حوريات البحر | سحر يسكن أعماق البحار

 

السؤال مش مين ميعرفش حوريات البحر ؟

لكن مين يعرف حوريات البحر جت منين اسطورتهم ؟

ومين يعرف حوريات البحر حقيقة ولا خيال ؟

وانا النهاردة جايه اشاركك حبه معلومات هيساعدو خيالك جدا ويخلوك تسرح لبعيد ، كل اللي مطلوب منك تصفي ذهنك وتستمتع

تاريخ حوريات البحر

الموضوع بدأ من أسطورة " بابلية " من حضارة بلاد الرافدين العظيمة .. أسطورة " حوري البحر البابلي " والمقصود بـ حوري ( المذكر من حورية أي ذكر حورية البحر )

وكان اول شخص يوصف بوصف حور البحر في التاريخ وكان اسمه

" أوانس أو آدابا " .. الأسطورة بتقول ان اوانس هو الإله الي احضر الحكمة والعلم للبشر ،وان حكمته هي السبب في تأسيس الحضارة

والمؤلف البابلي " بيروسوس " وصفه بأن جسمه الخارجي عباره عن سمكه ، وتحت السمكه في جسد بشري عادي وأنه جاء من كوكب غير كوكب البشر وجاب معاه كل العلوم للبشرية والمعرفة الموجودة للأرض .. وكان كوكبه أكثر تقدماً من كوكبنا ، وبعد ماخلص مهمته قرر يسكن البحر !

طبعاً جزء زي ده مش هيمر مرور الكرام عليا فاهشاركك هنا معلومه قديمه كتبت عنها مقال زمان تقدر تقراه كامل من هنا :

إضغط للقراءة

وبشكل مختصر المعلومه بتقول ان في قبائل منعزله تماماً عن البشر لحد دلوقت عايشين عالأرض ميعرفوش يعني ايه حضارات وميثولوجي معندهمش علم بأخبار العالم .. يمكن يكونوا موصلش ليهم حتى كورونا بسبب انهم معزولين بطبعهم في اماكن مبيوصلهاش غير الباحثين والمؤرخين ، متخيل قد ايه مفيش اختلاط بينهم وبين العالم الخارجي؟

حلو .. القبائل دي منها قبيلة اسمها " الدوغون " عندهم معرفه وعلوم بالفضاء والفلك بدقه شديده بشكل غريب وبعد ماوصلهم العلماء والخبراء والمؤرخين واستغربوا دقة علمهم وشرحهم ورسوماتهم ، وسألوهم عرفوا منين كل ده؟

جاوبوهم بأن في كائنات فضائية وصلت للأرض لأجدادهم وتشبه بشكل كبير حسب الوصف الي وصفوه " حوريات البحر " وقالو ان اسمهم " النومو " وأنهم بيعتبروهم آباء البشرية والمرشدين في الكون لجميع المخلوقات سواء على الأرض او كواكب تانية .. الدوغون في كل مكان بيرسمو قصة وصول المخلوقات دي للارض وازاي علموهم علوم متقدمة وبيرسموهم رسم مطابق تماماً لـ أوانس في الأسطورة البابلية !

وهنا السؤال

ازاي قبيلة منعزله ومنغلقه زي دي تقول نفس الكلام اللي قالته أسطورة بابلية من القرن الـ ٣ قبل الميلاد ؟

طب نرجع تاني للقرن الرابع قبل الميلاد بقا .. ايه حصل؟

ظهرت إلهه أسطورية اسمها " أترعتا " يعني بعد قرن واحد من ظهور أوانس ، وكان منظرها يشبه حورية البحر بشكل صريح جدا .. جسم نصه بشري ونصه سمكة .. وظهرت أترعتا في سوريا القديمة أولاً وبعدها وصلت أسطورتها لحد روما وسموها بالإلهة السورية

واتعرفت كمان باسم " ديرسيتو "

واعتبروها إلهة الخصوبة والحياة في المياه وكانت مسؤولة عن ترفيه شعبها .

