون شهرين , والموت الجماعي للطيور عموما في السنوات الأخيرة فى تزايد بينذر بالخطر على حد وصف العلماء والباحثين , في قرية جاتينجا الهندية في كل سنة بتطير الطيور لهناك وتموت وفي اسئلة كتيرة حوالين الظاهرة دي , ليه الطيور بتعمل كدة ؟ وليه بيحصل الموضوع ده في شهر سبتمبر بالذات وفي وقت مغيب الشمس ؟!
****
2016 – 2017 
كلنا فاكرين الفترة اللى كان فيها شتاء 2016 صعب جداً وحصل فى اسكندرية ومناطق مختلفة فى مصر ارتفاع لمنسوب مياة الأمطار ومات بسببها ناس كتير جداً وكمان حصل اعصار شديد لأول مره فى محافظة دمياط
كمان فى فتره فى الشتاء الدنيا كانت بتمطر تلج زي ماحصل في التجمع الخامس واتنشرت عن المنطقة دي بالذات صور كتير جداً للتلج ويمكن فى ناس منكم قالوا ان التلج بينزل على هيئة قطع مربعة , الحقيقة ان العالم كله اتاثر بالتغير المناخي المفاجئ والمخيف ده ! ومش بس احنا اللى نزلنا عندنا تلج على شكل مربعات صغيرة , لا كمان بلاد تانيه عربيه واجنبية , منهم استراليا , المملكة العربية السعودية , الجزائر 
" فيديو مرفق مع المقال للتوضيح " 
الظاهرة مش غريبة على انها تحصل في امريكا وأكد خبراء الارصاد الامريكان ان العاصفة الثلجية دي من 2008 وهي بتحصل في امريكا في كل شتاء لكن سنة 2016 كانت اكتر سنة الموضوع زاد فيها عن حده لدرجة ان التلج كان بحجم كرة بيسبول وقال الباحثين الغريب ان العاصفة بتغير مكانها من مكان لآخر على نطاق اوسع وبتوصل لأماكن معروفه بإعتدال مناخها شتوياً وده محصلش قبل كدة ابداً
ومن قوة العاصفة الثلج كان بيخترق سقف المنازل وبيكسر زجاج العربيات وبيسيب اثره علي شكل العربية نفسه 
ولأول مره حصل اعصار في الجلفة بالجزائر في وسط منطقة صحراوية قاحلة ومحصلش قبل كدة ان اعصار يضربها 
.. 
ده غير كمان ظهور فجوات فى الأرض بشكل مفاجئ وغريب العلماء مفسروش لحد دلوقت ايه السبب فى ظهور الفجوات دي فى الارض في اماكن مختلفة 
من غير اي تسجيل لزلزال او سبب علمي واضح لظهور الفجوات دي من تلقاء نفسها والمعروف انها بتحصل من 2008 لكن زادت في الفترة الاخيرة جداً
" مرفق صور للظاهرة فى دول مختلفة " 
ده غير نفوق الحيتان فى بلاد عربية واكيد كلكم سمعتوا عن نفوق الحيتان فى مصر واشهر حادثة نفوق كانت لحوت فى شاطئ الغرام في محافظة مطروح
في اواخر 2016 انتشر بشكل واسع جداً مشاهدات لأضواء غريبة فى السماء عرضها التلفزيون الامريكي , وظاهرة " صراخ السماء " او همهمة السماء اللى كانت بتحصل فى بلاد اوروبية لمدة سنتين , فى اماكن مختلفة وصولاً لبلاد عربية منها مصر , واتسمعت بشكل واضح واتسجلت كمان رغم غرابة الموضوع وعدم وجود اي تفسير وتكتم العلماء عن التصريح بأي معلومة وكثرة الاشاعات على الظاهرة وتزييف البعض للفيديوهات ومحاولة البعض الاخر لتفسير الظاهرة بشكل ديني او فلكي او علمي على حسب اعتقاداتهم وافكارهم , الا انها حصلت وبالفعل اتسجلت واتكلم عنها الصحف العالمية والاعلامي احمد المسلماني لكن ملها ش اي تفسير بالظبط زي باقي الظواهر اللى اتكلمت عنها 
وفي بداية 2017 , اتسجلت مشاهدات بعدد كبير جداً لسقوط نيازك في جميع انحاء العالم والمثير للغموض ان الجسم ده في كل مكان اتسجل بيضيئ لون ازرق او اخضر متوهج وده اللي اثار فضول الصحف العالمية لمتابعة الموضوع وفرض احتمالية التشكيك في فكرة ان الجسم ده نيزك وامثله على المناطق اللى حصل فيها كده 
" ولاية الينوي الامريكية بتاريخ 
6 فبراير 2017
المملكة العربية السعودية بتاريخ 
7 فبراير 2017 
سان ديغو " فيديو مرفق "
11 ابريل 2017
والحادثة كانت لواحدة بتعمل بث مباشر ليها مع اصحابها لحظة سقوط النيزك
اما موقع " DailyStar البريطاني " فا قال ان الضوء لجسم غريب مبيعتقدوش انه نيزك وقالوا ان الفيديو ساب العديد من التساؤلات 
اما بقى المفجأة !
اعداد ضخمه جداً من الطيور , هاجمت مدينة تيكساس بتاريخ 20 يناير 
وارموسييو سونورا في المكسيك بتاريخ 25 يناير
والعلماء معندهمش اي تفسير لتصرف الحيوانات بالشكل الغريب الجنوني ده ! , الفرق بين الهجومين .. خمس ايام بس ! ولو جينا نربط التواريخ بين كل ظاهرة والتانية هنلاقي تقارب مخيف !
وأخيراً ومعتقدش انه هيكون آخراً 
ظهور اضواء في المكسيك فى السماء غريبة بتاريخ 12 يناير 
ونفس الاضواء في سماء الولايات المتحدة الامريكية بتاريخ 18 يناير 
" الفيديو مرفق "
المقال مش محاولة مني لربط الظواهر بشيء معين او ربطها ببعض , لكن ظهورها ورا بعض شيء مثير للقلق خصوصاً لو لاحظنا التواريخ ! 
قد يكون العالم بدأ بالانهيار والظواهر دي مجرد ناقوس للخطر 
ونذير لشؤم يقترب زي ماقال احد الباحثين
في صحيفة الدايلي ميل 
ياترى ده عد تنازلي لحاجة هتحصل ؟
ولا مجرد ظواهر ملهاش تفسير وفترة وهتختفي !؟
مستنية رأيكم
" الكون مساحة لا نهائية من الغموض , ثمة الكثير من الأسرار لم يبح بها بعد "
 الصور المرفقه والفيديوهات


التسميات:

تعليقات

إرسال تعليق

المشاركات الشائعة