النبي فرانك | قتله ام مرضى؟

" تنبيه : المقال 18+ لإحتوائه على بعض الاجزاء التي لا تناسب القراء تحت السن .. لذا وجب التنبيه "

نبدأ 
*****************************
جنون العظمة .. يعني ايه جنون العظمة ..؟
بنسمع كتير الكلمة دى من الدكاترة والمحللين النفسيين ..
وبنبص ليها بنظرة سطحية بنفتكر ان معناها " الشخص الي شايف نفسه احسن من الكل "
ده صح .. بس مش تفسير عميق للمصطلح ..
طب ايه التفسير ؟ وايه علاقته بالقصة الى هتكلم عنها ..
جنون العظمة مش مرض نفسي زي ما اغلب الناس فاهمة ..
جنون العظمة مرض عقلي .. وفي فرق بين الاتنين ..
ممكن يكون علامة وعرض من اعراض الشيزوفرينيا او " الفصام " .. 
وممكن يكون مرض مستقل خالص ومش علامة لمرض تاني ..
المرض بيكون وراثي .. او حصل بأسباب عضوية .. أو اسباب نفسية .. 
المريض بجنون العظمة بيعتقد 100% انه عنده صفات مش واقعيه 
وعنده عظمه وهميه ومش بيقتنع لو حد قاله انه مفيهوش حاجة من الحاجات دى ..
يعني الكلام مبيجيبش معاه نتيجة ..
المريض بيعتقد كمان انه حاله استثنائيه محصلتش في الدنيا ..
وبيتميز بقدرات ومواهب خارقة .. فى ناس بتفتكر نفسها مسؤلين سياسيين ..
او رؤساء .. او فلاسفة .. او رجال اعمال ..
او رجال دين .. او أنبياء .. 
وده اللي حصل بالظبط مع " عائلة Alexander " 
*****
عائلة ألكساندر عاشت في ألمانيا .. وبالتحديد مدينة "هامبورغ " " أب وأم وتلات بنات ", والأب " هارالد " كان من أتباع " جورج ريهل " زعيم طائفة اسمها " وربر " ..ودي طائفة روحانية أسسها واحد نمساوي اسمه " يعقوب وربر " كان بيقول إنه نبي من عند ربنا .. ولما مات جورج ريهل .. هارالد ألكساندر أعلن انه ورث زعامة الطائفة عن جورج ريهل .. ومراته كانت بردو بتشاركه وبتدعمه في جنونه 
وآمنت بالمعتقدات الغريبة دي من غير اي اعتراض ..وبعد فترة ..هارالد ومراته جابو ولد وسموه " فرانك " وهارالد ساعتها قال لمراته ان ابنهم ده النبي الجديد .. وعشان كده .. كان هارالد ومراته وبناته التلاته بيخدموا " فرانك " النبي الجديد في اعتقادهم .. بشكل مبالغ فيه وطلباته كانت اوامر ومفيهاش نقاش .. 
لدرجة ان " زنا المحارم " كان طبيعي في بيتهم .. عشان " النبي فرانك " قال ان مينفعش يلوث نفسه مع حد من بره طائفتهم .. وبعد ما تصرفات العيله الغريبة دي بقى محط انظار الناس والقيل والقال زاد .. 
الشرطة بدأت تهتم وتراقب تحركاتهم من بعيد .. وده خلى عائلة الكسندر تسافر لـ " جزر الكناري " وتعيش هناك بعيد عن المشاكل .. وكان مصدر دخلهم .. شغل البنات في البيوت " خادمات " ويوم 22 ديسمبر سنة 1970 م .. وقف هارالد وفرانك ابنه قدام فيلا " الدكتور والتر " وطلب الاب يشوف بنته " سابين " الي شغاله عنده في الفيلا .. فخرجت سابين ووقف الدكتور جمبهم ..واتصدم وهو بيسمع الاب بيقول لبنته .. " سابين عزيزتي نريد منك أن تعلمي بأنني وفرانك انتهينا للتو من قتل أمك وأخواتك !! " فردت عليه سابين وقالت وهي مبتسمة " انا متأكدة أنك فعلت الصواب " .. الدكتور اتصل بسرعة بالشرطة .. ومسكوا هارالد وإبنه ..وفي مركز الشرطه فرانك سرد القصة بالتفاصيل وبكل بساطة قال ان امه كانت بتبصله وده ممنوع لإنه نبي .. عشان كده قتلها بإستخدام شماعه الملابس .. وبعد كده قتل اخته " ماريا " وأخته " بيترا " بنفس الطريقة ..بعد كدة ساعده أبوه فـ " قطع الأعضاء المحرمة " وأكد الأب ده وقال " ان الاعضاء التناسلية لمراته وبناته اعضاء محرمه وكان لازم يشيلها " بعد مافحصوا الأب وإبنه ..إعتبروهم مجانين بشكل رسمي ودخلوهم مصحة عقلية تحت حراسة مشددة 
بس العلاج مجبش معاهم نتيجة ..وفضل الاب ينادي ابنه " النبي فرانك " اما " سابين " فابعتوها تعيش فى دير آمن حسب رغبتها .. ولحد اليوم ده .. فى ناس لسه بتنتمى لطائفة " ألكساندر " بس منعزلين عن المجتمع والناس .. وعددهم قليل جداً .. 

اسيبلكم هنا السؤال .. ايه رايكم في القصة ..
وهل فعلا يستاهلوا العقاب ..؟
مع الاخذ في الاعتبار انهم مرضى عقليين .. ولا يستاهلوا العقاب بغض النظر عن مرضهم ؟
ولا شايفين انهم بيتدعوا الجنون ويستحقوا العقاب .. ؟
عرفوني رأيكم في الكومنتات ..!

مصادر : 
https://en.wikipedia.org/wiki/Jakob_Lorber

https://ar.wikipedia.org/wiki/جنون_العظمة

http://www.gettyimages.com/photos/hamburger-maurer-harald-alexander?excludenudity=true&family=editorial&mediatype=photography&phrase=hamburger+maurer+harald+alexander&sort=mostpopular

http://www.jakoblorber.de/inhalte/alexander.htm

http://usersites.horrorfind.com/home/horror/bedlambound/library/alexander.html

#غريبة
#يارا_عمر
#أكسجين_حروف