القطط المجنحة | بين الأساطير والحقيقة
ايه اول حاجه ممكن تيجي في بالك لو قولتلك " قطط مجنحه " ؟
تعال نرجع بالزمن شويه للحضارات القديمة زي المصرية القديمة والاغريقية والسومرية واحكيلك حاجه هتساعدك شويه تتخيل ..
في البداية ، دائما الحضارات بتركز على تجسيد السنوريات بأجنحه بمختلف اشكالها وانواعها ، " قطط ، نمور ، اسود .. الخ "
والكلام ده كان بيظهر في معابدهم واثارهم وتراثهم لدرجه ان كانوا بيعتبروهم قديماً الهة وبيعبدوهم كمان وجميع الحضارات كانت متفقه على شكلهم وهيئتهم ودورهم ، سواء بيشاركوا في المعارك والصراعات او لحماية معابد واماكن معينه او يكلفوهم بحماية اسرار مهمه ويكونوا حراس عليها باعتبارهم وحوش مدربه جيداً على القتال .. وده يخليك تتسائل ..
" هو ممكن بعيد عن المنطق يطلع فعلا كلامهم صح؟ هل في سنوريات بتطير على الاقل في زمانهم "؟
يعني عندك مثلاً رمز الشعار الإنجيلي للقديس مرقس والمعروف دلوقت باسم " أسد القديس مرقس " وهو رمز البندقية وبطريركية الروم الأرثوذكس بالإسكندرية.
وعندنا الجريفين اللي اتذكر في الحضارة اليونانية وجسدوه على انه بجسم أسد ورأس وجناح نسر واستخدمه الاوربيين كمان في رموزهم وتراثهم ومنشآتهم العسكرية والمدنية ..
ونظيره في الحضارات التانيه هو " ابو الهول " والفرق بينه وبين ابو الهول ان ابو الهول برأس بشري .
و " لاماسو" في الأساطير السومرية والفارسية والأكادية اللي جسدوه على انه نصف ثور ونصف أسد ورأس انسان ..
ومش هننسى السفنكس او " ابو الهول " اللي اتذكروا في الحضارتين المصرية القديمه واليونانية واللي جسدوهم بهيئة جسد أسد مجنح ورأس بشري ..
البعض يعتقد ان ابو الهول في الأساس إمرأة وجسمها جسد لبؤه زي ماجسدها اليونان ..
والبعض يعتقد ان ابو الهول في مصر هو الذكر اما اللي جسدها اليونان هي الانثى وان كان في منهم كتير وبيتكاثروا وبسبب ما مجهول اختفوا وعظمتهم وجسدت ذكراهم الحضارتين ..
كل الكلام ده جميل .. لكن ركز معايا لأن الموضوع هيبدأ يزداد غرابه
جاهز؟
سنة ٢٠٠٤ ظهر في المكسيك قط أسود ليه جناحين وكان شكله صادم للناس والسكان المحليين اللي كانو فاكرينه " شيطان " وبيهربوا منه
والناس بدأت تنتبهله اكثر فأكثر ويزيد الخوف وحالة الرعب والهلع لحد ما بدأوا يحدفوه بالحجاره وانتهى بيه الأمر ميت ..!
لكن الموضوع مكانش مجرد حاله فرديه .. القطط المجنحه ظهرت في بلاد كتير جدا وبعد بحث الخبراء اتضح ان الموضوع من القرن الـ ١٧ مثلا
وناس كتير حاولت تطلع نظريات على الموضوع
زي منطقه صغيرة في ولاية جورجيا الامريكية وبدأ الناس يأكلوها ويعتبروها جالبة للحظ .. !
وناس تانيه اعتقدوا انهم ملايكة سقطوا على الأرض فظهروا متشكلين على هيئة قطط بأجنحه .. وبعض الناس قالو انها شياطين نظراً لأن القطط ارتبطت بقصص الساحرات والشعوذه ..
وسنه ٢٠٠٨ قط منزلي في مقاطعة سيتشوان الصينية لأحد السكان
في فصل الصيف وفترة وموسم التزاوج ، حاولت القطط التقرب منه وبعدها لاحظ صاحبه ان القط بدأ يظهرله أجنحه ، في البداية كان فاكرها شعر زائد او عظام وقال :
" في البداية كانتا مجرد نتوءين لكنهما نمو بسرعه كبيره جدا وشكلوا جناحين "
وحاول العلماء يفسروا السبب وقالوا تشوهات جينية او زوائد جلدية بس وطبعاً الموضوع اعتبر حادثه فرديه وتم تجاهله ..
تقدر تقرأ الخبر هنا بتاريخ ٢٠٠٨ :
https://www.telegraph.co.uk/.../Chinese-cats-grow-wings.html
ولكن سنة ٢٠٠٩ ظهرت حالة تانيه في مقاطعة تشونغتشينغ
لقطة بأجنحة وبدأت الحالات تزيد وتسجل بشكل كبير جدا في الصين وده خلى مجلات علمية تقول ان نمو الأجنحة الغريب ..
راجع لطفرة جينية ناتجه عن مواد كيميائية اتعرضت لها القطط الأم اثناء الولاده
وان ممكن يكون التلوث ده جاي من تلوث الهواء والمصانع الكتيره في الصين .. واللي هو عادي يعني .
وعندك هنا مقال حديث من ٢٠٠٩ متحامل جدا على الصين والتلوث وبيحاول يثبت ان التلوث هو السبب :
https://www.discovermagazine.com/.../is-pollution-in...
وهنا اتسأل سؤال منطقي .. لو السبب في ظهور القطط بأجنحه هو التلوث ، ليه في بلدان تانيه تعتبر معندهاش تلوث كان بتظهر حالات زي دي ؟
العلماء لاحظوا ان في حالات كتيرة جدا تم تسجيلها حديثة وقديمة
فاحاولوا يخرجو باكثر تفسيرات منطقية ممكنه ..
واستقروا على ٣ تفسيرات
اولا : الفرو الزائد والمتعرج بسبب عدم تمشيط شعر القط بشكل صحيح.
ثانيا : مرض جلدي يسمى الوهن الجلدي للقطط واللي يشبه لحد ما زوائد جلديه ممكن تتدلى من جسم وجلد القط وينمو عليها الشعر .
ثالثا : زوائد بسبب تشوهات جينية .
والقوا اللوم على الصحافة وقالوا ان كل الحالات دي معظمها مصاب بالمرض الجلدي والصحافة حبت بس تعمل ضجة وان في حوالي ١٨٣ حالة تم تسجيلها .
ويبقى السؤال .. هل هي حالات مرضية فعلا ؟
ولا فعلاً فصيلة منهم بتنمو لهم أجنحة وبالزمن اندثروا ؟
متنساش تشاركني برأيك انت في التعليقات .. وشكراً 🌹
تعليقات
إرسال تعليق