قصص حقيقية | عمال الفنادق
شوية
مواقف وقصص حصلت مع عمال فى فنادق حبيت اترجمها ليكم بشكل عامي
ولأنهم كتير وطوال شوية فاهكتفي بخمس قصص بس المره دي والباقي هنزلهم ليكم بعدين, ويلا نبدأ ..
1 - " انا بعتذر لأني مبعرفش
احكي قصص لكن القصة دي حقيقية جداً وأقسم على ده لأنها حصلت لأمي , امي كانت لاجئة
من فيتنام مبتعرفش تتكلم انجليزي اوي لكن محتاجة فلوس واتضطرت تتعلم شوية كلمات
عشان تشتغل في فندق في واشنطن في التسعينات والناس فى الفندق حبوها حتى المدير
بسبب انها كانت شاطرة فى التنظيف جدا ولطيفة معاهم , في يوم نزل جيست في الفندق
هسميه مستر إم لأني معرفش اسمه وحتى اسمه اللى نزل بيه فى الفندق مستعار .. وطلب
اغلى اوضه فى الفندق عشان كده طلب المدير من امى انها تنضف الاوضه , وراحت بالفعل
عشان تنضفها لكن لقت لافته " ارجو عدم الازعاج " على الباب عشان كدة
بلغت المدير انها هترجع بعدين تنضفها ..وكان من الغريب ان مستر إم فضل لمدة شهر
مبيسمحش لأي شخص يدخل الاوضه رغم انه كان بيدي طاقم الفندق فلوس كتير وبيرحب بيهم
لما يشوفوه عشان كده محدش اداله اى اهتمام وسابوه على راحته .. واختفى فجأة عشان
كدة افترض المدير والعمال انه مشي من الفندق من غير ماحد ياخد خبر حتى لافته
الازعاج اتشالت , فطلب المدير من امى تروح تشوف الاوضه وتنضفها .. وراحت امي فتحت
الاوضه لقتها متبهدله جدا وفى حاله فوضى .. وشمت ريحه غريبة جدا وقوية فى الاوضة ..
مشيت ورا الريحة لحد ماوصلت للدولاب وملقتش غير صندوق من الورق المقوى وتقيل , بمجرد
مافتحت الصندوق شافت حاجة رعبتها لحد النهاردة محفورة فى ذاكرتها , راس بنت شابة
مقطوعه ومتحلله , صرخت وطلعت تجري من الاوضة واغم عليها فى الاسانسير ولما استعادت
وعيها لقت البوليس فى كل مكان وبيحققوا فى الواقعة وعرفوا ان مستر ام استخدم بطاقة
ائتمانية مزيفه والراس المقطوعة تخص بنت عاهرة , وامي معرفتش اي تفاصيل تانية
وقدمت استقالتها فى نفس اليوم . "
2 - " اشتغلت سنتين في مجال
الحراسة الليلية الداخلية في فندق وعرفت ان الحاجات اللى ممكن تقشعر بدنك مش احساس
الوحدة والهدوء اللى حواليك بالليل , فى حاجات تانية تخوف اكتر .. زي اني فى فتره
حراستي لقيت راجل مسلح الساعة 3 الفجر بيهددني بالقتل بدون سبب ومرة تانية سيدة
مصابة بالشيزوفرينيا بتصارع نفسها فى اوضتها وصوت صريخها المخيف ملى الفندق , ومرة
تالتة لراجل كان بيتجول فى قاعات الفندق بالساعات بيكلم نفسه عن النهاية وبيبصلي
بصات مخيفة. "
3 - " ركبت الاسانسير لوحدي
عشان انزل من اعلى دور فى الفندق للدور السفلي واول ماوصلت الدور الرابع , الاسانسير
وقف , الابواب اتفتحت , وشفت الناس واقفة قدام الاسانسير متحركتش ومدخلوش حسيت
بالاستغراب للحظة والابواب الاوتوماتيكية بتقفل وقبل ماتتقفل بشكل كامل سمعت واحد
بيقول : الاسانسير مليان ناس كدة ليه ؟ . "
4 - " انا وابويا واتنين عمال
تانيين كنا بننضف حوض السباحة الخاص بالفندق وفجأة جت بنت شابه على وشها ملامح
هدوء غريب نزلت الحوض بملابسها العادية وطلبنا منها تطلع وابويا اشار ليها على
لافتة بتقول ان الحوض مينفعش حد يستخدمه اثناء التنضيف , بصتله البنت وابتسمت
ابتسامه مرعبه وقالتله : بما انكم بتنضفوا ياريت تنضفوا القذارة اللى هتحصل حالا
بشكل جيد , وطلعت مشرط وقطعت شرايينها بدون تردد وبسرعة رهيبة ."
5 - " اشتغلت كـ نادل فندق فى
بار فى جناح الاثرياء وكان يوم هادي وجميل جدا .. دخل راجل مثير للشك والريبة قعد
قدامى بهدوء وطلب بيرة وكاسة صغيرة , حسيته حزين فحاولت اخفف عنه حالته المزاجيه
واكلمه بطيبة وسألته لو كل حاجة تمام ومفيش مشكله معاه وقالي : لا , قلتله : في
حاجة اقدر اساعدك بيها لو في مشكلة ؟ فقالي ان البنت العاهرة الي مرافقها قطعت
شرايينها فى حوض الاستحمام " البانيو " الخاص بأوضته فى الفندق , اتراجعت
وانا بصرخ وبجري عشان اتصل على الطوارئ واول مارجعت لقيت الراجل نايم على البار مش
بيتحرك وجريت عليه اشوفه لقيت نبضه ضعيف وجسمه بارد زي التلج وبعد ما البوليس جه
ونضف الفوضى دي بعدها بكذا يوم في شخص ساب فى نفس الاوضه ملاحظة كتب فيها : "
اريد ان اشعر بلمسة إمرأة قبل ان اموت " وجه البار واتعاطى جرعة زيادة من
المخدرات ومات قدامي , انا خدت اجازة بعد الجنان اللى حصل ده عشان اقدر ارجع اشتغل
تانى بشكل طبيعي . "
تعليقات
إرسال تعليق