شآه ميران | لن يوقف أحد حرب الأفاعي القادمة على البشر

 

شاهميران ، أو شاه ميران

لأول وهله اكيد جه في بالك ميدوسا من الأساطير اليونانية ..

لكن المره دي انا هحكيلك عن شاه ميران من الفلكلور الكردي والمتوارث بين ايران والأناضول والعراق ..

مخلوقة أسطورية نصف ثعبان ونصف إمرأة ولها أرجل متعددة تشبه أرجل العقرب .. اسمها جاي من كلمه فارسية

" شاه " عنوان للملوك الفرس زمان

" ميران " وتعني ثعابين ومفردها " مار " أي ثعبان

تعتبر شاه ميران من الأساطير اللي بيتناقلها الشعب الكردي من قديم الزمن ولها قصة وملحمة غنائية لها معاني جميلة في اعتقادهم ..

قبل الآف السنين بالقرب من مدينة اسمها طرسوس في باكور - كردستان وبالتحديد ياسيدي في مغارات تحت طبقات الأرض السبعة .. عاشت جماعة من الأفاعي ، اسمهم " ميران "

وبعكس توقعاتك ، كانت جماعة طيبة ومسالمة وذكية ومؤمنين بالصداقة والمحبة والسلام ، وكانت بتقودهم بنت جميلة اسمها " شاه ميران " او ( ملكة الأفاعي )

وفي يوم من الأيام شاب فقير اسمه " جامساب " بيشتغل في بيع الحطب ، لقى هو وصحابه بئر مليان عسل ، وفرحوا واستخدموه في اكل العسل والانتفاع بيه وقرروا يبيعوه .. ونزل جامساب بنفسه عشان يجمع العسل

ولما خلص العسل من البير ، اصحابه سابوه في البئر واتفقوا يستفادو لوحدهم من العسل والثروه اللي هتجيلهم من وراه من غير جامساب ..

وهو في البير لقى فتحه في الأرض ، وفضل يوسعها ويمشي جواها لأيام طويله مستمره على امل تخرجه للبر لحد ما اغم عليه من التعب ، واول ما فتح عينيه لقى نفسه محاط بالأفاعي من كل مكان

وشاف شاه ميران وهي بتقترب منه ، وكانت هادئة وسألته ازاي وليه وصل ارضهم ، وعاوز ايه منهم ..

حكالها الشاب عن الخيانة اللي اتعرض ليها والقصة من اولها

وبعد ماخلص كلامه قالتله شاه ميران انها هتطلعه من البئر وترجعه لأرضه بشرط أنه يكتم سر مقابلته ليها للأبد وميقولش ابدا ازاي وصل لأرضها .. وفعلا وعدها جامساب وبعد ماوعدها أدته ثروة تكفيه وزيادة .. وخرجته من البئر زي ماقالت ..

ولما وصل الشاب لأرضه سمع الأطباء بيوصفوا للحاكم يأكل لحم شاه ميران عشان يخف ويقوم من مرضه .. وفضل الشاب ساكت ومقالش اي كلمه عنها ..

لحد مافـ يوم كان بيتكلم مع صحابه وغلط وقال انه قابلها فعلا

ولتاني مره خانوه ووصلوا الخبر للحاكم فاستدعى الحاكم " جامساب " وطلب منه يعرفه مكانها فرفض الشاب

لكن و ير الحاكم اغراه بالنقود والمال وعرض عليه منصب الوزارة وفعلا أفشى جامساب السر

وراح الوزير للمخبأ وقرأ طلاسم وتعاويذ وخرجت شاه ميران من البئر على صفيح من ذهب ، فهجم عليها الوزير والحراس

واخذوا لحمها للحاكم وأكل منه واتعالج من مرضه .. 

ويقال كمان حسب الأسطورة ان الأفاعي الطيبين ميعرفوش للنهاردة انها اتقتلت ، وان يوماً ما هيخرجوا يبحثوا عنها ، ولما يعرفوا انها اتقتلت واتعرضت للخيانة من البشر .. هتخرج شرورهم ويقيموا حروب على البشر يقتلوا بيها الملايين .. "ولن يوقفهم أحد " .

متنساش تشارك المعلومة مع غيرك .. وشكراً 🖤 

إضغط لقراءة المقال على فيسبوك