ومن هنا انطلقت أساطير في كل مكان عن حور البحر .

وفي الأساطير الإسكندنافية مثلا كانوا بيطلقوا على اساطير حور البحر " هافين " والحوري الذكر " هافرو " والحورية الأنثى " هافماند"

ووصفوهم بأنهم كانوا متقلبين المزاج وعصبيين جدا وسهل استفزازهم بسهولة وحسب الأساطير كان البحارة بيعتبرو ان مقابلتهم للهافمند نوع من انواع المقامرة ، لأنهم مش ضامنين اذا كانت هافماند شريرة او طيبة .. وكان دايما بيتم تحذير البحارين والصيادين من سحرهم ..

وعشان كده كان بيتم الخلط بينهم وبين مخلوقات الـ " سيرين " ولحد النهاردة ناس كتير متعرفش الفرق بينهم .. وتقدر تقرأ هنا قصة مخلوقات السيرين :

إضغط للقراءة

السيرين Sirens والحوريات Mermaids

كان بيصور الناس دايما الحوريات بأن ليها صوت ساحر وجذاب بيغري البحاره والصيادين في البحر واحيانا تغرقهم بسبب سحر صوتها متعمده واحيانا ينزلولها وتنقذهم هي بنفسها ..

وشفنا حاجات زي دي طبعا في افلام زي هاري بوتر وفيلم ديزني حورية البحر آريل ..

لكن الحقيقة ان حوريات البحر معندهمش القوة دي ولا اتذكر في الأساطير أي حاجه عن الغناء ، ولكن بسبب خلط الناس واللغبطه بينهم وبين السيرين الناس بدأت تخلق قصص تانيه ..

وحسب الأساطير السيرين هي اللي بتملك صوت ساحر بيجذب البحاره وتضللهم ويتوهو ف البحر بلا عودة ، اختفاء تام بدون معرفة مصيرهم ..

وطبعا الفرق بينهم وبين الحوريات ان اجسادهم جسد بشري والنصف التاني لطائر .

لكن طبعا الحوريات حسب الأساطير لهم قدرات سحرية كبيرة وحكمة واسعة ملهاش حدود .. فمثلاً معروف عنهم موهبة الإستبصار ، والتنويم المغناطيسي وتخاطر عن بعد وبعض الأساطير بتقول انهم كائنات خالده .

كمان خليني اضيفلك ان في نوع من انواع الاحجار الكريمة أسمه " الزمرد الريحاني " وهو ثمين جدا جدا وحسب اعتقاد البعض انه مش مجرد كنز .. وبيرجعوا سبب وجوده لأسطورة بتقول انه عبارة عن دموع الحوريات ، وان في حال خروج الدمعه من عينها تتحول على طول لزمرد ريحاني ..

وعشان كده بحاره وصيادين كتير كانوا مقتنعين ان امتلاكهم لحجر منهم هيخليه يتجنب الاعاصير والعواصف واي اخطار في البحر ..

ده غير طبعا دموع الحوريات اللي بتقود لعالم خفي سحري فيه ينبوع الشباب الأسطوري واللي بمجرد مايشرب منه شخص يفضل شاب طول حياته .

وطبعاً مش دي بس كل قدرات الحورية .. حسب الأسطورة الحورية قبلة منها بتخلي الانسان يملك خياشيم تسمحله يتنفس تحت البحر .. ودي حاجه شوفناها كتير في الافلام . 

وفي النهاية

حوريات البحر هتفضل لغز من الالغاز اللي ملهاش اجابة ، حقيقة كانت او خرافة .. ونختم بإقتباسي المفضل .

" الأسطورة ، كانت يوماً ما حقيقة حرفها البشر ولكنها حقيقة .. لا يوجد دخان بدون نار "

إضغط لقراءة المقال على فيسبوك